Мэргэжлийн хяналтын ерөнхий газрын даргын 2017 оны

11 дүгээр сарын 01-ний өдрийн А/179 дугаар тушаалын нэгдүгээр хавсралт

ХООЛ ҮЙЛДВЭРЛЭЛ, ҮЙЛЧИЛГЭЭНИЙ ГАЗАРТ МӨРДӨХ ЭРҮҮЛ АХУЙ,

 ХАЛДВАР ХАМГААЛЛЫН ҮЛГЭРЧИЛСЭН ДҮРЭМ

Нэг. Нийтлэг үндэслэл

                 1.1.Эрүүл ахуйн тухай хуулийн 7 дугаар зүйлийн 7.2 дахь заалтад заасны дагуу хоол үйлдвэрлэл, үйлчилгээний газар нь үйл ажиллагаа, үндсэн зорилго, зорилт, чиг үүргээ хэрэгжүүлэхдээ өмчийн төрөл хэлбэр харгалзахгүй эрүүл ахуй, халдвар хамгааллын үлгэрчилсэн дүрэм (цаашид “дүрэм” гэх)-ийг баримтална.

                 1.2.Хоол үйлдвэрлэл, үйлчилгээний газар нь /цаашид хоолны газар гэх/ “Эрүүл ахуйн тухай”, “Төрийн хяналт шалгалтын тухай”, “Хүнсний тухай”, “Хүнсний бүтээгдэхүүний аюулгүй байдлыг хангах тухай”, “Нялх, балчир хүүхдийн хүнсний  тухай”, “Давс иоджуулж иод дутлаас сэргийлэх тухай”, “Органик хүнсний тухай”, “Архидан согтуурахтай тэмцэх тухай”, “Тамхины хяналтын тухай”, “Хэрэглэгчийн эрхийг хамгаалах тухай” хуулиуд болон бусад холбогдох хууль, тогтоомж тэдгээрт нийцүүлэн гаргасан дүрэм, журам, стандартыг үйл ажиллагаандаа удирдлага болгоно.

                 1.3.Хоол газрын үйл ажиллагааны үндсэн зорилго, зорилт нь эрүүл ахуй, ариун цэвэр, стандартын шаардлага хангасан барилга байгууламж, ажлын байранд зориулалтын багаж хэрэгсэл, техник, тоног төхөөрөмжөөр  мэргэжлийн болон мэргэшсэн хүн, чанар, аюулгүй байдлын шаардлага хангасан, батлагдсан жор, технологийн дагуу халуун, хүйтэн хоол, ундаа, зууш, нарийн боов,хоол үйлдвэрлэл явуулж үйлчилгээ үзүүлэхэд оршино.

                 1.4.Хоолны газар нь (рестарон, кафе, баар, гуанз, түргэн болон явуулын үйлчилгээтэй, эмнэлэг, сувилал, сургууль, ясли, цэцэрлэг, оюутан сурагчдын дотуур байр, цэргийн болон хорих ангийн дэргэдэх) Монгол Улсын холбогдох хууль, стандарт, энэхүү үлгэрчилсэн дүрмийг мөрдөж ажиллана.

               1.5.Хоолны газрын удирдлагын зүгээс хоол бэлтгэн нийлүүлэх бүх шатны төлөвлөлт, бэлтгэх, бүтээн байгуулах, засварлах, хадгалах, халуун боловсруулалт хийх, түгээлтийн үйл ажиллагаатай холбогдон үүсэх сөрөг үр дагавар, илэрсэн зөрчил дутагдлыг шуурхай арилгах ажлыг шууд хариуцан зохион байгуулна.

        1.6.Хоолны газар нь өөрийн үйл ажиллагааны онцлогтоо уялдуулан холбогдох хууль тогтоомж болон энэхүү дүрэмд нийцүүлэн дотоод хяналтын журмыг боловсруулан батлан мөрдөж, хяналт тавьж ажиллана.

