Эрүүл мэндийн сайдын 2012 оны

5-р сарын 1-ний өдрийн 150 тоот

тушаалын хоёрдугаар хавсралт

Эрүүл мэндийн чиглэлээр мэргэжлийн үйл ажиллагаа эрхлэх

тусгай зөвшөөрлийн комиссын ажиллах удирдамж

Нэг. Нийтлэг үндэслэл

1.1.“Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрлийн комисс” нь Аж, ахуйн үйл ажиллагааны тусгай зөвшөөрлийн тухай хуулийн 15 дугаар зүйлийн 15.12, Эрүүл мэндийн тухай хуулийн 13 дугаар зүйлийн 13.4, 15 дугаар зүйл, 40, 41 дүгээр зүйл, Эм, эмнэлгийн хэрэгслийн тухай хуулийн 7 дугаар зүйлийн 7.1, 9 дүгээр зүйлийн 9.1 дэх хэсэгт тус тус заасан үйл ажиллагаа эрхлэх тусгай зөвшөөрөл олгох, сунгах, зөвшөөрлийг түдгэлзүүлэх, хүчингүй болгох, зөвшөөрөлд нэмэлт өөрчлөлт оруулах, тусгай зөвшөөрлийн комиссын дэргэд шинжээчээр ажиллах мэргэжлийн байгууллага, мэргэжилтнийг томилох үйл ажиллагааг удирдан зохион байгуулахад энэхүү удирдамжийг мөрдлөг болгоно.

1.2.“Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрлийн комисс” (цаашид “Комисс” гэх) нь үйл ажиллагаандаа Аж ахуйн үйл ажиллагааны тусгай зөвшөөрлийн тухай хуулийн 9 дүгээр зүйлээр тогтоосон зарчмаас гадна дор дурдсан зарчмыг баримтлан ажиллана. Үүнд:

• Хүн амын эрүүл мэндийн бодит хэрэгцээг үндэслэх;
• Тусламж, үйлчилгээ үзүүлэгчдээс зохиомлоор үүсгэх эрүүл мэндийн хэрэгцээ, санхүүгийн эрсдэлээс иргэдийг хамгаалах;
• Үйлчлүүлэгчдийн аюулгүй байдлыг хангах;
• Тусламж үйлчилгээний чанар, хүртээмжийг сайжруулах;
• Хувь хүний эдийн засгийн эрхийг хамгаалах;
• Төрийн үйлчилгээний ил тод, шуурхай, нээлттэй байдлыг хангах;
• Ашиг сонирхлын зөрчилгүй байх.

1.3.Энэхүү удирдамж нь Эрүүл мэндийн асуудал эрхэлсэн төрийн захиргааны төв болон төрийн захиргааны байгууллага, аймаг, нийслэлийн Засаг дарга (цаашид “Эрх бүхий байгууллага” гэх) нарын шийдвэрээр тус тус байгуулагдсан комисст хамаарна. Эрүүл мэндийн асуудал эрхэлсэн төрийн захиргааны төв байгууллагын дэргэдэх комисс нь бусад эрх бүхий байгууллагын комиссын үйл ажиллагаанд хяналт тавьж, мэргэжил арга зүйгээр хангана.

1.4.Эрх бүхий байгууллагаас томилогдсон комисс нь эрүүл мэндийн байгууллагад мэргэжлийн үйл ажиллагаа эрхлэх тусгай зөвшөөрөлтэй холбоотой өдөр тутмын үйл ажиллагааг гүйцэтгэх ажлын албатай байх ба дараах зохион байгуулалттай байна. Үүнд:

• Аймаг, нийслэлийн Засаг даргын дэргэдэх комиссын ажлын албаны үүргийг аймаг, нийслэлийн Эрүүл мэндийн газар,
• Эрүүл мэндийн яам болон Засгийн газрын хэрэгжүүлэгч агентлаг- Эрүүл мэндийн газрын дэргэдэх комиссын ажлын албаны үүргийг тус газрын эрүүл мэндийн байгууллагын тусгай зөвшөөрөл болон эмийн зохицуулалт хариуцсан нэгж.

1.5.Комиссын бүрэлдэхүүнд эрүүл мэндийн чиглэлээр үйл ажиллагаа эрхлэх тусгай зөвшөөрлийн бодлого, хэрэгжилт, зохицуулалт хяналтын чиг үүрэг бүхий төрийн захиргааны байгууллага болон иргэдийн эрх ашгийг илэрхийлэх төрийн бус байгууллагын төлөөллийг оролцуулах бөгөөд комиссын бүрэлдэхүүнийг эрх бүхий байгууллагын шийдвэрээр томилно.

