Засгийн газрын 2016 оны 202 дугаар

  тогтоолын 2 дугаар хавсралт 

УЛСЫН АВАРГА ФЕРМЕР ШАЛГАРУУЛАХ ЖУРАМ

(Засгийн газрын 2019 оны 338 дугаар тогтоолоор хүчингүй болсонд тооцсон)

Нэг. Нийтлэг үндэслэл

            1. Өндөр ашиг шимт мал, амьтан өсгөн үржүүлж, зах зээлийн эрэлт хэрэгцээнд нийцсэн бүтээгдэхүүн үйлдвэрлэж, хүн амын хүнсний хангамжийг нэмэгдүүлэх болон нийгэмд хувь нэмэр оруулж байгаа эрчимжсэн мал аж ахуй эрхлэгчдийг урамшуулахтай холбогдсон харилцааг зохицуулахад энэхүү журмын зорилго оршино.

            2. Энэхүү журамд заасан шаардлага, шалгуур үзүүлэлтийг хангасан эрчимжсэн мал аж ахуй эрхлэгч фермерийг сүүлийн 3 жилийн ажлын үзүүлэлтийг нь үндэслэн улсын аварга фермерээр шалгаруулна.

            3. Улсын аварга фермерээр шалгаруулан шагнах асуудлыг хөдөө аж ахуйн асуудал хариуцсан төрийн захиргааны төв байгууллагын саналыг үндэслэн Засгийн газар шийдвэрлэнэ.

Хоёр. Шагналд тодорхойлох үндэслэл

            4. Улсын аварга фермерээр тодорхойлогдож байгаа эрчимжсэн мал аж ахуй эрхлэгч нь дараах нийтлэг шаардлага хангасан байна:

                 4.1. байгаль орчинд халгүй аргаар үйл ажиллагаа эрхэлж, орчны ариун цэвэр, эрүүл ахуй, халдваргүйжилтийг шийдвэрлэсэн, экологийн цэвэр бүтээгдэхүүн үйлдвэрлэх нөхцөлийг бүрдүүлсэн байх;

                 4.2. мал, амьтныг эрсдэлээс хамгаалах даатгалд хамруулж, холбогдох хууль тогтоомжийн дагуу татвар, хураамж, нийгмийн болон эрүүл мэндийн даатгалын шимтгэл тогтмол төлсөн байх;

                 4.3. мал, амьтныг халдварт, паразиттах өвчнөөс урьдчилан сэргийлэх арга хэмжээнд бүрэн хамруулан эрүүл сүрэгтэй болсон байх;

                 4.4. мал бүр хувийн дугаартай, үржилд ашиглаж байгаа малын анги, ашиг шимийн гарц, чанарыг мэргэжлийн байгууллагаар баталгаажуулсан байх;

                 4.5. үржлийн алба болон хэрэглэгчийн захиалгаар үржлийн мал, гахай, шувуу, зөгий бойжуулж худалдсан байх;

                 4.6. өөрийн мал маллагааны арга туршлагыг залуу малчдад эзэмшүүлэх талаар санаачилга гарган ажиллаж 3-аас доошгүй ажлын байр бий болгосон байх.

Гурав. Эрчимжсэн мал аж ахуй эрхлэгч фермерүүдэд

тавих шалгуур үзүүлэлт

            5. Улсын аварга фермерээр тодорхойлогдож байгаа эрчимжсэн аж ахуй эрхлэгч нь энэхүү журмын 4 дэх хэсэгт заасан нийтлэг шаардлагаас гадна дараах шалгуур үзүүлэлт хангасан байна:

                 5.1. өндөр ашиг шимийн чиглэлээр дагнан төрөлжсөн нэг үүлдрийн мал, амьтныг сонгон үржүүлж, гол нэр төрлийн бүтээгдэхүүний үйлдвэрлэл нь жил дараалан өссөн байх;

                 5.2. тухайн үүлдрийн мал, амьтны арчилгаа маллагааны технологи, эрүүл ахуйн шаардлагыг бүрэн хангасан зориулалтын байр, тоног төхөөрөмжтэй байх;