                 Хоёр. Хоол үйлдвэрлэл, үйлчилгээний газрын барилга байгууламж, газар сонголтонд тавигдах шаардлага

                 2.1.Хоолны газрын барилга байгууламж барих газрын байршил тогтоох, барилгын зураг төсөл зохиох, шинээр барих,  ашиглалтад оруулах, өргөтгөх, зориулалтыг өөрчлөх тохиолдолд мэргэжлийн хяналтын байгууллагын  эрүүл ахуй, халдвар хамгааллын хяналтын  улсын байцаагчаар  дүгнэлт гаргуулна.

                 2.2.Тухайн барилга байгууламжийг барих барилгын материал нь эрүүл ахуйн аюулгүйн үзүүлэлт болон Барилгын тухай хуулийн 11 дүгээр зүйлд заасан шаардлагыг хангасан байна.

               2.3.Хоолны газрууд нь түүхий эд хадгалах өрөө, бэлтгэлийн өрөө, гэсгээх өрөө, угаалгын өрөө, халуун боловсруулалтын өрөө, зэрэг шаардлагатай өрөө тасалгааг технологийн дагуу зохион байгуулж, ажилчдын хувцас солих, амралтын, туслах байр, захиргаа аж ахуйн байр, ариун цэврийн болон техникийн байрууд /цахилгаан, дулаан, агааржуулалтын системийн эх үүсвэр байрласан өрөө гэх мэт/ байх ба түүхий эд, хүнсний бүтээгдэхүүн дамжин бохирдохоос хамгаалагдсан, эрүүл ахуйн зохистой дадал хэрэгжих боломжтойгоор зохион байгуулагдсан байна.

                 2.4.Дээрх байрууд болон орчны талбайг тогтмол цэвэр байлгана.

               2.5.Хана, шал, тааз, хаалга нь ус нэвтэрдэггүй, хүний эрүүл мэндэд сөрөг нөлөөгүй, хоргүй материалаар хийгдсэн байх ба цэвэрлэхэд хялбар гөлгөр гадаргуутай, аливаа тоноглол нь хир тоос, уур үл хуримтлагдах, хортон шавж мэрэгч үржиж үүрлэхээс сэргийлсэн, угаалга цэвэрлэгээ хийх технологийн нөхцөлтэйгээр төлөвлөгдсөн байна.

Гурав. Усан хангамж, ариун цэврийн байгууламжинд тавигдах шаардлага

3.1. Хоолны газар нь төвлөрсөн болон хэсгийн усан хангамжтай байх ба унд ахуйн зориулалтын шугам, хоолойгоор холбогдсон байх ёстой.

3.2. Ашиглаж буй ундны ус нь тухайн үед хүчин төгөлдөр мөрдөгдөж байгаастандартын шаардлагыг хангасан байх ба төвлөрсөн усан хангамжтай тохиолдолд жилд нэгээс доошгүй удаа, хэсгийн усан хангамжтай тохиодолд жилд хоёроос доошгүй удаа шинжилгээнд хамруулж, эрүүл ахуйн дүгнэлт гаргуулсан байна.

3.3. Зөөврийн усан хангамжтай тохиолдолд ундны усыг ус түгээх байр болон гүн өрмийн худгаас зориулалтын саваар битүүмжлэлтэйгээр зөөвөрлөж, эрүүл ахуйн шаардлага хангасан ус нөөцлөх саванд хадгалж 7 хоногт 1-ээс доошгүй удаа тогтмол угааж, халдваргүйжүүлэн хэрэглэх ба тухайн ундны усны эх үүсвэрээс тухайн жилийн лабораторийн шинжилгээний дүн, улсын байцаагчийн дүгнэлтийг авч хадгална.

3.4.Өөрийн эзэмшилдээ гүн өрмийн худагтай тохиолдолд паспортжуулсан, битүүмжлэл сайтай, эрүүл ахуйн хамгаалалтын бүсийг тогтоосон байна.