1.6.Комисс нь 9 хүний бүрэлдэхүүнтэй, орон тооны бус байх ба дарга, нарийн бичгийн дарга, гишүүдээс бүрдэнэ. Комиссын нарийн бичгийн даргаар ажлын албаны тусгай зөвшөөрлийн асуудал хариуцсан мэргэжилтэн ажиллана.

1.7.Комисс нь үндсэн чиг үүргээ хэрэгжүүлэхдээ шинжээчдийг татан оролцуулах ба шинжээчээр эрүүл мэндийн асуудал эрхэлсэн төрийн захиргааны төв байгууллагын дэргэдэх мэргэжлийн салбар зөвлөл, төрийн захиргааны болон  төрийн бус байгууллагын төлөөлөл байна.

1.8.Шинжээчдийн бүрэлдэхүүнийг сонгон шалгаруулалтын үндсэн дээр эрүүл мэндийн асуудал эрхэлсэн төрийн захиргааны төв байгууллагын шийдвэрээр батлана. 

1.9.Комисс нь эрүүл мэндийн чиглэлээр үйл ажиллагаа эрхлэх тусгай зөвшөөрөл авсан байгууллагын бүртгэл, мэдээний сан үүсгэн ажиллуулна.

Хоёр. Комиссын чиг үүрэг, үйл ажиллагаа

2.1.Комисс нь дараах чиг үүргийг хэрэгжүүлнэ. Үүнд:

2.1.1.Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрөлтэй холбоотой ажлын албаны үйл ажиллагааг мэргэжил арга зүйгээр хангах;

2.1.2.Эрүүл мэндийн байгууллагын мэргэжлийн үйл ажиллагаа эрхлэх тусгай зөвшөөрлийн бодлого, зохицуулалт, эрх зүйн орчинг боловсронгуй болгох талаар санал боловсруулж, эрүүл мэндийн асуудал эрхэлсэн төрийн захиргааны төв байгууллагад уламжлах;

2.1.3.Үйлчлэх хүрээний хүн амын эрүүл мэндийн хэрэгцээ, шаардлагыг тодорхойлж, эрүүл мэндийн байгууллагад мэргэжлийн үйл ажиллагаа эрхлэх тусгай зөвшөөрөл олгоход баримтлах чиглэлийг 2 жил тутам гарган саналаа эрүүл мэндийн асуудал эрхэлсэн төрийн захиргааны төв байгууллагад хүргүүлэх;

2.1.4.Комисс нь тусгай зөвшөөрөл хүсэгчийн эрүүл мэндийн байгууллага байгуулах төслийн хэрэгцээ шаардлагыг тодорхойлохдоо дор дурдсан хүчин зүйлүүдийг харгалзан үзнэ:

• Хүн амын эрүүл мэндийн хэрэгцээ:
  • төслийг тухайн нутаг дэвсгэрт үйл ажиллагаа явуулж буй ижил төрлийн эрүүл мэндийн байгууллага, түүний ашиглалт (ажлын ачаалал)-тай харьцуулах;
  • үйлчлэх хүрээний хүн амын хэмжээ;
  • ядуу эмзэг бүлгийн хүн амд хүрч үйлчлэх байдал.
• Санхүү, эдийн засгийн хүчин зүйл:
  • төслийг эхэлж, дуусгахад хангалттай санхүүжилт байгаа эсэх;
  • төслийн өртөг үйлчлүүлэгчээс авах төлбөрийн хэмжээнд нөлөөлөх байдал;
  • улс, орон нутгийн  эрүүл мэндийн талаарх бодлого, стратегид туссан эсэх.
• Тусламж, үйлчилгээнд оруулах хувь нэмэр:

• удирдлагын болон мэргэжлийн үйл ажиллагааны шилдэг арга барилыг нэвтрүүлэх;
• нотолгоонд суурилсан дэвшитэт техник, технологийг нэвтрүүлэх;
• олон улсын стандарт, эмнэл зүйн удирдамж, үйлдвэрлэлийн технологийг нэвтрүүлэх;
• хүний нөөцийн мэргэшсэн байдал;
• эрүүл мэндийн салбарын өрсөлдөөнд нөлөөлөх байдал.

2.1.5.Эрүүл мэндийн байгууллагад мэргэжлийн үйл ажиллагаа эрхлэх тусгай зөвшөөрөл олгох эсэх талаар хэлэлцэн шийдвэр гаргаж, эрх бүхий байгууллагаар баталгаажуулах;

2.1.6.Мэргэжлийн хяналт, Татвар, Нийгмийн даатгал, Шударга өрсөлдөөн, хэрэглэгчийн төлөөх газар, Гадаадын иргэн, харьяатын асуудал эрхэлсэн алба болон бусад хууль хяналтын байгууллагын тодорхойлолт, тусгай зөвшөөрлийн комиссын хяналт, шалгалтын дүгнэлт, акт зэргийг үндэслэн эрүүл мэндийн байгууллагын тусгай зөвшөөрлийг түдгэлзүүлэх, хүчингүй болгох асуудлыг хэлэлцэн,  эрх бүхий байгууллагаар  шийдвэр гаргуулах.

