Сангийн сайдын 2011-06-07-ны 129 дугаар тушаалаар хүчингүй

 

Сангийн сайдын 2008 оны 5 дугаар  сарын 1-ний

өдрийн 180 дугаар  тушаалын хавсралт

 

ЗАСГИЙН ГАЗРЫН БОЛОН ТӨСВИЙН БАЙГУУЛЛАГЫН ДАНСЫГ НЭЭХ, ХААХ ЖУРАМ

 

 

НЭГ. НИЙТЛЭГ ҮНДЭСЛЭЛ

 

        1.Төрийн санд Засгийн газрын ба төсвийн байгууллагуудын данс нээх, хаах  ажиллагаа болон арилжааны банкинд данс нээх, тэг үлдэгдэлтэй данс байршуулах зөвшөөрөл олгоход энэхүү журмыг мөрдөж ажиллана.

 

        2.Энэ журамд хэрэглэсэн дараахь нэр томъёог дор дурьдсан утгаар ойлгоно. Үүнд:

           2.1."Төрийн сан" гэж төсвийн хэрэгжилтийг хангах үүрэг бүхий зорилгоор байгуулагдсан Сангийн яамны Төрийн сангийн газар /Төв төрийн сан/, Нийслэл, дүүргийн Засаг даргын Тамгын газрын Санхүү эдийн засаг, төрийн сангийн хэлтэс, аймгийн Засаг даргын Тамгын газрын Санхүү эдийн засгийн бодлого, зохицуулалтын хэлтэс, сумын Төрийн сангийн төлөөлөгчийг;

           2.2."Бүртгэлийн данс" гэж Төрийн санд байршиж буй төсвийн байгууллагын батлагдсан төсөв зарцуулах эрхийн хүрээнд орлого, зарлагын гүйлгээ, санхүүжилтийн эрхийн гүйцэтгэлийг эдийн засгийн ангиллаар бүртгэх дансыг;

            2.3."Харилцагч банк" гэж Сангийн яамны зөвшөөрлийн дагуу Засгийн газрын данс байршиж буй арилжааны банк, түүний салбар тооцооны төвийг;

            2.4."Тэг үлдэгдэлтэй данс" гэж зөвхөн орлого төвлөрүүлэх зориулалт бүхий, үлдэгдэл нь өдрийн гүйлгээ бүрийн эцэст төрийн санд хаагдаж байдаг харилцагч банкинд байршиж буй Засгийн газрын дансыг хэлнэ.

 

ХОЁР. ТӨСВИЙН БАЙГУУЛЛАГЫН БҮРТГЭЛИЙН ДАНС

            1. Дараахь байгууллага төрийн санд бүртгэлийн данстай байх бөгөөд энэхүү данс нь орлого, зарлагын гүйлгээг эдийн засгийн ангиллаар хянан бүртгэх зориулалттай байна. Үүнд:

           1.1.Төсвийн байгууллагын удирдлага, санхүүжилтийн тухай хуулийн 4 дүгээр зүйлийн 4.1.4 дэх хэсэгт заасан төсвийн байгууллагууд;

           1.2.Төсөвт байгууллагад хэрэгжүүлж буй төсөл;

1.3.Засгийн газрын тусгай сан;

1.4.Олон улсын гэрээний дагуу төрийн санд байршуулахаар заасан зээл, тусламжийн төсөл эдгээр болно.

 

           2.Төсвийн байгууллага үйл ажиллагааны онцлогоос хамаарч төрийн санд хэд хэдэн бүртгэлийн данстай байж болно.

3.Төрийн сангийн бүртгэлийн дансыг дараахь байдлаар ангилна. Үүнд:

3.1.Төсөвт байгууллагын урсгал санхүүжилтийн данс;

3.2.Төсөвт байгууллагын хөрөнгө оруулалтын данс;

3.3.Төсөвт байгууллагын төсөл, арга хэмжээний данс;

3.4.Улсын төсвийн орлогын данс;

3.5.Орон нутгийн орлогын данс;

3.6.Гадаадын зээл тусламжийн төслийн данс;

3.7.Засгийн газрын тусгай зориулалтын сан

 

ГУРАВ. ТӨРИЙН САНД БҮРТГЭЛИЙН ДАНС НЭЭХ, ХААХ АЖИЛЛАГАА

 

Бүртгэлийн данс нээх

 

      1.Төсвийн байгууллага нь бүртгэлийн данс нээлгэх хүсэлтийг харъяалах төрийн санд дараахь  мэдээллийн хамт албан бичгээр хүргүүлнэ. Үүнд:

Улсын бүртгэлийн гэрчилгээний хуулбар хувь;

Төсвийн байгууллагыг үүсгэн байгуулсан дээд байгууллагын шийдвэрийн хуулбар хувь;

Албан ёсны нэр, түүний товчлол;

Харьяалах яам, дээд шатны эрх захирагчийн нэр;

Дансны зориулалт төрөл, агуулга;

Бусад нэмэлт мэдээлэл;

 

       2.Төсвийн байгууллагаас ирүүлсэн бүртгэлийн данс нээлгэх хүсэлтийг тухайн шатны төрийн сан ажлын 3 хоногт багтаан хянаж, шинээр данс нээх шаардлагатай гэж үзвэл төв төрийн санд албан бичгээр уламжилна. Тухайн шатны төрийн сангийн хянаж ирүүлсэн бүртгэлийн данс нээлгэх хүсэлтийг Сангийн яамны Төрийн сангийн газар ажлын 3 хоногт багтаан шийдвэрлэж, тухайн шатны төрийн санд хариу мэдэгдэнэ. Данс нээх тухай бүр "Данс нээх маягт"-ыг  (хүснэгт 1) бөглөнө.

 

         3.Дараахь тохиолдолд төрийн санд данс шууд нээж болно. Үүнд:

         3.1.Тухайн оны батлагдсан төсөвт шинээр тусгагдсан төсөвт байгууллагад;

         3.2.Сангийн яамны Төрийн сангийн газрын Санхүүжилт, тайлан бүртгэлийн хэлтсийн бичгээр ирүүлсэн хүсэлтийн дагуу татварын орлогын шинэ нэр төрлийн данс, улсын төсвийн орлого, зарлагын дансыг;

         3.3.Засгийн газрын санхүүгийн удирдлагын мэдээллийн системд шинээр холбогдох сумдад дансыг  шууд нээнэ.

 

Бүртгэлийн данс хаах

 

4.Төсвийн байгууллагын бүртгэлийн дансыг дараахь тохиолдолд хааж болно. Үүнд:

       4.1.Тухайн байгууллагыг татан буулгах шийдвэрийг эрх бүхий байгууллага гаргасан бол;

       4.2.Тухайн байгууллага нь бүтэц, зохион байгуулалт, үйл ажиллагаа төрийн байгууллагын ангиллаас бусад ангилалд шилжсэн тохиолдолд;

        4.3.Төсвийн байгууллага, эсвэл төрийн сан тухайн дансыг цаашид ашиглах шаардлагагүй гэж үзвэл дансыг хааж байна.

 

        5.Төсвийн байгууллага нь төрийн сан дахь өөрийн бүртгэлийн дансыг хаалгах хүсэлтийг харъяалах төрийн санд дараахь мэдээллийн хамт албан бичгээр хүргүүлнэ. Үүнд:

        5.1.Тухайн дансыг хаалгах болсон шалтгаан, үндэслэл;

        5.2.Татан буугдаж байгаа болон ангилал өөрчлөгдсөн тухай дээд шатны байгууллагын шийдвэрийн хуулбар хувь;

        5.3.Тухайн дансны үлдэгдэл, түүний тухай мэдээлэл;

        5.4.Бусад шаардлагатай нэмэлт мэдээлэл.

 

   6.Төсвийн байгууллагаас ирүүлсэн бүртгэлийн данс хаалгах тухай хүсэлтийг тухайн шатны төрийн сан ажлын 3 хоногт багтаан хянаж, тухайн дансыг хаах шаардлагатай гэж үзвэл төв төрийн санд албан бичгээр уламжилна. Тухайн  шатны төрийн сангийн хянаж ирүүлсэн бүртгэлийн данс хаалгах хүсэлтийг Сангийн яамны Төрийн сангийн газар ажлын 3 хоногт багтаан шийдвэрлэж тухайн шатны төрийн санд хариу мэдэгдэнэ.

 

         7.Төрийн санд данс нээх эрх бүхий мэргэжилтэн данс нээсэн, эсхүл хаасан тухай бүртгэлийг хавсралт Хүснэгт 2-ын дагуу хөтөлнө.

