Засгийн газрын 2016 оны 104 дүгээр
          тогтоолын хавсралт

“ЭРДЭНЭС МОНГОЛ” ХЯЗГААРЛАГДМАЛ
ХАРИУЦЛАГАТАЙ КОМПАНИЙН ДҮРЭМ

Нэг. Нийтлэг үндэслэл

1.1. Энэхүү дүрэм нь “Эрдэнэс Монгол” хязгаарлагдмал хариуцлагатай компани (цаашид “компани” гэх)-ийн эрх зүйн байдал, үйл ажиллагааны зарчим, хүрээ, чиглэл, удирдлага, тэдгээрийн эрх, үүргийг тодорхойлсон үндсэн баримт бичиг мөн.

1.2. Компанийн оноосон нэр нь “Эрдэнэс Монгол” хязгаарлагдмал хариуцлагатай компани, товчилсон нэр нь “Эрдэнэс Монгол” ХХК буюу          “ЭМГЛ” ХХК (англиар “Erdenes Mongol” limited liability company, товчилсон нэр нь “Erdenes Mongol” LLC буюу “EMGL” LLC) болно.

1.3. Компанийн оршин байгаа газар, шуудангийн хаягийг түүний ерөнхий захиргаа буюу гүйцэтгэх удирдлага байршиж байгаа газрын хаягаар тодорхойлно.

1.4. Компани өөрийн бэлгэдэлтэй байхаас гадна хууль тогтоомжид заасны дагуу албан бичгийн хэвлэмэл хуудас, тэмдэг хэрэглэнэ.

1.5. Компанийн бэлгэдэл, албан бичгийн хэвлэмэл хуудас, тэмдгийн загварыг Төлөөлөн удирдах зөвлөл батална.

Хоёр. Компанийн эрх зүйн байдал

2.1. Компани нь Компанийн тухай хууль, холбогдох бусад хууль тогтоомж болон энэ дүрмийн хүрээнд үйл ажиллагаа эрхлэн явуулна.

2.2. Компани  санхүүгийн тайлагналын олон улсын стандартад нийцсэн бие даасан тайлан тэнцэлтэй, өөрийн нэрийн өмнөөс эрх эдэлж, үүрэг хүлээдэг, өөрийн тусгайлсан эд хөрөнгөтэй, ашгийн төлөө хуулийн этгээд байна.

2.3. Хувьцаа эзэмшигч компанийн хүлээх үүргийг хариуцахгүй бөгөөд гагцхүү эзэмшиж байгаа хувьцааны хувь хэмжээгээр хариуцлага хүлээнэ. Компани нь өөрийн хувьцаа эзэмшигчийн хүлээх үүргийг хариуцахгүй.

Гурав. Үйл ажиллагааны зарчим

3.1. Компани ашгийн төлөө үйл ажиллагаа эрхлэн, хувьцаа эзэмшигчийн үр өгөөжийг тогтвортой хангаж, компанийн үнэ цэнийг өсгөхийг эрмэлзэнэ.
3.2. Компанийн үйл ажиллагаа нь ил тод, бие даасан, хариуцлагатай, улс төрөөс хараат бус байна.
3.3. Компани хөрөнгө оруулалт, хөрөнгийн удирдлагын талаар аливаа шийдвэр гаргахдаа тухайн хөрөнгө оруулалтын эдийн засаг, санхүүгийн үр өгөөж, тооцоо, судалгаанд суурилсан байна.
3.4. Компани олон улсын стандартад нийцсэн эрсдэлийн удирдлага болон эрсдэлээс сэргийлэх арга хэрэгсэлтэй байна.

Дөрөв. Компанийн үйл ажиллагааны чиглэл

4.1. Компани дараах үйл ажиллагаа эрхлэн явуулна:

4.1.1. стратегийн ач холбогдол бүхий ашигт малтмалын орд эрэх, хайх, ашиглах болон эрдэс баялгийн салбарт үйл ажиллагаа эрхэлдэг төрийн өмчит болон төрийн өмчийн оролцоотой хуулийн этгээдэд хувьцаа эзэмшигчийн төлөөлөл, хөрөнгийн удирдлагыг хэрэгжүүлэх чиглэлээр:

4.1.1.1. хайгуулын болон ашиглалтын тусгай зөвшөөрөл эзэмшигч хуулийн этгээдийн төрийн мэдлийн хувьцааг эзэмших;

4.1.1.2. ашигт малтмалын ордын ашиглалтын тусгай зөвшөөрөл эзэмшигч хуулийн этгээдийн төрийн өмчид ногдох хувьцааны ногдол ашгийг холбогдох хуулийн дагуу төвлөрүүлж, хуваарилах.

4.1.2. ашигт малтмалын орд ашиглалтын чиглэлээр:

4.1.2.1. ашигт малтмалын орд ашиглалтын үеийн геологийн судалгаа, эрдэм шинжилгээ, эрэл, хайгуулын ажлыг улсын төсвийн хөрөнгөөр болон санхүүжилтийн бусад эх үүсвэрээр гүйцэтгэх;

4.1.2.2. ашигт малтмалын ордыг дангаараа болон бусад этгээдтэй хамтран ашиглах;

4.1.2.3. ашигт малтмалын орд ашиглах гэрээ байгуулах ажлын бэлтгэлийг хангах, Засгийн газраас эрх олгосноор орд ашиглах гэрээ байгуулах;

4.1.2.4. ашигт малтмалын ордыг эдийн засгийн эргэлтэд оруулах, хүчин чадлыг нь нэмэгдүүлэх, үйлдвэрлэлийг хөгжүүлэх, дэвшилтэт техник технологийг нэвтрүүлэх.