2.2. Комиссын ажиллах хэлбэр нь хуралдаан байх ба гишүүдийн саналыг цахим ба цаасан хэлбэрээр авч болно.

2.3.Хуралдаанаар хэлэлцэх асуудлын төлөвлөгөөг комиссын дарга батлах ба шаардлагатай үед даргын шийдвэрээр төлөвлөгөөнд тусгагдаагүй асуудлыг нэмэлтээр хэлэлцэж болно. Комиссын хэлэлцэх үндсэн асуудал:

• Тусгай зөвшөөрөл хүсэгчийн шинээр байгуулах эрүүл мэндийн байгууллагын төсөл нь  эрүүл мэндийн тусламж, үйлчилгээний хэрэгцээ шаардлагад нийцэж байгаа эсэхийг тодорхойлж, албан ёсны хариуг өгөх;
• Тусгай зөвшөөрөл хүсэгчид шинжээчдийн гаргасан ажлын байрны дүгнэлтийг үндэслэн үйл ажиллагаа эрхлэх зөвшөөрөл олгох талаар шийдвэр гаргах.

2.4.Комиссын дарга хурлын дэгийг батална.

2.5.Нарийн бичгийн дарга комиссын даргын баталсан хурлын төлөвлөгөө, хурлаар хэлэлцэх асуудлын танилцуулгыг гишүүдэд хурал болохоос 3 хоногийн өмнө цахим ба цаасан хэлбэрээр хүргүүлсэн байна.

2.6.Комиссын хуралдааныг ажлын 21 хоногт 1 удаа хийнэ. Шаардлагатай тохиолдолд комиссын даргын санаачлагаар ээлжит бус хурал зарлан хуралдуулна.

2.7.Комиссын гишүүдийн 70-аас доошгүй хувь оролцсон тохиолдолд хурал хүчин төгөлдөр байна.

2.8.Комиссын гишүүд хурлаар хэлэлцэх асуудалтай бүрэн танилцаж, саналаа бэлтгэж ирэх ба оролцох боломжгүй тохиолдолд саналаа бичгээр ирүүлнэ. Шаардлагатай гэж үзвэл хэлэлцэх асуудлын хүрээнд комиссын хуралдаанд холбогдох мэргэжилтэн болон шинжээч, тусгай зөвшөөрөл хүсэгч аж ахуйн нэгж байгууллага, иргэнийг оролцуулна.

2.9.Комисс нь хэлэлцсэн асуудлаар санал боловсруулж, тэмдэглэл хөтөлнө. Тэмдэглэлд комиссын гишүүд гарын үсэг зурж баталгаажуулна.

2.10.Тусгай зөвшөөрөл олгосон эрүүл мэндийн байгууллагын үйл ажиллагаанд мэргэжлийн байгууллагатай хамтран болон дангаар хяналт хийх, хэрэглэгчдийн зүгээс гаргасан гомдол, маргааныг шийдвэрлэнэ.

Гурав. Ажлын албаны чиг үүрэг

Ажлын алба нь дараах чиг үүргийг хэрэгжүүлнэ. Үүнд:

1. Тусгай зөвшөөрөл хүсэгчийн баримт бичгийн бүрдэлтийг хянаж, бэлтгэсэн ажлын байранд үнэлгээ хийх ажлыг зохион байгуулан, дүнг комиссын хуралдаанаар хэлэлцүүлэх;
2. Шаардлагатай тохиолдолд холбогдох байгууллагатай харилцаж, тусгай зөвшөөрөл хүсэгчийн бүрдүүлсэн баримт бичиг болон бэлтгэсэн ажлын байртай холбоотой мэдээлэл, лавлагааг холбогдох байгууллага, албан тушаалтнаас гаргуулан авах;
3. Тусгай зөвшөөрлийн нөхцөл шаардлагын талаар холбогдох хууль эрх зүйн баримт бичиг, олон улсын туршлага, мэдээллийг нягтлан судалж, тусгай зөвшөөрлийн шаардлагыг шинэчлэх сайжруулах санал дэвшүүлэх. Мөн ажлын байрны үнэлгээний арга аргачлал, үнэлгээнд ашиглах шалгах хуудсыг боловсруулан хэрхэн ашиглах талаар шинжээч нарыг сургах,  арга зүйн дэмжлэг үзүүлэх
4. Тусгай зөвшөөрөл авсан эрүүл мэндийн байгууллагын үйл ажиллагаа, тусгай зөвшөөрлийн нөхцөл шаардлагын хэрэгжилтэд явцын хяналт тавих;
5. Шударга өрсөлдөөн, хэрэглэгчийн төлөө газар, Мэргэжлийн хяналтын байгууллага, Улсын бүртгэлийн ерөнхий газар, Гадаадын иргэн, харьяатын асуудал эрхэлсэн алба, хууль хяналтын бусад байгууллага, Эрүүл мэндийн яамны мэргэжлийн салбар зөвлөл, төрийн бус байгууллагуудтай хамтран ажиллаж, харилцан мэдээлэл солилцох;
6. Тусгай зөвшөөрөл бүхий эрүүл мэндийн байгууллагуудын бүтэц, үйл ажиллагаатай холбоотой бүртгэл, мэдээллийн санг хөтлөж, тогтмол баяжуулах;
7. Эрүүл мэндийн чиглэлээр үйл ажиллагаа эрхлэх байгууллагын тусгай зөвшөөрөл авахад бүрдүүлсэн баримт бичигт орсон нэмэлт өөрчлөлтийг комиссын шийдвэрийг үндэслэн гэрчилгээнд бичилт хийж тэмдэглэх;
8. Тусгай зөвшөөрлийн гэрчилгээний маягтыг хэвлүүлэх ажлыг зохион байгуулах ба тус тушаалаар батлагдсан зааврын дагуу тусгай зөвшөөрлийн гэрчилгээг хөтөлж, дугаарлах;
9. Улсын тэмдэгтийн хураамжийг тусгай зөвшөөрөл хүсэгчээс баримтын хамт авч, тайланг хугацаанд нь гарган харьяа орон нутгийн татварын байгууллагад хүргүүлэх.
10. Энэхүү тушаалын 3.8-д заасан хураамжийг Улсын тэмдэгтийн хураамжийн тухай хуулийн 27 дугаар зүйлд заасан төлбөрийн дээд хэмжээг тусгай зөвшөөрөл олгоход, доод талын хэмжээг тусгай зөвшөөрлийг сунгаж олгоход хураах.

Дөрөв. Шинжээчийн чиг үүрэг

1. Эрх бүхий байгууллагаас томилогдсон шинжээчид нь дараах чиг үүргийг хэрэгжүүлнэ. Үүнд:

1. Ажлын албанаас баталсан удирдамжийн дагуу тусгай зөвшөөрөл хүсэгчийн бүрдүүлсэн баримт бичигтэй танилцах;  
2. Тусгай зөвшөөрөл хүсэгчийн ажлын байрны бүтэц, үйл ажиллагаа нь холбогдох улсын стандарт, эмнэл зүйн удирдамж, үйдвэрлэлийн технологийн горимын шаардлага хангаж буй эсэхэд газар дээр нь хяналт, үнэлгээ хийн, холбогдох дүгнэлтийг гаргах;
3. Ажлын байранд тавигдах улсын стандартын шаардлага, шалгуурыг хангахтай холбоотой мэргэжил арга зүйн зөвлөгөө өгөх, тусгай зөвшөөрөл хүсэгчээс шаардлагатай мэдээллийг гаргуулан авах, зураг авалт хийх;
4. Тусгай зөвшөөрөл бүхий эрүүл мэндийн байгууллагын тусгай зөвшөөрлийн нөхцөл шаардлагын хэрэгжилтэд явцын хяналт хийхэд оролцох,
5. Тусгай зөвшөөрлийн хугацааг сунгах, зөвшөөрөлд нэмэлт өөрчлөлт хийхтэй холбоотой ажлын байрны нөхцөлд хяналт хийх, дүгнэлт гаргах;
6. Тусгай зөвшөөрлийн нөхцөл шаардлагын талаар холбогдох хууль эрх зүйн баримт бичиг, олон улсын туршлага мэдээлэлтэй танилцаж, мэдлэг чадвараа дээшлүүлдэг байх.

1. Шинжээчийг сонгохдоо дараах шалгуурыг үндэслэнэ. Үүнд:

1. Мэргэжлийн болон эрдмийн зэрэг цолтой;
2. Тухайн мэргэжлээрээ 5-аас доошгүй жил ажиллаж мэргэшсэн, байгууллагын удирдлага, зохион байгуулалтаар ажлын дадлага, туршлагатай;
3. Эрүүл мэндийн байгууллагуудын бүтэц, үйл ажиллагаанд үнэлгээ, дүгнэлт өгөх, багаар ажиллах чадвартай;
4. Тусгай зөвшөөрлийн нөхцөл, шаардлагын талаар мэдлэгтэй байх;
5. Гэмт хэрэгт холбогдож байгаагүй;
6. Ашиг сонирхлын зөрчилгүй.

