ДБ-ийн сайдын 2001 оны 360 дугаар тушаалын дөрөвдүгээр хавсралт

 

 

1.1.           Үндэсний инженерүүдэд тэдний төсөв, үнэ бүрдүүлэлтийн талаарх онолын мэдлэг, мэргэшлийн ур чадвар болон бүтээл, туршлагыг нь үнэлж мэргэшлийн зэрэг олгох, сунгах, цуцлахтай холбогдсон үйл ажиллагааг энэхүү журмаар зохицуулна.

1.2.           Энэхүү журмын зорилго нь төсөвчдийн мэдлэг, мэргэшлийн ур чадварыг дээшлүүлэх, гүйцэтгэлийг хянах, үр дүнг тооцох ажлыг сайжруулах, улмаар хөрөнгө оруулалтын төлөвлөлтийн үндэслэлийг дээшлүүлэхэд оршино.

1.3.           Төсөвчний мэргэшлийн зэрэг нь мэргэшсэн, тэргүүлэх гэсэн хоёр шаттай байна.

1.4.           Зөвхөн зэрэг бүхий төсөвчин шинээр барих, угсрах болон өргөтгөл, шинэчлэлт, засвар хийх барилга байгууламж, тоног төхөөрөмжийн өртгийг тодорхойлох, төсөв-санхүүгийн тооцоо, гүйцэтгэлийн төсөв зохиох ажлыг бие даан хийх эрхтэй.

1.5.           Төсөвчдөд мэргэшлийн зэрэг олгох, сунгах, цуцлах ажиллагааг ДБЯ-ны дэргэдэх "Дэд бүтцийн салбарын магадлан итгэмжлэл, мэргэшлийн зэрэг олгох " орон тооны бус зөвлөл (цаашид Зөвлөл гэнэ) удирдаж хяналт тавина. Мөн мэргэжлийн холбогдох олон нийтийн байгууллагаас хяналт тавих, санал дүгнэлтээ Зөвлөлд оруулах зэргээр оролцож болно.

2.1.           "Мэргэшсэн" зэрэг горилогч төсөвчин нь тухайн салбар, чиглэлээр инженерийн дээд (боловсролын бакалавр ба түүнээс дээш зэрэгтэй) боловсролтой, мэргэжлээрээ нийт 5-аас доошгүй жил ажилласан, зохих шатны сургалтаар төсөв зохиох мэдлэг эзэмшиж 3-аас доошгүй жил төсөв, үнэ бүрдэлтийн чиглэлээр ажилласан байна.

2.2.           "Тэргүүлэх" зэрэг горилогч төсөвчин нь дээд боловсролтой, мэргэшсэн төсөвчний зэрэг авснаас хойш 6-аас доошгүй жил төсвийн ажил эрхэлсэн байна.

3.1.           Горилогч нь зэрэг горилох хүсэлтээ Зөвлөлд албан ёсоор бичгээр тавина.

3.2.           Горилогч нь дараах баримт, материалыг бүрдүүлж зарласан хугацаанд багтаан Зөвлөлд ирүүлнэ. Үүнд:

•         Зэрэг горилохыг хүссэн хувийн өргөдөл

•         Хариуцлагатай ажилтны анкет (3x4 зурагтай)

•         Мэргэжлийн сургууль төгссөн дипломын хуулбар (баталгаажуулсан)

•         Ажил байдлын тодорхойлолт

•         Ажилласан хугацааны бүтээлийн тайлан, жагсаалт баталгаажуулсан)

•         Мэргэжил дээшлүүлсэн үнэмлэх, баримтууд

•         Шалгаруулалтын төлбөрийг төлсөн баримт

3.3.           Горилогч нь ажил байдлын тодорхойлолтыг ажиллаж буй байгууллагаасаа авсан байна. Шаардлагатай бол харъяалах дээд байгууллага, мэргэжлийн холбооноос тодорхойлолт авч болно.

 

3.4.           Бүтээлийн тайлан, жагсаалтыг зэрэгтэй хоёроос доошгүй төсөвчин, ажиллаж буй байгууллага хянаж баталгаажуулсан байна. Бүтээлийг Зөвлөл хянан магадлах явцад бүтээлээ зориуд худал мэдүүлэх, эсвэл бусдын бүтээлийг буруу баталгаажуулсан бол буруутай этгээдэд зэрэг олгохоос түдгэлзэх, зэргийг нь хүчингүй болгох хүртэл арга хэмжээг авна.

4.1.           Төсөвчний зэрэг горилогч нарт зориулсан богино хугацааны сургалт, шалгаруулалтыг ДБАМДИ зохион байгуулна. ДБАМДИ нь уг сургалтын төлөвлөгөө, хөтөлбөрийг Зөвлөлөөр батлуулсан байна.

4.2.           Зэрэг горилогчдоос шалгалт авах комиссыг Зөвлөлийн орлогч даргын шийдвэрээр томилно. Шалгалтын комисс болон зэрэг горилогч нь Зөвлөлөөс баталсан шалгалтын журмыг баримтална.

4.3.           Шалгалтын комисс нь мэргэшсэн зэрэг горилогчоос тестээр шалгалт авна. Сургалтад оролцсон байдал, явцын шалгалт, дадлагын амжилтаас хамааруулан горилогчийг шалгалтад оруулах эсэхийг шйиднэ. Авбал зохих нийт онооны 80 ба түүнээс дээш хувийг авсан горилогчийг шалгалтад тэнцсэнд тооцно.

4.4.           Тэргүүлэх зэрэг горилогч нь тестээр шалгалт өгч нийт онооны 90 ба түүнээс дээш хувийг авсан тохиолдолд шалгалтын комиссоос өгсөн төсөвт экспертизийн дүгнэлт гаргаж шалгуулна. Шалгалтын энэ шатанд мөн 90 ба түүнээс дээш хувийн амжилт үзүүлсэн горилогчийг шалгалтад тэнцсэнд тооцно.

4.5.           Мэргэшсэн зэрэг горилогч нь шалгалтад тэнцээгүй бол нэг жилээс доошгүй хугацааны дараа дахин шалгалт өгөх хүсэлтээ Зөвлөлд тавьж болно.

5.1.           Шалгалтын комисс нь горилогчийн шалгалтын дүн, бүтээл, туршлагад үндэслэн зэрэг олгох саналаа Зөвлөлд оруулна.

5.2.           Зөвлөл нь зэрэг олгох асуудлаар нууц санал хураалт явуулан гишүүдийн 75 ба түүнээс дээш хувийн санал авсан горилогчид төсөвчний зэрэг олгож ДБЯ-ны төрийн нарийн бичгийн даргын тушаалаар баталгаажуулна.

6.1.           Мэргэшсэн зэрэгтэй төсөвчид 3, тэргүүлэх зэрэгтэй төсөвчид 5 жил тутамд зохих шалгаруулалтад хамрагдаж зэргээ сунгуулна.