Засгийн газрын 2016 оны 193 дугаар
           тогтоолын 1 дүгээр хавсралт

ҮЙЛДВЭРЛЭЛИЙГ ХӨГЖҮҮЛЭХ САНГИЙН ХӨРӨНГИЙГ БҮРДҮҮЛЭХ,
ЗАРЦУУЛАХ, ТҮҮНД ХЯНАЛТ ТАВИХ ЖУРАМ

Нэг. Нийтлэг үндэслэл

1.1. Үйлдвэрлэлийг хөгжүүлэх сан (цаашид “сан” гэх)-гийн хөрөнгийг бүрдүүлэх, зарцуулах, түүнд хяналт тавихтай холбогдсон харилцааг энэ журмаар зохицуулна.

1.2. Сан нь Төрийн санд тусгай данстай байх бөгөөд сангийн орлого, зарлагыг гагцхүү тус дансаар дамжуулан гүйцэтгэнэ.

1.3. Сан энэ журмын 1.2-т заасан сангаас гадуур данстай байхыг хориглоно.

Хоёр. Сангийн удирдлага, зохион байгуулалт

2.1. Сангийн үйл ажиллагааг аж үйлдвэрийн асуудал эрхэлсэн төрийн захиргааны төв байгууллага зохион байгуулах бөгөөд тус байгууллага дараах чиг үүргийг хэрэгжүүлнэ.

     2.1.1. сангийн тухайн жилийн төсвийг боловсруулж батлуулах,     гүйцэтгэлд нь хяналт тавьж ажиллах;

     2.1.2. энэ журмын хавсралтад заасан маягтын дагуу сангийн дэмжлэгт хамрагдах хүсэлт гаргасан аж ахуйн нэгжийн мэдээлэл, бичиг баримтын иж бүрдлийг нягтлан шалгаж, холбогдох дүгнэлтийн хамт мөн журмын 2.2-т заасан хороонд шилжүүлэх;

     2.1.3. энэ журмын 2.6-д заасан шийдвэрийг үндэслэн төрөөс үйлдвэрлэлийг дэмжих дэмжлэгт хамрагдах аж ахуйн нэгжтэй гэрээ байгуулж, санхүүжилт олгох;

     2.1.4. сангийн үйл ажиллагаатай холбогдох бичиг баримтыг хадгаламжийн нэгж болгон архивт шилжүүлэх;

     2.1.5. хууль тогтоомжид заасан бусад чиг үүрэг.

2.2. Сангийн хөрөнгөөс дэмжлэг олгох аж ахуйн нэгжийг сонгон шалгаруулах үүрэг бүхий хороо (цаашид “Хороо” гэх) ажиллана. Хороог үйлдвэрлэлийн салбарын төлөөллийг оролцуулан 7 хүний бүрэлдэхүүнтэйгээр аж үйлдвэрийн асуудал эрхэлсэн Засгийн газрын гишүүний шийдвэрээр байгуулна.

2.3. Хорооны үйл ажиллагааны зохион байгуулалтын үндсэн хэлбэр нь хуралдаан байх бөгөөд улиралд 1-ээс доошгүй удаа хуралдана. Шаардлагатай тохиолдолд ээлжит бус хурлыг хорооны гишүүдийн олонхийн саналаар зарлан хуралдуулж болно. Хорооны гишүүдийн гуравны хоёроос доошгүй нь оролцсоноор хуралдааныг хүчинтэйд тооцно.

2.4. Хорооны хуралдаанаар хэлэлцсэн асуудлыг олонхийн саналаар шийдвэрлэх бөгөөд шийдвэр нь тогтоол, тэмдэглэл хэлбэртэй байна. Хорооны шийдвэрт дарга, нарийн бичгийн дарга гарын үсэг зурж баталгаажуулна.

2.5. Хороо нь “Үйлдвэрлэлийг дэмжих тухай хуулийн хүрээнд олгогдох дэмжлэгт хамрагдах үйлдвэрлэлийн шалгуур үзүүлэлтийг тогтоох, тооцох, дэмжлэгийг олгох, хяналт тавих журам”-ын 2, 3 дугаар зүйлд заасан дэмжлэгт хамрагдах шалгуур үзүүлэлт хангасан аж ахуйн нэгжийн талаарх шийдвэрийг гарснаас нь хойш ажлын 3 хоногийн дотор аж үйлдвэрийн асуудал эрхэлсэн Засгийн газрын гишүүнд танилцуулна.

2.6. Аж үйлдвэрийн асуудал эрхэлсэн Засгийн газрын гишүүн энэ журмын 2.5-д заасан шийдвэртэй танилцаж, дэмжлэг олгох аж ахуйн нэгжийн талаар эцсийн шийдвэр гаргаж, дэмжлэгт хамрагдах аж ахуйн нэгжийн нэрс, санхүүжилтийн хэмжээг баталгаажуулна. Дэмжлэгт хамрагдах аж ахуйн нэгж нь Үйлдвэрлэлийг дэмжих тухай хуулийн 9 дүгээр зүйлд заасан шаардлагыг хангасан байна.