      4.1.3. ашигт малтмалын тусгай зөвшөөрөл, эд хөрөнгө эзэмших, ашиглах, захиран зарцуулах чиглэлээр:

               4.1.3.1. ашигт малтмалын ордын хайгуулын болон ашиглалтын тусгай зөвшөөрөл эзэмших, бүхлээр нь, эсхүл тодорхой хэсгийг буцаан өгөх, бусдад шилжүүлэх, шилжүүлэн авах, барьцаалах;

               4.1.3.2. ашигт малтмалын ордын хайгуулын болон ашиглалтын тусгай зөвшөөрлийн шилжилт хөдөлгөөнд хяналт тавих, тооллогыг зохион байгуулахад оролцох;

               4.1.3.3. ашигт малтмалын орд ашиглалттай холбоотой аливаа эд хөрөнгө, тоног төхөөрөмж болон оюуны өмчийн эрхийг эзэмших, ашиглах, түрээслэх, түрээслүүлэх, худалдаж авах, худалдах;

               4.1.3.4. барилга байгууламж, бусад үл хөдлөх хөрөнгө худалдаж авах, барих, өмчлөх, эзэмших, ашиглах, түрээслэх, барьцаалах;

               4.1.3.5. ашигт малтмалын чиглэлээр үйл ажиллагаа эрхэлж байгаа төрийн өмчийн оролцоотой компаниудын төрийн эзэмшлийн хувьцааг худалдах, стратегийн хөрөнгө оруулагчийг татан оролцуулах асуудлыг хууль тогтоомжийн дагуу шийдвэрлүүлж, гарсан шийдвэрийг хэрэгжүүлэх.

     4.1.4. хөрөнгө төвлөрүүлэх, хөрөнгө оруулалт хийх, хөрөнгийн удирдлагыг хэрэгжүүлэх чиглэлээр:

               4.1.4.1. зээл авах, өрийн бичиг (бонд) гаргах болон бусад хэлбэрээр хөрөнгө оруулалтыг татах;

               4.1.4.2. хувьцааг нь эзэмшдэг хуулийн этгээдэд зээл олгох, хөрөнгө оруулах;

               4.1.4.3. хөрөнгийн өгөөжийн зохистой түвшинг хангасан эрдэс баялгийн болон түүнийг дагасан дэд бүтцийн салбарын төсөл, хөтөлбөрт хөрөнгө оруулалт татах, хөрөнгө оруулалт хийх;

                4.1.4.4. хөрөнгийн баталгаа гаргах.

   4.1.5. борлуулалт, худалдааны чиглэлээр:

                4.1.5.1. уул уурхайн бүтээгдэхүүн (олборлосон, баяжуулсан, боловсруулсан)-ийг гадаад, дотоод зах зээлд борлуулах, энэ талаар хэлцэл хийж гэрээ байгуулах;

                4.1.5.2. бүтээгдэхүүний экспорт, импорттой холбогдуулан хилийн боомт, нэвтрэх гарцын барилга байгууламж барих, эзэмших, ашиглах.

  4.1.6. зөвлөх үйлчилгээ үзүүлэх чиглэлээр:

                4.1.6.1. ашигт малтмалын орд ашиглалтын техник-эдийн засгийн үндэслэл, нөөцийн үнэлгээ, хөрөнгө, санхүүгийн төлөвлөлт хийх;

                4.1.6.2. ашигт малтмалын ордыг эдийн засгийн эргэлтэд оруулахтай холбогдуулан ордын талаарх мэдээллийг дотоод, гадаадад сурталчлан таниулах ажлыг зохион байгуулах;

                4.1.6.3. ашигт малтмалын ордын тусгай зөвшөөрөл эзэмшигч хуулийн этгээдийн хувьцааг дотоод, гадаадын хөрөнгийн биржид бүртгүүлэн, арилжаалахад оролцох.

4.1.7. энэ дүрмийн 4.1.1.1-д зааснаас бусад улсын төсвийн хөрөнгөөр эрэл хайгуул хийж нөөцийг нь тогтоосон ашигт малтмалын ордыг ашиглахтай холбоотой харилцаанд төрийн тѳлөөллийг хэрэгжүүлэх;

4.1.8. энэ дүрмийн 4.1.7-д зааснаас бусад төрийн өмчит болон төрийн өмчийн оролцоотой хуулийн этгээдийн төрийн эзэмшлийн хувьцааг шилжүүлэн авах, эзэмших, худалдах асуудлыг хууль тогтоомжийн дагуу шийдвэрлүүлэн гарсан шийдвэрийг хэрэгжүүлэх;

4.1.9. ашигт малтмалын ордыг ашиглахтай холбогдсон дэд бүтцийн салбарын төрийн өмчит болон төрийн өмчийн оролцоотой хуулийн этгээдийн төрийн мэдлийн хувьцааг эзэмших, ашиглах, борлуулах хүрээнд дараах үйл ажиллагааг эрхэлнэ:

4.1.9.1. ашигт малтмалын ордыг түшиглэн ашигт малтмал олборлох, боловсруулах үйлдвэр байгуулах, түүний хувьцааг  эзэмших;

4.1.9.2. ашигт малтмалын ордын дэд бүтцийг хөгжүүлэх ерөнхий төлөвлөгөө боловсруулах, дэд бүтцийн төсөл, хөтөлбөрийг дангаар болон бусад хуулийн этгээдтэй хамтран хэрэгжүүлэх ажлыг зохион байгуулах;

4.1.9.3. ашигт малтмалын ордын ложистик, бүтээгдэхүүн тээвэрлэх үйлчилгээ, дамжуулан тээвэрлэх, агуулахын болон гаалийн хяналтын бүсийн үйлчилгээ эрхлэх.

4.2. Компани хуулиар хориглоогүй аливаа үйл ажиллагааг бие даан болон өөрийн салбар, охин компаниудаар дамжуулан эрхэлж болно.

4.3. Компанийн Төлөөлөн удирдах зөвлөл үйл ажиллагаандаа Компанийн тухай хууль болон компанийн засаглалын олон улсын стандартыг мөрдөх бөгөөд компанийн эрх бүхий албан тушаалтны компанийн үйл ажиллагаатай холбогдсон аливаа шийдвэр ашиг сонирхлын зөрчилгүй байна.

Тав. Хөрөнгө оруулалтын бодлого

5.1. Компани нь Монгол Улсын хууль тогтоомж болон компанийн засаглалын олон улсын шалгуур үзүүлэлтэд нийцсэн, бизнесийн цар хүрээгээ өргөжүүлэхэд чиглэсэн хөрөнгө оруулалтын бодлоготой байх бөгөөд түүнийг Төлөөлөн удирдах зөвлөл батална.
5.2. Компанийн ногдол ашгийн хэмжээ, түүнийг төлөх шийдвэрийг Төлөөлөн удирдах зөвлөл гаргана.
5.3. Компани өөрийн охин компанийн эд хөрөнгийг бусдад шилжүүлэх, арилжаалах асуудлыг хууль тогтоомжийн дагуу шийдвэрлүүлнэ.
5.4. Компани гэрээ байгуулах замаар охин компаниасаа менежментийн төлбөр авч болно.   
5.5. Компани өөрийн хөрөнгийг арвижуулах зорилгоор дараах санхүүгийн хэрэгсэлд хөрөнгө оруулж болно:
5.5.1. хадгаламж;

5.5.2. үнэт цаас, өрийн бичиг;

5.5.3. санхүүгийн үүсмэл хэрэгсэл (дериватив);

5.5.4. бусад.

Зургаа. Компанийн хувьцаа, хувь нийлүүлсэн хөрөнгө

6.1. Компанийн зарласан хувьцаа нэг бүр нь 1 (нэг) төгрөгийн нэрлэсэн үнэ бүхий 100.000.000 (нэг зуун сая) энгийн, нэг бүр нь 1 (нэг) төгрөгийн нэрлэсэн үнэ бүхий 3.000.000 (гурван сая) давуу эрхийн хувьцаа байна.

6.2. Компанийн хувь нийлүүлсэн хөрөнгийн хэмжээ гаргасан энгийн болон давуу эрхийн хувьцааны үнийн дүнгийн нийлбэртэй тэнцүү байна.

6.3. Компанийн хувьцаа биет бус хэлбэртэй байна. Компани энгийн хувьцааны бүртгэлийг хөтөлж, түүнийг хадгалах ажлыг зохион байгуулах бөгөөд давуу эрхийн хувьцааг эзэмших, эзэмших эрх дуусгавар болсон тухай бүртгэлийг үнэт цаасны хадгаламжийн үйл ажиллагаа эрхлэх тусгай зөвшөөрөл бүхий байгууллагаар гэрээний үндсэн дээр гүйцэтгүүлнэ.

6.4. Компанийн энгийн хувьцаа нь Засгийн газраас холбогдох шийдвэр гарах хүртэл гагцхүү төрийн мэдэлд байх бөгөөд аливаа хэлбэрээр бусдад арилжаалагдахгүй.

6.5. Компани нэмж хувьцаа болон бусад үнэт цаас гаргах тохиолдолд тэдгээрийн тоо, гаргах хугацаа, нөхцөлийг хууль тогтоомжийн дагуу шийдвэрлэнэ.

6.6. Компанийн хувьцаа хувь нийлүүлсэн хөрөнгийн өмчлөлд оролцох эрхийг нотлох бөгөөд компанийн аливаа эд хөрөнгийг тусгайлан өмчлөх эрхийг нотлохгүй.

6.7. Компанийг үүсгэн байгуулах болон нэмэлт хувьцаа гаргах үед гаргасан хувьцааны төлбөрийг мөнгө, үнэт цаас, бусад хөрөнгө болон хөрөнгийн эрхээр хийж болно.

Долоо. Хувьцаа эзэмшигчдийн хурал

7.1. Компанийн хувьцаа эзэмшигчийн хурлын бүрэн эрхийг Монгол Улсын Засгийн газар хэрэгжүүлнэ.

