Засгийн газрын 2014 оны 88 дугаар
                                                                             тогтоолын 2 дугаар хавсралт

ГАДААДЫН ЗАХ ЗЭЭЛД БОРЛУУЛСАН НҮҮРСЭНД АШИГТ
МАЛТМАЛЫН НӨӨЦ АШИГЛАСНЫ ТӨЛБӨР НОГДУУЛАХ
БОРЛУУЛАЛТЫН ҮНЭЛГЭЭ ТООЦОХ АРГАЧЛАЛ

  
Нэг. Ерөнхий зүйл

   Ашигт малтмалын тухай хуулийн 47.2.3-т заасны дагуу гадаадын зах зээлд борлуулсан нүүрсэнд зах зээлийн жишиг үнийг тодорхойлох боломжгүй тохиолдолд ашигт малтмалын нөөц ашигласны төлбөр ногдуулах борлуулалтын үнэлгээг тооцоход энэ аргачлалыг мөрдлөг болгоно.

Хоёр. Нүүрсний борлуулалтын үнэлгээг тооцох

2.1. Аж ахуйн нэгжийн экспортолсон бүх төрлийн нүүрсэнд ногдуулах ашигт малтмалын нөөц ашигласны төлбөр тооцох борлуулалтын үнэлгээг экспортлох борлуулалтын гэрээг үндэслэн энэхүү аргачлалын 2.3, 2.5-д заасан аргаар тооцно.

2.2. Экспортолсон нүүрсний ашигт малтмалын нөөц ашигласны төлбөр ногдуулах борлуулалтын үнэлгээ нь Монгол Улсын хилийн өртөө хүртэл бараа нийлүүлэх нөхцөлөөр тодорхойлогдоно.

2.3. Энэхүү журмын 2.2-т заасан нөхцөлийг Гаалийн тариф, гаалийн татварын тухай хуулийн 17 дугаар зүйлд заасан хэлцлийн үнийн аргаар тодорхойлно.

2.4. Хэлцлийн үнийн аргаар борлуулалтын үнэлгээг тодорхойлоход гэрээний үнэд нүүрсийг Монгол Улсын хилийн өртөө хүртэл хүргэхэд дараах зардал, төлбөр ороогүй бол түүнийг нэмж тооцно:

     2.4.1. тээврийн зардал;

     2.4.2. тээвэрлэлтийн үйл ажиллагаатай холбоотой тээврийн болон экспортын бичиг баримт, бүрдүүлэлтийн хураамж, даатгалын шимтгэл, түүнчлэн барааг ачих, буулгах, хадгалах, шилжүүлэн ачих зардал.

2.5. Аж ахуйн нэгжийн тухайн сард экспортолсон нүүрсний энэхүү аргачлалын дагуу тодорхойлсон борлуулалтын үнэ нь ижил ангилал, стандарт, чанар бүхий нүүрсийг хилийн ижил боомтоор тухайн сард экспортолж буй бусад аж ахуйн нэгжийн энэ журмын дагуу тодорхойлсон үнээс 10 ба түүнээс дээш хувиар зөрүүтэй байвал Татварын ерөнхий хуулийн 48 дугаар зүйлд заасны дагуу бодит бус үнэ гэж үзэн ашигт малтмалын нөөц ашигласны төлбөр ногдуулах борлуулалтын үнэлгээг шууд бус аргаар буюу жишиг үнэ хэрэглэж тодорхойлно.

Гурав. Гэрээнд тавигдах шаардлага

3.1. Энэхүү журмын 2.1-д заасан гэрээ нь дараах нөхцөл, шаардлагыг хангасан байвал зохино. Үүнд:

     3.1.1. экспортолсон нүүрс, нүүрсэн бүтээгдэхүүний үнэ, тоо хэмжээг тодорхой тусгасан байх;

     3.1.2. Монгол Улс болон экспортоор гаргах улсад мөрдөгдөж буй нүүрс, нүүрсэн бүтээгдэхүүний төрөл, чанар, ангиллын талаархи мэдээллийг агуулсан байх;

     3.1.3. худалдааны болон тээвэр, даатгалын нөхцөлийг заасан байх;

     3.1.4. экспортын баримт бичиг, бүрдүүлэлтийн хураамж, бараа ачих, буулгах, хадгалах, шилжүүлэн ачихтай холбогдон гарах зардлыг хариуцах нөхцөлийг тусгасан байх;

     3.1.5. төлбөрийн нөхцөл, төлбөр хүлээн авах, шилжүүлэх дансны мэдээллийг тусгасан байх;

     3.1.6. гэрээлэгч талуудын мэдээллийг тусгасан байх;

     3.1.7 хэрэв туслан гүйцэтгэгчийн ажил, үйлчилгээ авч байгаа тохиолдолд тус гэрээг хавсаргана.

