/ЭМС-ын 2020 оны А/373-р тушаалаар хүчингүй болгосон/

Эрүүл мэнд, спортын сайдын 2015 оны 02 дугаар тушаалын 7 дугаар хавсралт

Цус сэлбэлттэй холбоотой урвал хүндрэлийн мэдээллийг хүлээн авч бүртгэх, шалтгааныг тодруулах, эргэн мэдээлэх журам

Нийтлэг үндэслэл:

            Цусны аюулгүй байдлыг хангах, донорын судаснаас өвчтний судас хүртэлх бүхий л үйл ажиллагаанд чанарыг нэвтрүүлэхэд цусны сонор сэрэмжийн тогтолцоог нэвтрүүлж, хөгжүүлэх асуудал чухал байр эзэлнэ.

            Цусны сонор сэрэмжийн тогтолцоо нь эмчилгээнд хэрэглэсэн цус, цусан бүтээгдэхүүний хүний биед үзүүлэх эмчилгээний үр дүнгээс гадна илрэх сөрөг нөлөөг зөв шуурхай оношилж, цаг алдалгүй шалтгааныг тогтоон засах арга хэмжээ авч, ийм төрлийн алдаа, эрсдэл дахин гарахаас сэргийлсэн арга хэмжээг авах цогц үйл ажиллагаа юм. Энэ тогтолцоог үр дүнтэй хэрэгжүүлэхэд цусан бүтээгдэхүүн үйлдвэрлэгч цусны алба, цусан бүтээгдэхүүн хэрэглэгч эмнэлгийн байгууллагууд хамтран ажиллах шаардлагатай.

Цусны албаны үүрэг:

1.Улсын хэмжээнд цус сэлбэлттэй холбоотой илэрсэн бүх урвал, хүндрэлийн төрөл, шинж тэмдэг болон урвал, хүндрэлийг бүртгэх, заавал мэдээлэх, засч сэргийлэх ач холбогдлыг сурталчлан таниулна.

2.Эмнэлгүүдээс ирсэн бүх мэдээллийг бүртгэн, эмнэлгийн тасаг нэгж, цус сэлбэлтийг зохицуулах салбар зөвлөл, лабораторийн тасагтай хамтран урвал, хүндрэл өгсөн шалтгааныг тодруулах ажлыг зохион байгуулна.

3.Цус сэлбэлттэй холбоотой урвал, хүндрэл илэрсэн эмчлүүлэгч, эмнэлэг, эмнэлгийн ажилтантай холбоотой мэдээллийг нууцална.

4.Урвал хүндрэл өгсөн болон тэр бүтээгдэхүүнтэй холбоотой бүх бүтээгдэхүүнийг мөшгөн тогтоох судалгааг хийнэ.

5.Урвал хүндрэл өгсөн цусан бүтээгдэхүүн болон өвчтөний сорьцонд шаардлагатай шинжилгээг хийнэ.

6.Зарим нэмэлт, батлах шинжилгээг бусад лавлагаа төв болон эмнэлгийн лабораториудаар хийлгэж үр дүнг авна.

7.Цус сэлбэлттэй холбоотой урвал, хүндрэлийг бүртгэн нэгтгэж, тайлан мэдээг эрүүл мэнд, спортын яаманд мэдээлэх асуудлыг хариуцана.

8.Цус сэлбэлттэй холбоотой урвал, хүндрэлийн шалтгаан авсан арга хэмжээ, дахин гарахаас сэргийлэх арга замыг бүх хэвшлийн эмнэлгийн байгууллагуудад сэрэмжлүүлэн мэдээлнэ.

ЦЦБ хэрэглэгч эмнэлгийн байгууллагын үүрэг:

1.ЦЦБ сэлбүүлсэн өвчтөн бүрийг хянаж эмчилгээний үр дүнг тооцно.

2.ЦЦБ сэлбэсэнтэй холбоотой урвал, хүндрэлийг оношлох, шуурхай арга хэмжээ авах.

3.Илэрсэн бүх урвал, хүндрэлийг бүртгэн, цусны албанд заавал мэдээлнэ.

 4.Хүндрэлийг мэдээлэх маягт болон ЦЦБ сэлбэсэнтэй холбоотой урвал хүндрэл өгсөн өвчтөний тухай мэдээлэл, өвчний түүх, цус захиалсан, сэлбэсэн, болон хувийн тохироо тодорхойлох шинжилгээний хариуны маягтын хуулбарыг сэлбэсэн бүтээгдэхүүний үлдэгдэлийн хамт цусны албанд хүргүүлж баримтжуулна.

5.Хүндрэл илэрсэн өвчтөнөөс авч, хувийн тохироо тодорхойлсон сорьц, урвал өгсний дараа өвчтөнөөс авсан сорьцыг бүрэн гаргацтай хаяглан зөв тээвэрлэн цусны албанд хүлээлгэн өгч баримтжуулна.

6.Урвал, хүндрэл өгсөн шатгааныг цусны албатай хамтран тогтооно.

7.Урвал, хүндрэл гарсан шалтгааныг арилгах цаашид дахин гарахаас сэргийлэх арга хэмжээ зохион байгуулна.

8.Цусны аюулгүй байдлыг хангах, цус, цусан бүтээгдэхүүн сэлбэх зөв дадал, зохистой хэрэглээг хэвшүүлэх талаар цус сэлбэлтэнд оролцдог бүх эмч, тусгай мэргэжилтнүүдэд сургалтыг байнга явуулж, үр дүнг тооцож ажиллана