7.2. Засгийн газар Компанийн тухай хуулийн 62 дугаар зүйлд зааснаас гадна Төлөөлөн удирдах зөвлөлийн хэлэлцүүлэхээр оруулсан бусад асуудлыг холбогдох журмын дагуу хэлэлцэн шийдвэрлэнэ.

7.3. Засгийн газар хувьцаа эзэмшигчийн хувьд компанийн хууль ёсны ашиг сонирхлыг хүндэтгэн бие даасан, үр ашигтай үйл ажиллагаа явуулах нөхцөлийг бүрдүүлж, компанийн хөрөнгийг нэмэгдүүлэхэд чиглэсэн бодлого, шийдвэрээр тогтвортой дэмжиж ажиллана.

7.4. Засгийн газар хууль тогтоомж болон энэ дүрмээр бүрэн эрхэд нь хамааруулснаас бусад асуудлаар компанийн өдөр тутмын үйл ажиллагаанд оролцохгүй.

Найм. Төлөөлөн удирдах зөвлөл

8.1. Хувьцаа эзэмшигчдийн хурлын чөлөөт цагт компанийн эрх барих байгууллага нь Төлөөлөн удирдах зөвлөл байна.

8.2. Төлөөлөн удирдах зөвлөл 9 гишүүнтэй байх бөгөөд тэдгээрийн гуравны нэгээс доошгүй нь хараат бус гишүүн байна. Төлөөлөн удирдах зөвлөлийн гишүүнийг хувьцаа эзэмшигчийн хурал томилно. (Энэ заалтыг Засгийн газрын 2021 оны 367 дугаар тогтоолоор өөрчлөн найруулсан)

8.3. Төлөөлөн удирдах зөвлөлийн гишүүнд тавигдах шаардлагыг хувьцаа эзэмшигч холбогдох хууль тогтоомжид нийцүүлэн тогтооно. (Энэ заалтыг Засгийн газрын 2021 оны 367 дугаар тогтоолоор өөрчлөн найруулсан)

8.4. Компанийн Төлөөлөн удирдах зөвлөлийн дэргэдэх нэр дэвшүүлэх хороо удирдах зөвлөлийн хараат бус гишүүнд нэр дэвшигчийг нийтэд нээлттэй зарлах, компанийн засаглал болон компанийн үйл ажиллагаанд холбоотой тодорхой салбарын чиглэлээр үйл ажиллагаа явуулдаг төрийн бус байгууллагаас санал авах зэрэг арга замаар сонгон шалгаруулж, томилуулахаар хувьцаа эзэмшигчдийн хуралд санал хүргүүлнэ.
8.5. Төлөөлөн удирдах зөвлөлийн даргыг Монгол Улсын Ерөнхий сайдын санал болгосны дагуу Төлөөлөн удирдах зөвлөлийн гишүүдийн дотроос нийт гишүүний олонхийн саналаар сонгоно. (Энэ заалтад Засгийн газрын 2021 оны 367 дугаар тогтоолоор нэмэлт орсон)
8.6. Төлөөлөн удирдах зөвлөлийн үйл ажиллагаа явуулах үндсэн хэлбэр нь хуралдаан байна. Төлөөлөн удирдах зөвлөлийн хурлыг улиралд нэгээс доошгүй удаа хуралдуулах бөгөөд шаардлагатай гэж үзвэл Төлөөлөн удирдах зөвлөлийн дарга буюу 3-аас доошгүй гишүүдийн саналаар ээлжит бус хурлыг зохион байгуулж болно.

8.7. Төлөөлөн удирдах зөвлөл өөрийн үйл ажиллагааг байнгын, тогтмол, мэргэшсэн байдлаар зохион байгуулах зорилгоор дараах хороодыг байгуулан ажиллуулах бөгөөд тодорхой асуудал эрхэлсэн байнгын болон түр хороог байгуулж болно:

8.7.1. нэр дэвшүүлэх;

8.7.2. аудитын;

8.7.3. цалин урамшууллын.

8.8. Хороод нь тус бүр 3 гишүүнтэй байх бөгөөд гишүүдийг Төлөөлөн удирдах зөвлөлийн гишүүдээс томилно.

8.9. Хороо хариуцсан асуудлаар Төлөөлөн удирдах зөвлөлд санал, дүгнэлт оруулж хэлэлцүүлнэ.

8.10. Хорооны ажиллах журмыг Компанийн тухай хуульд нийцүүлэн Төлөөлөн удирдах зөвлөл батална.

8.11. Төлөөлөн удирдах зөвлөлийн хурлаар Компанийн тухай хуулийн 76 дугаар зүйлд зааснаас гадна дараах асуудлыг хэлэлцэж шийдвэрлэнэ:

8.11.1. компани болон охин компанийн стратегийн зорилго, зорилт, хөрөнгө оруулалтын бодлого, богино, дунд болон урт хугацааны бизнес төлөвлөгөө, төсвийг батлах;

8.11.2. толгой болон охин, хараат компани хоорондын харилцааг зохицуулсан дүрэм, журам, гэрээг батлах;

8.11.3. компанийн гүйцэтгэх захиралтай байгуулах гэрээний нөхцөл, түүнд олгох цалин, шагнал урамшуулал, өмч хөрөнгийг захиран зарцуулах эрх, хариуцлагын хэм хэмжээг тогтоож гэрээ байгуулах;

8.11.4. компанийн шинээр худалдаж авах болон актлан данснаас хасах эд хөрөнгө, үндсэн эд хөрөнгийн асуудлыг зохих журмын дагуу хэлэлцэж шийдвэрлэх.
8.12. Төлөөлөн удирдах зөвлөлийн дарга  компанийг төлөөлөн санхүүгийн гүйлгээ хийх, компанийн нэрийн өмнөөс гэрээ байгуулахыг хориглоно.
8.13. Төлөөлөн удирдах зөвлөлийн хурлыг Компанийн тухай хуулийн          80 дугаар зүйл болон энэ дүрэмд заасан журмын дагуу хуралдуулна.