                 5.3. тодорхой аж ахуйн нэгжтэй гэрээ байгуулан ажиллаж, эрүүл ахуйн шаардлага хангасан бүтээгдэхүүн нийлүүлдэг байх;

                 5.4. мал, амьтны чанар, ашиг шимийг нэмэгдүүлэх, бүтээгдэхүүний чанар сайжруулах чиглэлээр шинэ техник, тоног төхөөрөмж, дэвшилтэт арга технологи нэвтрүүлэхэд хөрөнгө оруулалт хийж, тодорхой үр дүнд хүрсэн байх;

                 5.5. саалийн болон махны чиглэлийн аж ахуй эрхлэгч иргэн 20-иос доошгүй га, аж ахуйн нэгж 100-гаас доошгүй га газар хашиж хамгаалах, худаг гаргах, усжуулах, нэг болон олон наст ургамал тариалж таримал бэлчээр бий болгох, хадлан, дарш, тэжээл бэлтгэх зэргээр газрыг үр ашигтай ашиглаж эдийн засгийн эргэлтэд оруулсан байх;

                 5.6. үржилд ашиглаж байгаа мал, амьтан бүр удам гарваль, ашиг шимийн бүртгэл хөтөлдөг байх;

                 5.7. тэжээл бэлтгэх тоног төхөөрөмжтэй, өөрийн хэрэгцээт тэжээлийн 40-өөс доошгүй хувийг бэлтгэдэг байх;

                 5.8. сүүний чиглэлийн үхрийн аж ахуй эрхэлж байгаа иргэн 30, аж ахуйн нэгж 60-аас доошгүй стандартын нэг болон түүнээс дээш ангийн шаардлага хангасан үнээтэй, зохиомол аргаар хээлтүүлэг хийдэг, нэг үнээнээс жилд дунджаар 4700-гаас доошгүй литр сүү саасан, сүүний үйлдвэрлэл нь жил дараалан өссөн байх;

                 5.9. махны үхрийн аж ахуй эрхэлж байгаа иргэн 100, аж ахуйн нэгж 200-гаас доошгүй үнээтэй, оны эхний нэг үхрээс 50 кг-аас доошгүй мах үйлдвэрлэж, үйлдвэрлэсэн махны хэмжээ жил дараалан өссөн байх;

                 5.10. махны чиглэлийн хонь үржүүлж байгаа иргэн 300, аж ахуйн нэгж 500–гаас доошгүй эм хоньтой, оны эхэнд байсан нэг хониноос 7.5 кг-аас доошгүй мах үйлдвэрлэж, үйлдвэрлэсэн махны хэмжээ жил дараалан өссөн байх;

                 5.11. гахайн аж ахуй эрхэлж байгаа иргэн 10, аж ахуйн нэгж 60-аас доошгүй үндсэн мэгжтэй, мэгж бүрээс жилд 20-иос доошгүй торой бойжуулж, эхний жилд            2.0 тонноос доошгүй мах үйлдвэрлэсэн, мах үйлдвэрлэл нь жил дараалан өссөн байх;

                 5.12. өндөглөгч шувуу үржүүлж байгаа өрх, аж ахуйн нэгж нь оны эхэнд    20000-аас доошгүй өндөглөгчтэй, нэг өндөглөгчөөс жилд 280-аас доошгүй өндөг үйлдвэрлэсэн байх.

6. Зөгий, загасны аж ахуй зэрэг шинээр хөгжүүлж байгаа аж ахуйн хувьд улсын аварга фермерээр шалгаруулахдаа хөдөө аж ахуйн асуудал эрхэлсэн төрийн захиргааны төв байгууллагаас тогтоосон тусгайлсан үзүүлэлтээр шалгаруулах болно.