3.5. Ариун цэврийн өрөө нь зориулалтын угаалтуур, суултуур, шээлтүүр /писсуар/, хогийн сав, толь, гар хатаагч, цаасан сальфетка болон шингэн саван, халдваргүйтгэлийн бодис  хийх сав гэх мэт тоног, төхөөрөмжөөр бүрэн хангагдсан, хөгжлийн бэрхшээлтэй иргэд чөлөөтэй үйлчлүүлэх боломжтой  байна.

3.6. Хоолны газрын ариун цэврийн өрөө нь 15-20 хүн тутамд тус бүр 1 угаалтуур, суултуур болон шээлтүүр /писсуар/, шүршүүр байхаар төлөвлөж хийгдсэн, гар угаах хэрэгсэл нь халуун, хүйтэн устай, бие засах газарт орсны дараа гараа тогтмол угааж халдваргүйжүүлж байхыг анхааруулсан санамжийг зурган хэлбэрээр байрлуулна. Хэрэв хоол үйлдвэрлэл үйлчилгээний газар нь 15-аас дээш ажиллагсадтай тохиолдолд ариун цэврийн өрөөг тусад нь төлөвлөнө.

3.7. Бохир усны цооног, угаадасны нүх, нүхэн жорлон нь Нүхэн жорлон, угаадасны нүх, Техникийн шаардлагаMNS 5924:2015 стандартын шаардлага хангасан байх ба хоол үйлдвэрлэлийн хаалга, цонх, бараа буулгах хэсгээс 15 метрээс багагүй зайд ноёлох салхины доод талд /зүүн зүүн урд талд/ байрлуулсан байна.

Дөрөв. Ажлын байрны бичил цаг уурт тавигдах шаардлага

4.1.Хоолны газрын барилга байгууламж нь ердийн болон механик агааржуулалтын системтэй байна.

4.2.Ердийн агааржуулалтын системийн агаар дамжуулах хоолой нь агаарын солилцоог бүрэн хийх хүчин чадалтай байх, зэвэрдэггүй материалаар хийгдсэн, цэвэрлэхэд хялбар, агаар дамжуулах хоолойны орох, гарах хэсгүүдэд, цонх, салхивчны онгойдог хэсгүүдэд шавж, мэрэгч нэвтрэхээргүй торон хаалттай байна.

4.3.Механик агааржуулалтын систем нь Хөдөлмөрийн аюулгүй байдал. Үйлдвэрлэлийн эрүүл ахуй. Үйлдвэрийн барилгын салхивч, агааржуулалтын системд тавих ерөнхий шаардлага  MNS 5078:2001 стандартын шаардлагыг хангасан байна.

4.4.Халаалтын систем нь төвлөрсөн буюу хэсгийн шугамд холбогдсон байна.

4.5.Байгалийн болон зохиомол гэрэлтүүлэг хүрэлцээтэй байх ба худалдааны зааланд 540 люкс, агуулахад 220 люкс, хонгил бусад хэсэгт 110 люксээс багагүй байвал зохино.

4.6.Гадна орчны цаг уурын өөрчлөлтөөс үл хамааран хоолны газрын дотоод орчны агаарын хэм 15⁰С-22⁰С, агаарын харьцангуй чийглэг нь 30-60% байвал тохиромжтой бөгөөд худалдааны заал, хүнсний агуулахад хэм, чийглэг хэмжигчийг байрлуулан өдөрт хоёроос доошгүй удаа үзэж тэмдэглэл хөтөлнө.

4.7.Дотоод орчны агаарын хэм, харьцангуй чийглэг өөрчлөлт орсон тохиолдолд нэн даруй шаардлагатай арга хэмжээг авч хэрэгжүүлж хэвийн хэмжээнд хүргэнэ.

       Тав. Хоол үйлдвэрлэл, үйлчилгээний газрын төлөвлөлт, тоног, төхөөрөмж байршуулахад тавигдах шаардлага

5.1. Эрүүл ахуй аюулгүй байдлын шаардлагын дагуу түүхий эд хадгалах өрөө, бэлтгэлийн өрөө, гэсгээх өрөө, угаалгын өрөө, халуун боловсруулалтын өрөө, зэрэг шаардлагатай өрөө тасалгааг технологийн дагуу зохион байгуулж, ажилчдын хувцассолих, усанд орох, амрах, ариун цэврийн өрөө гэх мэт өрөө тасалгаагаар бүрэн хангагдсан байна.