8.14. Төлөөлөн удирдах зөвлөлийн хурлыг цахим, видео хэлбэрээр хуралдуулж болно.

8.15. Төлөөлөн удирдах зөвлөлийн гишүүн өөрийн биеэр хуралд оролцоогүй тохиолдолд хэлэлцэж байгаа асуудлын талаар саналаа бичгээр, видео хурал, теле хурал, скайп болон түүнтэй ижил төрлийн харилцаа холбооны хэрэгсэл ашиглан гаргаж болно.

8.16. Төлөөлөн удирдах зөвлөлийн хурлын журам, Төлөөлөн удирдах зөвлөлийн даргын эрх үүрэг болон холбогдох бусад асуудлыг Төлөөлөн удирдах зөвлөлийн үйл ажиллагааны журамд тодорхой тусгана.

8.17. Төлөөлөн удирдах зөвлөлийн нарийн бичгийн даргыг Төлөөлөн удирдах зөвлөлийн даргын санал болгосноор Төлөөлөн удирдах зөвлөл томилж, чөлөөлнө. 

8.18. Төлөөлөн удирдах зөвлөлийн дарга, гишүүний цалин, урамшууллын хэмжээг олон улсын жишиг болон адил төрлийн үйл ажиллагаа эрхэлдэг компанийн Төлөөлөн удирдах зөвлөлийн гишүүдийн цалин урамшууллын хэмжээтэй дүйцүүлэн тогтоож болно.

8.19. Төлөөлөн удирдах зөвлөл нь жилд 1-ээс доошгүй удаа хувьцаа эзэмшигчид ажлаа тайлагнана.

Ес. Компанийн гүйцэтгэх удирдлага

9.1. Компанийн гүйцэтгэх удирдлагын бүтцийг Төлөөлөн удирдах зөвлөл батлах бөгөөд гүйцэтгэх удирдлагын багийн гишүүнийг томилж, чөлөөлнө.

9.2. Төлөөлөн удирдах зөвлөлийн нэр дэвшүүлэх хороо гүйцэтгэх захиралд нэр дэвших этгээдийг Компанийн тухай хуулийн 81.5.1, 81.5.2-т заасны дагуу сонгон шалгаруулж, саналаа Төлөөлөн удирдах зөвлөлд оруулна. 

9.3. Гүйцэтгэх захирал компанийн дүрэм болон Төлөөлөн удирдах зөвлөлтэй байгуулсан гэрээнд заасан эрх хэмжээний хүрээнд компанийн өдөр тутмын үйл ажиллагааг удирдан зохион байгуулж, компанийг төлөөлөн хэлцэл хийх, гэрээ байгуулах зэргээр компанийн нэрийн өмнөөс итгэмжлэлгүйгээр үйл ажиллагаа явуулна.

9.4. Гүйцэтгэх захирал гүйцэтгэх удирдлагын багийн гишүүн тус бүртэй гэрээ байгуулах бөгөөд гэрээнд тэдний эрх, үүрэг, цалин, шагнал урамшуулал, хариуцлагын хэмжээ болон бусад асуудлыг тусгана.

9.5. Гүйцэтгэх захиралтай байгуулсан гэрээний биелэлтийг дүгнэх шалгуур үзүүлэлт, урамшуулал болон нөхөн олговор олгох журмыг нэр дэвшүүлэх болон цалин урамшууллын хорооны саналыг үндэслэн Төлөөлөн удирдах зөвлөл батална.

9.6. Гүйцэтгэх захирал эрх, үүргээ хэрэгжүүлэх явцдаа энэ дүрэм болон Төлөөлөн удирдах зөвлөлтэй байгуулсан гэрээгээр хүлээсэн үүргээ зөрчиж, компанийн нэр хүнд, эдийн засгийн байдалд хохирол учруулсан болох нь тогтоогдвол түүнийг үүрэгт ажлаас нь чөлөөлнө.