1. Шинжээчийг дараах байдлаар сонгон, томилон ажиллуулна:

1. Шинжээчийг сонгон шалгаруулах, гэрээ байгуулахыг  Эрүүл мэндийн асуудал эрхэлсэн төрийн захиргааны төв байгууллага, шинжээчдийг сургаж мэргэшүүлэх, арга зүйн зөвлөмжөөр хангах, томилох, урамшуулал олгох ажлыг Засгийн газрын хэрэгжүүлэгч агентлаг- Эрүүл мэндийн газар гүйцэтгэнэ. 
2. Шинжээчийн сонгон шалгаруулалтын зарыг олон нийтийн хэвлэл, мэдээллийн хэрэгслээр сонгон шалгаруулах ажиллагаанаас 21 хоногийн өмнө зарлах ба эрүүл мэндийн асуудал эрхэлсэн төрийн захиргааны төв байгууллагаас  томилогдсон ажлын хэсэг зохион байгуулна.
3. Сонгон шалгаруулалтад тэнцсэн шинжээчтэй 2 жилийн хугацаагаар гэрээ байгуулж, үнэмлэх олгоно.
4. Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрөл авахад бүрдүүлэх баримт бичиг болон ажлын байранд тавигдах шаардлага, шалгуур, тэдгээрийг үнэлэх, дүгнэлт гаргахтай холбоотой сургалтад шинжээчдийг хамруулна.
5. Тусгай зөвшөөрөл хүсэгчийн ажлын байранд үнэлгээ хийх хуваарийг урьдчилан гаргаж, шинжээчид мэдэгдэн, удирдамж болон шалгах хуудсаар хангаж томилон ажиллуулна.
6. Шинжээчид тусгай зөвшөөрөл хүсэгчийн ажлын байрны үнэлгээ, хяналтад оролцсон хугацаа, ажлын үр дүнг харгалзан эрх бүхий байгууллага зохих урамшуулал олгоно.

Тав. Комисс, ажлын алба, шинжээчийн ашиг сонирхлын

зөрчлийн шийдвэрлэлт

1. Комисс, ажлын албаны бүрэлдэхүүний болон түүнийг төлөөлөх этгээдийн эцэг эх, эхнэр нөхөр, ах эгч, дүү, хүүхэд, найз нөхөд тусгай зөвшөөрөл эзэмших өргөдөл гаргагчаар оролцож байгаа тохиолдолд ил зарлан, шийдвэр гаргах, санал хураахад оролцохоос сайн дураар татгалзаж, урьдчилан мэдэгдэнэ.
2. Шинжээч нь тусгай зөвшөөрөл хүсэгч иргэн, хуулийн этгээдтэй нэгдмэл сонирхолтой байж болохгүй бөгөөд тусгай зөвшөөрөл хүсэгч нь шинжээчийн эцэг эх, эхнэр нөхөр, ах эгч, дүү, хүүхэд, найз нөхөд байх тохиолдолд шинжилгээ хийхээс сайн дураар татгалзаж, урьдчилан мэдэгдэл гаргана.
3.  Комисс, ажлын алба, шинжээчдийн бүрэлдэхүүналбан үүргээ гүйцэтгэхэд хөндлөнгөөс нөлөөлсөн аливаа дарамт шахалт, зохимжгүй нөлөөллийн талаар холбогдох хуульд заасны дагуу арга хэмжээг авч хэрэгжүүлбэл зохино.

Зургаа. Тусгай зөвшөөрөл олгох, сунгах, хянах, түдгэлзүүлэх,

хүчингүй болгох үйл ажиллагаа

1. Тусгай зөвшөөрлийг олгох үйл ажиллагааг дараах байдлаар зохион байгуулна. Үүнд:

1. Ажлын алба нь энэхүү тушаалын нэгдүгээр хавсралтын 2.1-д заасан баримт бичгийг цахим хэлбэрээр хүлээн авч, комиссоор хэлэлцүүлэн эрүүл мэндийн байгууллага байгуулах хэрэгцээг ажлын 10 хоногт тодорхойлж, албан ёсны хариуг тусгай зөвшөөрөл хүсэгчид хүргүүлнэ.
2. Тусгай зөвшөөрөл хүсэгчийн ажлын байр бэлэн болсны дараа энэхүү тушаалын нэгдүгээр хавсралтын 2.2-д заасан баримт бичгийг цаасан хэлбэрээр хүлээн авч, ажлын байранд үнэлгээ хийх шинжээчдийг  сондгой тоон бүрэлдэхүүнтэйгээр сонгож, ажлын удирдамж, шалгах хуудсаар хангана.
3. Шинжээчид нь томилогдсоноосоо хойш ажлын 5 хоногт багтаан тусгай зөвшөөрөл хүсэгчийн  баримт бичигтэй танилцан, бэлтгэсэн ажлын байрыг улсын стандарт, тусгай зөвшөөрлийн шалгуурын дагуу газар дээр нь үнэлэн дүнг комиссын ажлын албанд ирүүлнэ.
4. Хэрэв баримт бичиг хангалтгүй, дутуу эсвэл хуурамч баримт бичиг бүрдүүлсэн бол хүсэлтийг хүчингүй болгож тусгай зөвшөөрөл олгохгүй байна.
5. Шинжээчдийн дүгнэлт ирснээс хойш ажлын 10 хоногт багтаан комиссын хуралдаанаар хэлэлцүүлнэ.
6. Комисс нь эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрөл олгоход баримтлах чиглэлийг харгалзан, шинжээчдийн гаргасан дүгнэлтийг үндэслэн зөвшөөрөл олгох эсэх талаар шийдвэр гаргана.
7. Комиссын гаргасан шийдвэрийг үндэслэн эрх бүхий байгууллага баталгаажуулна.
8. Ажлын алба нь эрх бүхий байгууллагын шийдвэрийг үндэслэн тусгай зөвшөөрлийн гэрчилгээнд бичилт хийн, комиссын даргаар гарын үсэг зуруулж, аж ахуйн нэгжид олгоно.
9. Тусгай зөвшөөрөл олгоогүй шийдвэрийг тусгай зөвшөөрөл хүсэгчид албан бичгээр ажлын 3 хоногт багтаан мэдэгдэнэ.

1. Тусгай зөвшөөрлийн нөхцөл шаардлагад хяналт тавих, тусгай зөвшөөрлийг түдгэлзүүлэх, хүчингүй болгох үйл ажиллагааг дараах байдлаар зохион байгуулна. Үүнд:

1. Ажлын алба нь тусгай зөвшөөрөл олгосон эрүүл мэндийн байгууллагын үйл ажиллагаанд тавих хяналтыг Төрийн хяналт шалгалтын тухай хуулийн 5 дугаар зүйлд заасан чиг үүргийн дагуу гүйцэтгэнэ.
2. Эрүүл мэндийн байгууллагад тусгай зөвшөөрөл олгосноос хойш 6 сарын дотор бүтэц, үйл ажиллагааны хэрэгжилтэд хяналт хийж, хяналтаар илэрсэн зөрчлийг арилгуулах зөвлөмж өгнө.
3. Тусгай зөвшөөрөл авч эхний 6 сарын хугацаанд үйл ажиллагаа нь тогтворжсон эрүүл мэндийн байгууллагын тусгай зөвшөөрлийн нөхцөл шаардлагад тусгай зөвшөөрлийн хугацааг сунгах хүртэл жил бүр явцын хяналт хийж, дүгнэлт гаргана.
4. Эрх бүхий байгууллага болон мэргэжлийн хяналтын байгууллагын хяналт шалгалтын дүгнэлтээр тусгай зөвшөөрөл авснаас хойш 6 сарын дотор үйл ажиллагаагаа эхлүүлээгүй, тусгай зөвшөөрлийн нөхцөл шаардлага болон шударга өрсөлдөөний зарчим, хэрэглэгчийн эрх ашгийг удаа дараа ноцтой зөрчсөн, тусгай зөвшөөрлийг хуулийн хугацаанд сунгуулаагүй байгууллагын тусгай зөвшөөрлийг түдгэлзүүлэх, хүчингүй болгох асуудлыг комиссын хуралдаанаар хэлэлцүүлж, шийдвэрийг эрх бүхий байгууллагаар баталгаажуулна.

1. Тусгай зөвшөөрлийг сунгах, тусгай зөвшөөрөлд нэмэлт өөрчлөлт хийх үйл явцыг дараах байдлаар зохион байгуулна. Үүнд:

1. Ажлын алба нь сар бүр тусгай зөвшөөрлийн хугацаа дуусч байгаа эрүүл мэндийн байгууллагын тусгай зөвшөөрлийн нөхцөл шаардлагын хэрэгжилтийн талаарх мэдээллийг холбогдох байгууллагуулаас авсан байвал зохино.  
2. Тусгай зөвшөөрлийн нөхцөл шаардлагад хийсэн хяналт шалгалт болон мэргэжлийн хяналтын байгууллагын дүгнэлтээр тусгай зөвшөөрлийг түдгэлзүүлэх, хүчингүй болгох санал гараагүй байгууллагын тусгай зөвшөөрлийг сунгуулах хүсэлт гаргаснаас хойш ажлын 3 хоногт багтаан комиссын даргын шийдвэрээр сунгалт хийнэ. 
3. Эрүүл мэндийн байгууллагын хуулийн этгээдийн нэр, үүсгэн байгуулагчийн болон хүний нөөцийн бүрэлдэхүүнд өөрчлөлт орох тохиолдолд хүсэлт гаргаснаас хойш ажлын 3 хоногт багтаан комиссын даргын шийдвэрээр тусгай зөвшөөрлийн гэрчилгээнд нэмэлт хийнэ. 
4. Тус тушаалын 5.3.3-т зааснаас бусад ажлын байрны хаяг өөрчлөгдөх, бүтцэд нэмэлт өөрчлөлт оруулах, тусгай зөвшөөрөл эзэмшигч өөрчлөгдөх тохиолдолд тусгай зөвшөөрөл олгох үйл ажиллагааны нэгэн адилаар зохион байгуулж, комиссын хуралдаанаар шийдвэрлэнэ.  