Дөрөв. Шагналд тодорхойлох, шалгаруулах

            7. Аймаг, нийслэлийн аварга фермер болсноос хойш хоёроос доошгүй жил амжилтаа тогтвортой хадгалан ажиллаж, энэхүү журмын шаардлага, шалгуур үзүүлэлтийг хангасан фермерийг сум, дүүргээс улсын аварга фермерээр тодорхойлж баг, хорооны иргэдийн Нийтийн Хурлаар хэлэлцүүлсэн шийдвэр, сум, дүүргийн Засаг даргын тодорхойлолт, хүсэлтийн хамт аймаг, нийслэлийн хөдөө аж ахуйн асуудал хариуцсан байгууллагад хүргүүлнэ.

            8. Аймаг, нийслэлийн хөдөө аж ахуйн асуудал хариуцсан байгууллага нь сум, дүүргээс ирүүлсэн тодорхойлолт, холбогдох бичиг баримтыг хянаж шаардлага хангасан хамгийн өндөр үзүүлэлттэй 3 хүртэл фермерийн тодорхойлолтыг тухайн аймаг, нийслэлийн Засаг даргын зөвлөлийн хурлаар хэлэлцүүлж, холбогдох шийдвэрийн хамт жил бүрийн 1 дүгээр сарын 5-ны өдрийн дотор хөдөө аж ахуйн асуудал хариуцсан төрийн захиргааны төв байгууллагад хүргүүлнэ.

            9. Улсын аварга фермерээр шалгаруулахаар тодорхойлохдоо дараахь бичиг баримт бүрдүүлсэн байна:

9.1. фермерийн анкет (энэхүү журмын 1 дүгээр хавсралтын дагуу);

 9.2. ажлын үзүүлэлтүүд (энэхүү журмын 2-4 дүгээр хавсралтын дагуу);

9.3. ажлын үзүүлэлт, тодорхойлолтын баталгаа (энэхүү журмын 5 дугаар хавсралтын дагуу);

9.4. аймаг, нийслэлийн хөдөө аж ахуйн асуудал хариуцсан байгууллагын газар дээр нь шалгасан дүгнэлт, тодорхойлолт, аймаг, нийслэлийн Засаг даргын зөвлөлийн хурлын шийдвэр, аймаг, нийслэлийн Засаг даргын хүсэлт.

10. Хөдөө аж ахуйн асуудал хариуцсан төрийн захиргааны төв байгууллага нь улсын аварга фермерээр шалгаруулахаар бүрдүүлж ирүүлсэн тодорхойлолт, материалыг хянан үзэж, шаардлагатай гэж үзвэл газар дээр нь шалгаж дүгнэлт гаргана.

Энэхүү журмын шаардлага, шалгуур үзүүлэлтийг хангасан хамгийн өндөр үзүүлэлт бүхий эрчимжсэн аж ахуй эрхлэгч фермерийн материалыг төрийн захиргааны төв байгууллагаар хэлэлцүүлэн саналаа Засгийн газарт оруулна.

            11. Мал, гахай, шувууны тоо, бүтээгдэхүүний дүнд бусдаас худалдан авсан болон өр төлбөр, бэлгэнд авсан мал, гахай, шувуу, бүтээгдэхүүнийг тооцохгүй.

            12. Эрчимжсэн мал аж ахуй эрхлэгчийг улсын аварга фермерээр зөвхөн нэг удаа шагнана.

            13. Энэ журам батлагдахаас өмнө нь улсын тэргүүний фермер болж байсан фермерийг “Улсын аварга фермер”-тэй адилтган үзэх бөгөөд дахин шагнахгүй.

Тав. Шагнал олгох

14. Улсын аварга фермер тус бүрийг 5.0 (таван) сая төгрөгөөр шагнана. Улсын аварга фермерт олгох цолны үнэмлэх, энгэрийн тэмдэг, дурсгалын цом худалдан авах хөрөнгийг мөнгөн шагналаас нь санхүүжүүлнэ.

15. Шагналыг билгийн тооллын хаврын тэргүүн сарын шинийн нэгний өмнө гардуулна. 