 

Бүртгэлийн дансны нэрэнд өөрчлөлт оруулах

 

        8.Төсвийн байгууллагын албан ёсны нэр өөрчлөгдсөн тохиолдолд төрийн сан дахь өөрийн бүртгэлийн дансны нэрэнд өөрчлөлт оруулах тухай хүсэлтийг харъяалах төрийн санд дараахь мэдээллийн хамт албан бичгээр хүргүүлнэ. Үүнд:

        8.1.Тухайн байгууллагын нэр өөрчлөгдсөн тухай дээд шатны байгууллагын шийдвэр;

        8.2.Бусад нэмэлт мэдээлэл.

       

        9.Төсвийн байгууллагаас ирүүлсэн бүртгэлийн дансны нэр өөрчлөх тухай хүсэлтийг тухайн шатны төрийн сан ажлын 3 хоногт багтаан хянаж, төв төрийн санд уламжилна. Тухайн шатны төрийн сангийн хянаж ирүүлсэн тухайн байгууллагын бүртгэлийн дансны нэр өөрчлөх хүсэлтийг Төрийн сангийн  газар хянаж ажлын 3 хоногийн дотор шийдвэрлэж хариу мэдэгдэнэ.

 

ДӨРӨВ. АРИЛЖААНЫ БАНКИНД ДАНС НЭЭХ

 

       1.Төрийн санд байршуулах боломжгүй дансыг арилжааны банкинд байршуулж болно. Үүнд:

       1.1.Төрийн сангийн кассын данс;

       1.2.Төсвийн байгууллагын тусгай зориулалтын данс;

       1.3.Олон улсын гэрээнд арилжааны банкинд данс нээхээр заасан Гадаадын зээл тусламжийн төслөөр хэрэгжүүлж буй төслийн данс;

       1.4.Хуульд арилжааны банкинд байршуулахаар заасан Засгийн газрын тусгай зориулалтын сан;

       1.5.Улсын төсвийн орлого, зарлагын валютын данс

 

   2.Энэ журмын 4.1 дүгээр зүйлд заасан нэр төрлийн данс нээж буй харилцагч банк нь дараахь шалгуурыг хангасан байна. Үүнд:

    2.1.Монголбанкнаас тогтоосон зохистой харьцааны шалгуур үзүүлэлтийг сүүлийн 6 сарын байдлаар хангасан байх;

    2.2.Санхүүгийн байдал тогтвортой, найдвартай үйлчилгээг тогтмол үзүүлэх боломжтой;

    2.3.Харьцангуй бага шимтгэл бүхий үйлчилгээг түргэн шуурхай үзүүлэх боломжтой байна.

 

     3.Төрийн сангийн нэгж бүр төсөвт байгууллагад бэлэн мөнгө олгох кассын дансыг арилжааны банкинд байршуулна. Байршуулах мөнгөн хөрөнгийн дээд хэмжээг төв төрийн сангаас тогтооно. Төрийн сан нь кассын дансны үлдэгдлийг өдөр бүр тулган шалгаж байна.

 

     4.Сангийн яамны Төрийн нарийн бичгийн даргын албан бичгээр өгсөн зөвшөөрлийг үндэслэн төрийн санд байршуулах боломжгүй төсвийн байгууллагын тусгай зориулалтын дансыг арилжааны банкинд байршуулж болно.

 

       5.Төсвийн байгууллага арилжааны банкинд данс нээлгэх тухай хүсэлтийг дараах мэдээллийн хамт албан бичгээр Сангийн яамны Төрийн нарийн бичгийн даргад хаяглан ирүүлнэ. Үүнд:

       5.1.Данс нээлгэх шаардлага, түүний зориулалт;

       5.2.Аль банкинд ямар төрлийн данс нээлгэх тухай танилцуулга;

       5.3.Дансны мөнгөн хөрөнгийн дундаж үлдэгдэл;

       5.4.Бусад нэмэлт мэдээлэл;

 

        6.Төсвийн байгууллагын арилжааны банкинд данс нээлгэх тухай хүсэлтийг Сангийн яам хянан үзэж, хариуг албан бичгээр мэдэгдэнэ.

        7.Арилжааны банкинд байршуулж буй харилцах дансанд дараахь үйл ажиллагаа явуулахыг хориглоно. Үүнд:

        7.1.Тухайн дансыг анх нээсэн зориулалтаас өөр зорилгоор ашиглах;

        7.2.Тухайн дансны мөнгөн хөрөнгийг төсвийн байгууллагын урсгал үйл ажиллагаанд зарцуулах;

 

         8.Улсын ба орон нутгийн төсвийн байгууллага нь арилжааны банкинд байршуулсан дансны орлого, зарлагын гүйлгээний мэдээг Сангийн яамны Төрийн сангийн газрын Санхүүжилт, тайлан бүртгэлийн хэлтэс (орон нутгийн Санхүү, эдийн засгийн бодлого, зохицуулалтын хэлтэс)-т сар бүрийн төсвийн гүйцэтгэлийн хамт гаргаж өгөх үүрэг хүлээнэ.