Долоо. Тусгай зөвшөөрлийг мэдээлэх

1. Ажлын алба нь тусгай зөвшөөрөл олгосон, сунгасан, түдгэлзүүлсэн, хүчингүй болгосон, нэмэлт өөрчлөлт оруулсан эрүүл мэндийн байгууллагын талаарх мэдээллийг зөвшөөрлийн мэдээний санд бүртгэн, цахим хуудас (http:www. moh.mn)-ны эрүүл мэндийн салбарын тусгай зөвшөөрөл, импортын зөвшөөрлийн интернэтэд суурилсан (licemed) цахим бүртгэлийн программд байршуулна.
2. Тусгай зөвшөөрөл бүхий эрүүл мэндийн байгууллагын нэгдсэн мэдээллийн сангийн тогтвортой үйл ажиллагааг Засгийн газрын хэрэгжүүлэгч агентлаг-Эрүүл мэндийн газар бүрэн хариуцна.

Найм. Тусгай зөвшөөрлийн гэрчилгээг хөтлөх, дугаарлах

1. Комиссын ажлын алба нь тусгай зөвшөөрлийн гэрчилгээг дор дурдсан зааврын дагуу дугаарлана. Үүнд:

1. Гэрчилгээний дугаар нь үндсэн гурван хэсгээс бүрдэнэ. Эхний хэсэгт үйл ажиллагааны төрөл, чиглэлийг заасан үсгэн код, хоёрдугаар хэсэгт зөвшөөрөл олгосон оныг илтгэх хоёр тоо, гуравдугаар хэсэгт эрх бүхий байгууллагын код, дөрөвдүгээр хэсэгт тусгай зөвшөөрлийн дугаарыг нэгж, аравт, зуут, мянгатын оронтой тоогоор тэмдэглэнэ. Үсгэн кодыг тасалсан богино зураасаар, тоон хэсгийг тасалсан ташуу зураасаар зааглана. Тухайлбал:       ЭХ-09/01/01, ЭХ-10/22/133, ТХ-09/24/13676.
2. Үсгэн код нь тусгай зөвшөөрлөөр эрхлэх үйл ажиллагааны төрөл болон эрүүл мэндийн байгууллагын өмчийн хэлбэрийг тодорхойлсон 2 үсэгтэй байна. Тусгай зөвшөөрөл олгоход дараах үсгэн кодыг ашиглана:

1. Хоёрдугаар хэсэг нь аж ахуйн нэгжид тусгай зөвшөөрөл олгосон оныг илтгэнэ. Ингэхдээ оны сүүлийн хоёр тоог ашиглана. Тухайлбал: 2003 оныг 03, 2009 оныг 09 гэж тэмдэглэнэ.
   1. Гуравдугаар хэсэгт аймаг, нийслэлийн кодыг тэмдэглэнэ. Жишээ нь: ЭХ- 09/05/01, ЭУ-10/23/198

1. Дөрөвдүгээр хэсэг нь олгосон гэрчилгээний дугаар байна.

1. Тусгай зөвшөөрлийн гэрчилгээг дараах байдлаар хөтөлнө. Үүнд:

1. Гэрчилгээний өвөр талд тусгай зөвшөөрөл олгосон эрх бүхий байгууллага, аж ахуйн нэгжийн нэр, эрхлэх үйл ажиллагааны төрөл, үйл ажиллагаа явуулах нутаг дэвсгэр, хаяг, хүчинтэй байх хугацаа, тусгай зөвшөөрөл олгосон огноо, дугаар, улсын бүртгэлийн болон гадаадын хөрөнгө оруулалтын гэрчилгээний дугаар зэргийг бичиж тэмдэглэнэ.
2. Гэрчилгээг олгосон он сар, өдөр гэсэнд комиссын шийдвэрийг үндэслэн гаргасан Эрүүл мэндийн сайдын болон Засгийн газрын хэрэгжүүлэгч агентлаг Эрүүл мэндийн газрын даргын тушаал, аймаг, нийслэлийн Засаг даргын захирамжийн огноог тэмдэглэнэ.
3. Тусгай зөвшөөрөл олгосон байгууллага гэсэнд Аж ахуйн үйл ажиллагааны тусгай зөвшөөрлийн болон Эрүүл мэндийн тухай хууль тогтоомжоор олгогдсон эрх бүхий байгууллагын нэр байна.
4. Байгууллагын нэр гэсэнд эрүүл мэндийн чиглэлээр аж ахуйн үйл ажиллагаа эрхлэх тусгай зөвшөөрөл авсан хуулийн этгээдийн нэрийг бичнэ.
5. Тусгай зөвшөөрөл эзэмшигчийн нэр гэсэнд тухайн эрүүл мэндийн байгууллагыг үүсгэн байгуулагчийн нэрийг бичнэ.
6. Үйл ажиллагааны чиглэлд холбогдох хууль тогтоомжид заасан тусгай зөвшөөрлийн үндсэн дээр эрхлэх үйл ажиллагааны ерөнхий төрлийг зааж, тухайн байгууллагын тусгайлан эрхлэх үйл ажиллагааны чиглэлийг  хаалтанд оруулан бичиж тэмдэглэнэ.
7. Үйл ажиллагаа явуулах нутаг дэвсгэр гэсэнд тухайн байгууллагын үйл ажиллагааны хамрах хүрээг заана.
8. Байгууллагын албан ёсны хаяг гэсэнд тухайн эрүүл мэндийн байгууллагын байршлын хаягийг бичиж тэмдэглэнэ.
9. Улсын бүртгэлийн гэрчилгээний дугаарт тухайн хуулийн этгээдийг бүртгэсэн гэрчилгээний болон регистрийн дугаарыг бичнэ.
10. Тусгай зөвшөөрөл эзэмшигч байгууллага нь гадаадын хөрөнгө оруулалттай аж ахуйн нэгж байх тохиолдолд зохих байгууллагаас олгосон гэрчилгээний дугаарыг бичиж тэмдэглэнэ.
11. Гарын үсэг хэсэгт комиссын дарга гарын үсэг зурна.
12. Гэрчилгээний ар талд эрүүл мэндийн чиглэлээр үйл ажиллагаа эрхлэх тусгай зөвшөөрөл авахад бүрдүүлсэн баримт бичигт оруулсан нэмэлт, өөрчлөлт болон тусгай зөвшөөрлийн хугацааг сунгасан талаарх бүртгэл, мэдээллийг комиссын шийдвэрийг тус тус үндэслэн бичиж тэмдэглэнэ.
13. Тусгай зөвшөөрлийн гэрчилгээнд эрүүл мэндийн байгууллагын бүтэц, үйл ажиллагааны улсын стандартын шалгуурт хийсэн шинжээчийн хэсгийн үнэлгээний дүнг хавсаргана.

1. Гэрчилгээг дор дурдсан зааврын дагуу хэвлэнэ. Үүнд:

1. Гэрчилгээг хэвлэлийн байгууллагатай гэрээ байгуулан хэвлүүлнэ.
2. Гэрчилгээ нь өвөр, ар талтай байна. Гэрчилгээний өвөр талд тусгай зөвшөөрөл олгосон байгууллага, аж ахуйн нэгжийн нэр, эрхлэх үйл ажиллагааны төрөл, нутаг дэвсгэр, хаяг, хүчинтэй байх хугацаа, олгосон огноо, дугаар, улсын бүртгэлийн болон гадаадын хөрөнгө оруулалтын гэрчилгээний дугаар, комиссын даргын гарын үсэг, тамга зэргийг тус тус багтаана. Ар талд эрүүл мэндийн чиглэлээр үйл ажиллагаа эрхлэх тусгай зөвшөөрөл авахад бүрдүүлсэн баримт бичигт оруулсан нэмэлт өөрчлөлт болон тусгай зөвшөөрлийн хугацааг сунгасан талаарх бүртгэл, мэдээлэл тусгагдана.
3. Гэрчилгээний өвөр талыг дөрвөн буландаа хээ, угалзтай ногоон өнгийн хүрээтэй, ар талыг хүрээгүй, өвөр талын зүүн дээд хэсэгт нууцлалын ил тэмдэгтэй байхаар хэвлүүлнэ.

Ес. Хариуцлага

1. Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрөл олгох, сунгах, түдгэлзүүлэх, хүчингүй болгохтой холбоотой энэхүү журмыг зөрчсөн аж ахуйн нэгж байгууллага, эрүүл мэндийн байгууллага, эрх бүхий байгууллагын холбогдох албан тушаалтанд хууль тогтоомжид заасны дагуу хариуцлага хүлээлгэнэ.