9.7. Гүйцэтгэх захирал дараах эрх эдэлж, үүрэг хүлээнэ:

9.7.1. компани, охин болон хараат компанийн төсөв, бизнес төлөвлөгөөний биелэлтэд тогтмол хяналт тавих;

9.7.2. компанийн үйл ажиллагааг Төлөөлөн удирдах зөвлөлийн өмнө бүрэн хариуцаж, компанийн бизнес төлөвлөгөө, төсвийн биелэлтийг улирал тутам тайлагнан дүгнүүлэх;

9.7.3. компанийн санхүүгийн болон үйл ажиллагааны тайланг цаг тухайд нь гаргаж, холбогдох  бусад этгээдэд тайлагнах;

9.7.4. компанийн дотоод журам, заавар, аргачлал, ажил үүргийн хуваарийг батлах, компанийн нууцыг хамгаалах журам баталж мөрдүүлэх, компанийн ажилтанд сахилгын шийтгэл ногдуулах;

9.7.5. хууль тогтоомжийн хэрэгжилт, санхүү, аж ахуйн үйл ажиллагаа, хөрөнгө зарцуулалт, ашиглалт, компанийн хөдөлмөрийн дотоод журмын биелэлтэд хяналт тавьж, дотоод хяналтын болон эрсдэлийн удирдлагын тогтолцоог бүрдүүлэх;

9.7.6. охин болон хараат компанийн төрийн мэдлийн хувьцааны хувьцаа эзэмшигчийн бүрэн эрхийг Төлөөлөн удирдах зөвлөлөөс баталсан журмын хүрээнд хэрэгжүүлэх;

9.7.7. охин болон хараат компанийн бизнес төлөвлөгөө, төсвийн уялдаа холбоог хангах үүднээс батлагдахаас нь өмнө урьдчилан хянаж зөвшөөрөл өгөх, хэрэгжилтэд нь хяналт тавих, компани болон охин, хараат компанийн хоорондын харилцан уялдаа холбоог хангах замаар зардал хэмнэх, компанийн өрсөлдөх чадвар, ашигт ажиллагааг нэмэгдүүлэх;

9.7.8. компанийн үйл ажиллагаатай холбогдсон асуудлаар саналаа Засгийн газар, холбогдох бусад байгууллагад хүргүүлэх;

9.7.9. хууль тогтоомж, энэ дүрэм, норм норматив, компанийн хувьцаа эзэмшигчдийн хурал болон Төлөөлөн удирдах зөвлөлийн шийдвэр, үүрэг даалгаврыг хэрэгжүүлэх ажлыг зохион байгуулж биелүүлэх;

9.7.10. компанийн бүтэц, зохион байгуулалтын талаар санал боловсруулж, Төлөөлөн удирдах зөвлөлөөр батлуулах, баталсан орон тоо, зохион байгуулалтын бүтцийн хүрээнд ажилтнуудын ажлын байрны тодорхойлолтыг батлах, ажилтныг ажилд томилох, тэдэнтэй хөдөлмөрийн гэрээ байгуулах, ажлаас чөлөөлөх;

9.7.11. компанийн шинээр худалдан авах болон акталж устгах, худалдах, шилжүүлэх үндсэн хөрөнгийн асуудлыг Төлөөлөн удирдах зөвлөлийн хуралд оруулах;

9.7.12. бүрэн эрхийн хүрээнд тушаал гаргаж, биелэлтийг хангуулах;

9.7.13. компани болон охин, хараат компанийн үйл ажиллагааны тогтвортой байдлыг хангах;

9.7.14. охин болон хараат компаниас (хараат компанийн хувьд дүрэмд өөрөөр заагаагүй бол) холбогдох мэдээ, мэдээлэл, тайланг гаргуулан авах, тайлан тэнцэлтэй танилцах, шаардлагатай гэж үзвэл үйл ажиллагаанд нь шалгалт оруулах;

9.7.15. менежментийн гэрээний үндсэн дээр охин компаниас авах менежментийн төлбөрийн хэмжээг санхүүгийн тооцоо, судалгаанд үндэслэн тогтоож, Төлөөлөн удирдах зөвлөлд оруулж шийдвэрлүүлэх;

9.7.16. хууль тогтоомж болон энэ дүрэм, гэрээнд заасан бусад эрх, үүрэг.

Арав. Охин болон хараат компани, салбар,
төлөөлөгчийн газар

10.1. Компани дангаараа буюу бусад хуулийн этгээдтэй хамтран шинээр, эсхүл тухайн хуулийн этгээдийн хувьцааг шилжүүлэх, худалдан авах замаар охин болон хараат компани байгуулж болох бөгөөд хараат болон охин компани байгуулах асуудлыг Төлөөлөн удирдах зөвлөл шийдвэрлэнэ. Хараат болон охин компани нь бие даасан тайлан тэнцэлтэй, банкинд харилцах данстай, өөрийн нэрийн өмнөөс эрх эдлэн, үүрэг хүлээх хуулийн этгээд байна.

10.2. Компани Төлөөлөн удирдах зөвлөлийн шийдвэрээр салбар төлөөлөгчийн газар байгуулж  болно.

10.3. Салбар төлөөлөгчийн газрын захирлыг гүйцэтгэх захирал томилж, чөлөөлнө.

Арван нэг. Охин болон хараат компанитай харилцах
харилцаа, компанийн нэгдэл

11.1. Компани Компанийн тухай хууль болон энэ дүрэмд заасны дагуу охин болон хараат компанитай өөрийн төлөөллөөр дамжуулан харилцах бөгөөд охин болон хараат компани, орд ашиглалтын тусгай зөвшөөрөл эзэмшигч бусад хуулийн этгээдтэй хууль тогтоомж, Засгийн газрын шийдвэрийг үндэслэн гэрээ байгуулж,  хамтран ажиллаж болно.