 

         9.Улсын төсвийн орлого, зарлагын валютын дансыг арилжааны банкинд нээх зөвшөөрлийг Монгол Улсын Сангийн сайд олгоно. Орон нутгийн төсвийн орлого, зарлагын валютын дансыг арилжааны банкинд нээх зөвшөөрлийг тухайн аймгийн Засаг дарга олгоно.

 

         10.Олон улсын гэрээнд арилжааны банкинд байршуулахаар заасан тохиолдолд гадаадын зээл, тусламжийн хөрөнгөөр хэрэгжүүж буй төслийн тусгай болон дэд дансыг арилжааны банкинд нээж болно.

 

               11.Төслийн тусгай дансыг нээхэд дараахь журмыг баримталж ажиллана. Үүнд:

               11.1.Төслийг хэрэгжүүлэх нэгж, байгууллагаас төслийн тусгай данс нээлгэх албан ёсны хүсэлтийг Сангийн яамны Төрийн нарийн бичгийн даргад албан бичгээр ирүүлснээс хойш ажлын 3 хоногт багтаан шийдвэрлэж, данс нээлгэх хүсэлтийг  уламжилсан Сангийн яамны Төрийн нарийн бичгийн даргын гарын үсэг бүхий албан бичгийг Монголбанкнаас тогтоосон зохистой харьцааны шалгуур үзүүлэлтийг хангасан арилжааны банкинд хүргүүлнэ.

                11.2.Төслийн тусгай данс нээхийг зөвшөөрсөн тухайн арилжааны банк данс нээсэн тухай мэдэгдлийг ажлын 3 хоногт багтаан Сангийн яаманд ирүүлнэ.

               11.3..Арилжааны банкнаас данс нээсэн тухай мэдэгдэл хүлээн авсан даруйдаа Сангийн яамны Төрийн сангийн газар ажлын 3 хоногт багтаан төслийг хэрэгжүүлэх нэгж, байгууллагад мэдэгдэнэ.

              11.4.Төслийг хэрэгжүүлэх нэгж, байгууллага тусгай данс нээлгэсэн тухайн арилжааны банкны гарын үсгийн баталгааны маягтын дагуу төлбөрийн гүйлгээний баримтад 2 хоёрдугаар гарын үсэг зурах албан тушаалтны гарын үсгийн баталгааг төслийг хэрэгжүүлэгч эрх олгогдсон төрийн захиргааны төв байгууллагын сайдын тушаалын хуулбарын хамт Сангийн яаманд ирүүлнэ.

             11.5.Төслийг хэрэгжүүлэгч нэгж, байгууллагаас ирүүлсэн гарын үсгийн баталгааны маягтад Сангийн яамны 1 дүгээр гарын үсэг зурах эрх бүхий албан тушаалтны гарын үсгийн баталгааг бөглөж, улмаар  Сангийн сайдын гарын үсгээр баталгаажуулан арилжааны банкинд хүргүүлнэ.

             11.6.Төслийг хэрэгжүүлэгч нэгж, байгууллага нь Сангийн яамнаас зөвшөөрөл авсны үндсэн дээр төслийн дэд дансыг нээлгэж болно. Төслийн дэд дансыг төслийн тусгай данс байршиж буй арилжааны банк, түүний харъяа салбарт нээнэ. Төслийн дэд данснаас гаргах төлбөрийн гүйлгээний баримтад 1 дүгээр гарын үсгийг төслийн удирдагч, 2 дугаар гарын үсгийг төслийн нягтлан бодогч нар зурна.

             11.7.Төслийг хэрэгжүүлэгч нэгж, байгууллага нь тухайн төслийг хэрэгжүүлж дууссаны дараа арилжааны банкинд нээгдсэн төслийн тусгай болон дэд дансыг хаалгах бөгөөд энэ тухай ажлын 3 хоногт багтаан Сангийн яаманд албан ёсоор мэдэгдэнэ.