---оОо---

“Улсын аварга фермер шалгаруулах

журам"-ын 1 дүгээр хавсралт

                                       УЛСЫН АВАРГА ФЕРМЕРЭЭР ТОДОРХОЙЛЖ

                                                   БАЙГАА ФЕРМЕРИЙН ТОВЧ АНКЕТ

 он   сар   өдөр

 “Улсын аварга фермер шалгаруулах

  журам”-ын 2 дугаар хавсралт

УЛСЫН АВАРГА ФЕРМЕРЭЭР ТОДОРХОЙЛЖ БАЙГАА ................АЙМАГ (НИЙСЛЭЛ)-ИЙН ...........СУМ ДҮҮРЭГ)-ЫН СААЛИЙН ҮХРИЙН АЖ АХУЙ ЭРХЛЭГЧ ............ -НЫ АЖЛЫН ҮЗҮҮЛЭЛТ

он    сар    өдөр

----------------------------------- сум /дүүрэг/-ын

Засаг дарга -----------------------------------------                       /……………../

Мал эмнэлэг, үржлийн тасгийн дарга --------------------------------- /…………………/

 “Улсын аварга фермер шалгаруулах

                                                                                          журам”-ын 3 дугаар хавсралт

УЛСЫН АВАРГА ФЕРМЕРЭЭР ТОДОРХОЙЛЖ БАЙГАА .......................АЙМАГ

(НИЙСЛЭЛ)-ИЙН ..........СУМ (ДҮҮРЭГ)-ЫН МАХНЫ ҮХЭР (ХОНИНЫ)-ИЙН

 АЖ АХУЙ ЭРХЛЭГЧ ......... -НЫ АЖЛЫН ҮЗҮҮЛЭЛТ

 он    сар    өдөр

---------- сум /дүүрэг/-ын Засаг дарга ------------------------/………………………../

Мал эмнэлэг, үржлийн тасгийн дарга ------------------------------------ /……………………./

                                                                                                “Улсын аварга фермер шалгаруулах

                                                                                     журам”-ын 4 дүгээр хавсралт

        УЛСЫН АВАРГА ФЕРМЕРЭЭР ТОДОРХОЙЛЖ БАЙГАА ..............

АЙМАГ (НИЙСЛЭЛ)-ИЙН .............СУМ (ДҮҮРЭГ)-ЫН ГАХАЙ,

ШУВУУНЫ АЖ АХУЙ ЭРХЛЭГЧ ...... -НЫ АЖЛЫН ҮЗҮҮЛЭЛТ

он    сар    өдөр

Тайлбар: Үзүүлэлтийг сум, дүүргийн Засаг даргын Тамгын газар шалгаж баталгаажуулна.

-------------------------- сум /дүүрэг/-ын Засаг дарга -------------------------- /…………………./

Мал эмнэлэг, үржлийн тасгийн дарга ----------------------------------- /………………………/

                                                                                  “Улсын аварга фермер шалгаруулах

                                                                                    журам”-ын 5 дугаар хавсралт

УЛСЫН АВАРГА ФЕРМЕРЭЭР ТОДОРХОЙЛЖ  БАЙГАА .........................

АЙМАГ (НИЙСЛЭЛ)-ИЙН ...... СУМ (ДҮҮРЭГ)-ЫН ..........-ЫН АЖЛЫН

ҮЗҮҮЛЭЛТ, ТОДОРХОЙЛОЛТЫН БАТАЛГАА

он    сар    өдөр

 Тайлбар:

1. Холбогдох баримтыг хавсаргаагүй бол баталгаа хүчингүйд тооцогдоно.

2. Дээрх хавсралтад заасан үзүүлэлт бүрээр тус бүрчлэн баталгаа гаргана.

3. Фермерийн үйл ажиллагааны талаарх танилцуулга, холбогдох мэдээллийг тодорхой гаргаж ирүүлнэ.

-------------------------------------------------- сум /дүүрэг/-ын

Засаг дарга-------------------------------- /…………………../