11.2. Энэ дүрмийн 11.1-д заасан гэрээнд толгой компанийн зүгээс хэрэгжүүлэх удирдлагын болон санхүүгийн, техникийн хяналтын тогтолцооны талаар тодорхой тусгана. 

11.3. Компани охин болон хараат компани дахь төрийн эзэмшлийн хувьцааны хэмжээг харгалзан тухайн компанийн гүйцэтгэх удирдлагын багт өөрийн төлөөллийг ажиллуулж болно. 

11.4. Компани, түүний охин болон хараат компаниудыг хамтад нь компанийн нэгдэл гэх бөгөөд нэгдлийн хамаарал бүхий компаниудын нийтлэг эрх ашиг, үйл ажиллагаанд хамаарах асуудлыг зохицуулах зорилгоор тэдгээрийн гүйцэтгэх удирдлагуудын хүрээнд тодорхой бүтэц байгуулан ажиллуулж болно.

11.5. Гүйцэтгэх захирал нь охин болон хараат компанийн хувьцаа эзэмшигчдийн хуралд компанийг буюу хувьцаа эзэмшигчийг төлөөлж оролцох этгээдийн өгөх саналын удирдамжийг батлах замаар төрийн мэдэл (төрийн эзэмшлийн хувиар)-ийн хувьцааны эрхийг хэрэгжүүлнэ.
  
11.6. Компанийн охин болон хараат компанийн хувьцаа эзэмшигчийн эрхийг хэрэгжүүлэх журмыг Төлөөлөн удирдах зөвлөл хууль тогтоомж болон энэ дүрэмд нийцүүлэн батална.

11.7. Төлөөлөн удирдах зөвлөл компани, түүний охин болон хараат компанийн хэвийн үйл ажиллагаа доголдож, санхүүгийн зохистой харьцаа, үзүүлэлт алдагдсан тохиолдолд аудитын дүгнэлтийг үндэслэн үйл ажиллагааг нь тогтворжуулж, хүндрэлийг даван туулахад чиглэсэн тодорхой төлөвлөгөө, төсөл, хөтөлбөрийг бие даан хэрэгжүүлж болно.
11.8. Компани нь охин болон хараат компани дахь хувьцааны хэмжээ, үйл ажиллагааны чиглэлийг харгалзан тухайн компанийн Төлөөлөн удирдах зөвлөлд өөрийн төлөөллийг томилон ажиллуулах бөгөөд ийнхүү томилохдоо эрчим хүч, уул уурхайн асуудал эрхэлсэн төрийн захиргааны төв байгууллага болон Засгийн газрын Хэрэг эрхлэх газрын төлөөллийг оролцуулна.

Арван хоёр. Хэлцэл хийх ерөнхий журам

12.1. Их хэмжээний хэлцэл байгуулахтай холбогдсон харилцааг Компанийн тухай хуулиар зохицуулна.

12.2. Их хэмжээний хэлцлийн эд хөрөнгө, эд хөрөнгийн эрхийн зах зээлийн үнийг Төлөөлөн удирдах зөвлөл тогтооно.

12.3. Компанийн тухай хуулийн 89.4-т заасны дагуу сонирхлын зөрчилтэй хэлцэлтэй холбоотой заалтууд нь нэг талаас компани, нөгөө талаас хувьцаа эзэмшигч, эсхүл нэг талаас компани, нөгөө талаас охин болон хараат компани, түүнчлэн хувьцаа эзэмшигчийн харилцан холбоотой бусад компанитай хийх хэлцэлд хамаарахгүй.

12.4. Компани нь санхүүгийн жилийн хугацаанд хийсэн их хэмжээний болон сонирхлын зөрчилтэй хэлцлийн тоо, хэлцэл хийсэн этгээд, хэлцлийн үнийн талаарх мэдээллийг жилийн тайландаа тусган нийтэд мэдээлэх үүрэгтэй.

Арван гурав. Компанийн эрх бүхий албан тушаалтан

13.1. Компанийн тухай хуулийн 84.1-д заасны дагуу дараах этгээдийг компанийн эрх бүхий албан тушаалтанд тооцно:

13.1.1. Төлөөлөн удирдах зөвлөлийн гишүүн;

13.1.2. гүйцэтгэх захирал;

13.1.3. гүйцэтгэх удирдлагын багийн гишүүн;

13.1.4. Төлөөлөн удирдах зөвлөлийн нарийн бичгийн дарга;

13.1.5. ерөнхий нягтлан бодогч.

13.2. Эрх бүхий албан тушаалтан нь Компанийн тухай хуульд заасны дагуу өөрийн нэгдмэл сонирхолтой этгээдийн талаарх мэдээллийг Төлөөлөн удирдах зөвлөлийн нарийн бичгийн даргад тухайн албан тушаалд томилогдсоноос хойш 10 хоногт багтаан хүргүүлэх бөгөөд уг мэдээлэлд өөрчлөлт орсон тохиолдолд холбогдох мэдээллийг 10 хоногийн дотор хүргүүлнэ.