Гурав. Сангийн хөрөнгийн эх үүсвэр болон
         түүнийг зарцуулах журам

3.1. Сангийн хөрөнгө Үйлдвэрлэлийг дэмжих тухай хуулийн 12 дугаар зүйлд заасны дагуу дараах эх үүсвэрээс бүрдэнэ:

     3.1.1. улсын төсвөөс хуваарилсан хөрөнгө;

     3.1.2. сангийн чөлөөт үлдэгдлийг банкинд хадгалуулсны хүү;

     3.1.3. олон улсын байгууллага, гадаад улсаас үйлдвэрлэлийг дэмжих зорилгоор олгосон зээл;

     3.1.4. олон улсын байгууллага, гадаад улсаас өгсөн хандив, тусламж;

     3.1.5. бусад эх үүсвэр.

3.2. Сангийн хөрөнгийг Үйлдвэрлэлийг дэмжих тухай хуулийн 8.1-д заасны дагуу дараах зориулалтаар зарцуулна:

     3.2.1. үйлдвэрлэсэн бүтээгдэхүүнийхээ 30-аас дээш хувийг экспортод гаргаж байгаа үндэсний үйлдвэрт технологийн шинэчлэл хийсэн хөрөнгө оруулалт болон эргэлтийн хөрөнгөд зориулан арилжааны банкнаас олгосон зээлийн хүүгийн зөрүүг олгох;

     3.2.2. өндөр үр ашиг бүхий дэвшилтэт технологи болон өндөр технологи бий болгон нэвтрүүлж нутагшуулсан экспортын үйлдвэрийн бүтээгдэхүүн үйлдвэрлэх хүртэлх хугацаанд судалгаа, хөгжилд зарцуулсан зардлын 75 хүртэлх хувьтай тэнцэх дэмжлэгийг 1 удаа улсын төсвөөс тухайн үйлдвэрт буцааж олгох;

     3.2.3. экспортын үйлдвэрлэлийг экспортын санхүүжилтийн төрөл бүрийн арга хэрэгсэл, түүний дотор факторингийн үйлчилгээг хөгжүүлэх замаар дэмжих.

3.3. Гадаад улс, олон улсын байгууллагатай байгуулсан гэрээ, хэлэлцээрт тусгайлан заасан тохиолдолд зээл, хандив, буцалтгүй тусламжийг зөвхөн тухайн гэрээ, хэлэлцээрт заасан зориулалтын дагуу зарцуулна.

3.4. Сангийн хөрөнгөөс зөвхөн батлагдсан төсвийн хүрээнд дэмжлэг олгоно.

3.5. Сангийн хөрөнгийг энэ журмын 3.2-т зааснаас бусад зориулалтаар зарцуулахыг хориглоно.

Дөрөв. Сангийн төсөв

4.1. Сангийн жил бүрийн орлого, зарлагын төсвийг Үйлдвэрлэлийг дэмжих тухай хуулийн 14 дүгээр зүйлд заасны дагуу баталж хуваарилна.

4.2. Аж үйлдвэрийн асуудал эрхэлсэн төрийн захиргааны төв байгууллага тухайн жил үйлдвэрлэлийн дэмжлэг олгоход шаардагдах хөрөнгийн талаар санал боловсруулж төсвийн асуудал эрхэлсэн төрийн захиргааны төв байгууллагад тухайн жилийн төсвийн төсөлтэй хамт хүргүүлнэ.

Тав. Сангийн хөрөнгийн зарцуулалтын тайлан

5.1. Аж үйлдвэрийн асуудал эрхэлсэн төрийн захиргааны төв байгууллага сангийн орлого, зарлагын улирлын тайланг дараа улирлын эхний сарын 20-ны өдрийн дотор, жилийн эцсийн тайланг дараа оны 2 дугаар сарын 10-ны өдрийн дотор тус тус төсвийн асуудал эрхэлсэн төрийн захиргааны төв байгууллагад тайлагнана. Аж үйлдвэрийн асуудал эрхэлсэн Засгийн газрын гишүүн сангийн хөрөнгөөс дэмжлэг олгосон төсөл, арга хэмжээний хэрэгжилтийн жилийн тайланг дараа оны 2 дугаар сарын 1-ний өдрийн дотор Засгийн газарт тайлагнана.

5.2. Сангийн хөрөнгийн зарцуулалтад Төсвийн тухай хуульд заасны дагуу хяналт тавина.

Зургаа. Бусад зүйл

6.1. Сангийн хөрөнгийг зориулалтын бусаар зарцуулсан буюу шалгуур үзүүлэлт хангаагүй аж ахуйн нэгжид дэмжлэг олгосон бөгөөд хууль тогтоомж, энэ журмыг зөрчсөн этгээдэд холбогдох хуульд заасны дагуу хариуцлага хүлээлгэнэ.

      ---o0o---

      Үйлдвэрлэлийг хөгжүүлэх сангийн хөрөнгийг бүрдүүлэх,

                                зарцуулах, түүнд хяналт тавих журмын хавсралт

ҮЙЛДВЭРЛЭЛИЙГ ХӨГЖҮҮЛЭХ САНГИЙН ДЭМЖЛЭГТ ХАМРАГДАХ ХҮСЭЛТ

ГАРГАСАН АЖ АХУЙН НЭГЖИЙН МЭДЭЭЛЭЛ

     Тайлбар: мэдээллийг  www.industry.mi.gov.mn сайт руу орж аж үйлдвэрийн салбарын мэдээллийн санд давхар бүртгүүлсэн байна.