3.2. Энэхүү журмын 2.1-д заасан гэрээ нь 3.1-д заасан нөхцөл, шаардлагыг хангаагүй тохиолдолд экспортолсон нүүрсний борлуулалтын үнэлгээг энэ аргачлалын 2.5-д заасны дагуу тодорхойлно.

3.3. Гэрээ, түүнийг дагалдах санхүүгийн болон холбогдох бусад баримт бичгийг монгол хэл дээр үйлдэж татварын албанд ирүүлнэ. Хэрэв баримт бичгийг монгол хэл дээр үйлдээгүй бол монгол хэл дээрх албан ёсны орчуулгыг эх баримт бичигт хавсаргаж өгөх бөгөөд орчуулахтай холбогдсон зардлыг татвар төлөгч өөрөө хариуцна.

Дөрөв. Хяналт тавих

4.1. Санхүү, татварын болон уул уурхайн асуудал эрхэлсэн төрийн захиргааны төв байгууллага, татвар, гааль, ашигт малтмалын асуудал эрхэлсэн төрийн захиргааны байгууллага, салбарын мэргэжлийн холбоод нь олон улсын зах зээл дээрх нүүрсний үнийн мэдээллийг холбогдох албан ёсны эх сурвалжаас авч, нүүрсний үнийн хөдөлгөөн, өсөлт, бууралтад сар бүр хийсэн дүн шинжилгээнд үндэслэн нүүрсний борлуулалтын үнэлгээнд хамтран хяналт тавина.

4.2. Нүүрс экспортлогч нь экспортын нүүрсний лабораторийн шинжилгээний дүгнэлтийг 7 хоног тутам гаалийн төв байгууллагад хүргүүлнэ. Гаалийн төв байгууллага нь нүүрс экспортлогчийн ирүүлсэн шинжилгээний дүгнэлтэд хяналт тавьж ажиллах бөгөөд 2 сард 1-ээс доошгүй удаа хяналтын дээжийг авч дүгнэлт гаргана.   

4.3. Гаалийн төв лаборатори Монгол Улсын итгэмжлэгдсэн лабораторийн шинжилгээний дүнг үндэслэн энэхүү журмын 4.2-т заасан дүгнэлт гаргана. Нүүрс экспортлогч аж ахуйн нэгжийн шууд ба шууд бусаар эзэмшдэг лабораторийн шинжилгээний дүнд үндэслэж гаалийн лабораторийн дүгнэлт гаргасан тохиолдолд Гаалийн төв байгууллагаас тухайн хяналтын дээжийг өөр бусад итгэмжлэгдсэн лабораториор шинжлүүлж, үр дүнг харьцуулан, шаардлагатай тохиолдолд хяналт тавьж ажиллана.

4.4. Гаалийн төв байгууллага нь нүүрс экспортлогч аж ахуйн нэгжийн тухайн сард экспортолсон нүүрсний лабораторийн дүгнэлтийг нэгтгэн татварын албанд дараа сарын 5-ны дотор хүргүүлж байна.

4.5. Экспортын нүүрс, нүүрсэн бүтээгдэхүүний агуулга, түүний хувь, найрлага, чанар, ангиллыг гаалийн төв лабораторийн дүгнэлтээр тогтооно.

4.6. Энэхүү журмын 4.1-д заасны дагуу төрийн байгууллагууд хамтран ажиллах, харилцан мэдээлэл солилцох, хяналт тавих нарийвчилсан журмыг татвар, гааль, ашигт малтмалын асуудал эрхэлсэн төрийн захиргааны байгууллагын дарга нар хамтран батална.