13.3. Компанийн эрх бүхий албан тушаалтан дараах үүрэгтэй:

13.3.1. хууль тогтоомж болон компанийн дүрэм, журамд заасан бүрэн эрхийн хүрээнд эрх, үүргээ хэрэгжүүлэх;

13.3.2. үйл ажиллагаандаа компанийн эрх ашгийг дээдлэх зарчмыг баримтлах;

13.3.3. хувьцаа эзэмшигч, харилцагч болон бусад оролцогч талуудын эрх ашгийг тэргүүн зэрэгт тавьж, ашиг сонирхлын зөрчил гаргахгүй ажиллах;

13.3.4. шууд болон шууд бус байдлаар компанийн үйл ажиллагаанд сөргөөр нөлөөлж болох аливаа хэлцэл, бусад асуудлын талаар Төлөөлөн удирдах зөвлөлд  шуурхай мэдэгдэх;

13.3.5. компанийн эрх ашигт нийцүүлэн үндэслэлтэй шийдвэр гаргах;

13.3.6. шийдвэр гаргахдаа сонирхлын зөрчил үүсэхээс сэргийлэх, сонирхлын зөрчил үүсэхээр бол тухай бүр Төлөөлөн удирдах зөвлөл, аудиторт мэдэгдэх;

13.3.7. компанийн нууцад хамаарах мэдээллийг бусдад задруулах, хувийн сонирхлын зорилгоор ашиглахгүй байх.

13.4. Компанитай байгуулсан гэрээнд өөрөөр заагаагүй бол компанийн эрх бүхий албан тушаалтан албан тушаалаасаа өөрчлөгдсөнөөс хойш 3 жилийн хугацаанд  энэ дүрмийн 13.3.7-д заасан үүргийг хүлээнэ.

Арван дөрөв. Компанийн хяналтын тогтолцоо

14.1. Компанийн дотоод болоод хѳндлѳнгийн хяналтын тогтолцоог Компанийн тухай хуулийн дагуу бүрдүүлнэ.

14.2. Компанийн үйл ажиллагаанд хөндлөнгийн хяналтын зарчмыг баримтлах бөгөөд санхүүгийн тайланг шалгуулж баталгаажуулан санхүү, эдийн засгийн үйл ажиллагаанд бүрэн болон хэсэгчилсэн шалгалт нэр хүнд бүхий хөндлөнгийн аудитын компаниар хийлгэнэ.

14.3. Гүйцэтгэх захирал нь Төлөөлөн удирдах зөвлөлийн аудитын хорооны саналыг үндэслэн компанийн дотоод аудиторыг сонгож, түүнтэй гэрээ байгуулах бөгөөд дотоод аудитор нь ажлын явц, үр дүнгийн талаар улирал бүр аудитын хороонд тайлагнана.

14.4. Компанийн дотоод аудитороор дараах этгээдийг сонгон ажиллуулахыг хориглоно:

14.4.1. компанийн нэгдмэл сонирхолтой этгээд, эрх бүхий албан тушаалтан болон тэдгээртэй нэгдмэл сонирхолтой этгээд;

14.4.2. энэ дүрмийн 14.4.1-д заасан этгээдэд гэрээний үндсэн дээр хөлсөөр ажиллаж байгаа ажилтан, эрх бүхий албан тушаалтан;

14.4.3. компани болон түүнтэй нэгдмэл сонирхолтой этгээдийн гаргасан давуу эрхийн хувьцаанаас бусад үнэт цаас, эсхүл компанийн болон түүнтэй нэгдмэл сонирхолтой этгээдэд холбогдох бусад эд хөрөнгө буюу эд хөрөнгийн эрх эзэмшдэг этгээд;

14.4.4. аудитын үйлчилгээ үзүүлэхээс бусад асуудлаар компанитай хэлцэл хийсэн бизнесийн харилцаатай этгээд.

Арван тав. Компанийн санхүүжилт болон
ногдол ашиг

15.1. Компани нь зээл, хөрөнгө оруулалт, ногдол ашиг, хөрөнгийн өгөөж, хувьцаа борлуулсан орлогын эх үүсвэрээс санхүүжинэ.

15.2. Компани охин компанитайгаа менежментийн төлбөрийн гэрээ байгуулж, төлбөр авах бөгөөд төлбөрийн хэмжээг гүйцэтгэх захирлын саналыг үндэслэн Төлөөлөн удирдах зөвлөл батална.

Арван зургаа. Компанийн санхүүгийн үйл ажиллагаа

16.1. Компани нягтлан бодох бүртгэлийн тухай хууль тогтоомж, санхүүгийн тайлагналын олон улсын стандартын дагуу нягтлан бодох бүртгэл хөтөлж, санхүүгийн тайлан гаргах бөгөөд аудитын байгууллагаар дүгнэлт гаргуулан хувьцаа эзэмшигч болон эрх бүхий бусад этгээдэд танилцуулна. Санхүүгийн тайлангийн үнэн зөвийг компанийн гүйцэтгэх захирал хариуцна.
16.2. Компани  охин компанитайгаа нэгдсэн санхүүгийн тайлан гаргана.

16.3. Компанийн санхүүгийн жил тухайн жилийн 1 дүгээр сарын 1-ний өдөр эхэлж, 12 дугаар сарын 31-ний өдөр дуусгавар болно.

Арван долоо. Мэдээллийн нээлттэй байдал

17.1. Компани өөрийн үйл ажиллагаатай холбогдсон мэдээ, мэдээллийг хууль тогтоомжийн дагуу тухай бүр өөрийн цахим хуудсаар дамжуулан нийтэд мэдээлнэ.

---o0o---