 

ТАВ. ХАРИЛЦАГЧ БАНКИНД ТЭГ ҮЛДЭГДЭЛТЭЙ ДАНС БАЙРШУУЛАХ

            1.Төрийн үйлчилгээг иргэдэд түргэн шуурхай үзүүлэх зорилгоор улсын ба орон нутгийн төсвийн орлого төвлөрүүлэх үүрэг бүхий төсвийн болон гааль, татварын  байгууллага харилцагч арилжааны банкинд тэг үлдэгдэлтэй орлогын дансыг нээлгэн ашиглаж болно.

            2.Орлого төвлөрүүлэх үүрэг бүхий төсвийн болон гааль, татварын  байгууллага арилжааны банкинд тэг үлдэгдэлтэй данс нээлгэх тухай хүсэлтийг Сангийн яамны Төрийн сангийн газар (орон нутгийн Санхүү, эдийн засгийн бодлого, зохицуулалтын хэлтэс)-т дараахь мэдээллийн хамт  албан бичгээр ирүүлнэ. Үүнд:

        2.1.Тэг үлдэгдэлтэй данс нээлгэх үндэслэл;

        2.2.Сонгосон харилцагч банк, түүний салбар нэгжийн мэдээлэл;

        2.3.Бусад нэмэлт мэдээлэл;

 

            3.Сангийн яамны Төрийн сангийн газар (орон нутгийн Санхүү, эдийн засгийн бодлого, зохицуулалтын хэлтэс) хянан үзэж хариуг албан бичгээр хүргүүлнэ. Төсвийн байгууллагын тэг үлдэгдэлтэй данс нээж буй харилцагч арилжааны банк нь энэхүү журмын 4.2 дугаар зүйлд  заасан шалгуур үзүүлэлтийг  хангасан байна.

            4.Тэг үлдэгдэлтэй данс нээлгэх хүсэлтийг зөвшөөрсөн тохиолдолд улсын төсвийн орлогын дансны талаар тухайн орлогыг бүрдүүлэгч байгууллага, харилцагч арилжааны банк, Сангийн яамны хооронд; орон нутгийн төсвийн орлогын дансны талаар тухайн орон нутгийн татвар, гаалийн байгууллага, харилцагч арилжааны банк, Санхүү, эдийн засгийн бодлого, зохицуулалтын хэлтсийн дарга нар  гурвалсан гэрээ байгуулна. Энэхүү  гэрээ нь улсын төсвийн орлогын дансны тухайд Сангийн яамны Төрийн сангийн газраар хянуулан Сангийн сайдаар батлуулснаар, харин орон нутгийн төсвийн орлогын дансны тухайд аймаг, нийслэл, дүүргийн Санхүү, эдийн засгийн бодлого, зохицуулалтын хэлтсээр хянуулан аймаг, нийслэл, дүүргийн Засаг даргаар батлуулснаар хүчин төгөлдөр болно. Гэрээг жил бүр дүгнэж, гэрээний үүргийг хангалтгүй биелүүлсэн харилцагч арилжааны банктай байгуулсан гэрээг цуцалж, улмаар шаардлага хангахуйц харилцагч арилжааны банкыг сонгож ажиллана.

 

ЗУРГАА. ХЯНАЛТ ТАВИХ

 

            1.Төрийн сангийн бүртгэлийн данс нээсэн, эсхүл хаасан тухай шийдвэрийн жагсаалтыг төв төрийн сангийн дотоод аудитор сар бүр албан мэдэгдэлтэй тулган шалгаж, баримт үйлдэж байна.

            2.Харилцагч арилжааны банк сар бүр өөрийн банкинд байршиж буй төсвийн байгууллагын дансны жагсаалтыг төрийн санд хүргүүлж байх бөгөөд үүнийг зөвшөөрөл өгсөн дансны жагсаалттай тулган шалгаж байна.

 

 

 

 

 

*  *  *  *

 

 

 

 

 

 

 

 

 

 

 

 

 

 

Сангийн сайдын 2008 оны 5 дугаар сарын 1-ний өдрийн 180 дугаар  тушаалын хавсралтын Хүснэгт 1

 

 

1.      БҮРТГЭЛИЙН ДАНС НЭЭХ МАЯГТ

 

 

 

 

 

 

 

 

 

 

 

 

 

 

Сангийн сайдын 2008 оны 5 дугаар                                                                            сарын 1-ний өдрийн 180 дугаар                                                                                                                           тушаалын хавсралтын Хүснэгт 2

 

ТӨРИЙН САНГИЙН БҮРТГЭЛИЙН ДАНС НЭЭСЭН БҮРТГЭЛ

 

 

ТӨРИЙН САНГИЙН БҮРТГЭЛИЙН ДАНС ХААСАН ЖАГСААЛТ