Тав. Мэдээ, тайлан, тайлбар хүргүүлэх

5.1. Нүүрс экспортлогч аж ахуйн нэгж дараах мэдээллийг сар бүрийн 10-ны дотор харьяалах татварын албанд хавсралтад заасан маягтын хамт ирүүлнэ. 

     5.1.1. өмнөх сард экспортолсон нүүрс, нүүрсэн бүтээгдэхүүний тоо хэмжээ, төрөл, ангилал, чанарын үзүүлэлт;

     5.1.2. худалдан авагчтай байгуулсан гэрээний хувь, нэмэлт, өөрчлөлтийн хамт;

     5.1.3. гэрээнд заасан борлуулалтын үнийг тохиролцсон үндэслэл, тооцоолол, нөхцөл;

     5.1.4. нүүрс худалдан авагчийн албан ёсны нэр, бүртгэлийн дугаар, байнга оршин суугаа хаяг;

     5.1.5. нүүрс худалдан авагчтай шууд болон шууд бусаар харилцан хамааралтай эсэх талаар мэдээлэл, тодруулга;

     5.1.6. энэхүү журмын 2.4-т заасан зардлын талаархи дэлгэрэнгүй мэдээлэл, баримт;

     5.1.7. төлбөрийн нөхцөл, үнийн нэхэмжлэл;

     5.1.8. өмнөх сард экспортолсон нүүрс, нүүрсэн бүтээгдэхүүнийг олборлосон уурхайн талбайн талаар болон түүнд хамаарах ашиглалтын тусгай зөвшөөрлийн мэдээлэл;    

     5.1.9. өмнөх сард экспортолсон нүүрсний чанарын үзүүлэлтийг тодорхойлсон Монгол Улсын итгэмжлэгдсэн лабораторийн шинжилгээний дүн, гаалийн төв лабораторийн дүгнэлт.

5.2. Татварын алба зайлшгүй шаардлагатай гэж үзсэн нэмэлт мэдээлэл, баримт материал, тайлбар, танилцуулга гаргуулан авах эрхтэй.

---о0о---
 

Засгийн газрын 2014 оны 88 дугаар тогтоолоор баталсан

“Гадаадын зах зээлд борлуулсан нүүрсэнд ашигт

малтмалын нөөц ашигласны төлбөр ногдуулах

борлуулалтын үнэлгээ тооцох аргачлал”-ын хавсралт

Нүүрс экспортлогч аж ахуйн нэгжийн

нүүрсний борлуулалтын мэдээлэл

1. Антрацит    1.1. Түүхий болон баяжуулсан антрацит

                        1.2. Түүхий болон баяжуулсан хагас антрацит

Тайлбар:

1. Мэдээлэл гаргагч нь экспортолсон, экспортлохоор ачуулсан нүүрсний төрөл тус бүрээр энэ хүснэгтийн мэдээллийг гаргана.

2. Энэхүү мэдээлэлд өөрийн компанийн болон Гаалийн төв лабораторийн дүгнэлтийг хавсаргана.

2. Чулуун нүүрс          2.1. Түүхий болон баяжуулсан коксжих нүүрс

2.2.Түүхий болон баяжуулсан сул коксжих чанартай нүүрс

Тайлбар:

3. Мэдээлэл гаргагч нь экспортолсон, экспортлохоор ачуулсан нүүрсний төрөл тус бүрээр энэ хүснэгтийн мэдээллийг гаргана.

4. Энэхүү мэдээлэлд өөрийн компанийн болон Гаалийн төв лабораторийн дүгнэлтийг хавсаргана.

2.3. Түүхий болон баяжуулсан коксжих чанаргүй нүүрс

Тайлбар:

5. Мэдээлэл гаргагч нь экспортолсон, экспортлохоор ачуулсан нүүрсний төрөл тус бүрээр энэ хүснэгтийн мэдээллийг гаргана.

6. Энэхүү мэдээлэлд өөрийн компанийн болон Гаалийн төв лабораторийн дүгнэлтийг хавсаргана.

3. Хүрэн нүүрс

Тайлбар:

7. Мэдээлэл гаргагч нь экспортолсон, экспортлохоор ачуулсан нүүрсний төрөл тус бүрээр энэ хүснэгтийн мэдээллийг гаргана.

8. Энэхүү мэдээлэлд өөрийн компанийн болон Гаалийн төв лабораторийн дүгнэлтийг хавсаргана.