5.2. Хоол үйлдвэрлэл, үйлчилгээ эрхэлж байгаа газрууд нь үйлчлүүлэгчийн болон бараа материал оруулах хаалгыг оршин суугчдын орох хаалганаас тусад нь төлөвлөсөн байх,

5.3.Бүтээгдэхүүнийг бүлэглэн, ангилж, төрөлжүүлэн технологийн дагуу байршуулах, хурааж хадгалах зарчмыг баримтлана. Тавиурын нүүрэн талд барааны бүлэг,нэр төрөл, байршил, нөөц тоо хэмжээ, агуулахад хүлээн авсан он, сар, өдөр зэрэг үзүүлэлтийг тодорхойлсон хаяг, тэмдэглэгээг хийсэн байна.

5.4. Жижиглэн савласан түүхий мах, сүү, цагаан идээ, өндөг зэрэг бүтээгдэхүүнийг бусад хүнсний бүтээгдэхүүнээс тусад нь хадгалах зориулалтын нөхцөлийг бүрдүүлсэн хөргөгч, хөлдөөгчинд хаягжуулан хадгалж хэрэглэнэ.

5.5. Хоол үйлдвэрлэл, үйлчилгээнд  зориулалтын тоног төхөөрөмж, багаж хэрэгсэл, сав, баглаа боодол хэрэглэнэ.

Зургаа. Хүнсний түүхий эд, бүтээгдэхүүн хүлээн авах, хадгалах, тээвэрлэхүеийн эрүүл ахуйн шаардлага

6.1. Хоолны газар нь хүнсний түүхий эд, бүтээгдэхүүнийг бараа хүлээн авах хэсэгт дараах байдлаар шалгаж хүлээн авна. Үүнд:

6.1.1. Хүнсний түүхий эд, бүтээгдэхүүнийг тээвэрлэх зориулалтын тээврийн хэрэгслээр тээвэрлэсэн тохиолдолд бараа хүлээн авах хэсэгт нэвтрүүлнэ.

6.1.2. Барааг хүлээн авахдаа гадна уут, сав, баглаа боодол нь эвдэрч, гэмтээгүй, мэдрэхүйн үзүүлэлтээр өнгө, үнэр, гадаад байдал нь муудаж өөрчлөгдөөгүй, хаяг, шошгын мэдээлэл нь бүрэн гүйцэд, үйлдвэрлэсэн он, сар, өдөр, хэрэглэх болон хадгалалтын хүчинтэй хугацааг нэг бүрчлэн шалгана.

6.1.3. Тухайн хүнсний түүхий эд, бүтээгдэхүүнийг дагалдах лабораторийн шинжилгээний сорилтын дүн, улсын байцаагчийн дүгнэлт, гарал үүслийн гэрчилгээ зэргийг ул мөрийг мөрдөн тогтоох бүртгэлийн хуудсын хамт заавал хүлээн авч, ул мөрийг мөрдөн тогтоох “урагш нэг шат” бүртгэлийн дэвтрийг хөтөлнө.

6.1.4. Хоолны газар хүнсний түүхий эд, бүтээгдэхүүнээ хүнсний сүлжээний дараагийн үе шатанд дагалдах лабораторийн шинжилгээний сорилтын дүн, улсын байцаагчийн дүгнэлт, гарал үүслийн гэрчилгээ зэргийг ул мөрийг мөрдөн тогтоох бүртгэлийн хуудсын хамт заавал хүлээлгэн өгч, ул мөрийг мөрдөн тогтоох “хойш нэг шат” бүртгэлийн дэвтрийг хөтөлнө.

 6.1.5. Барааг шалгаж хүлээн авах явцад сав, баглаа боодол нь урагдаж, гэмтсэн, муудсан, хаяг, шошгын зөрчилтэй, дагалдах бичиг баримтгүй, баталгаажилтгүй, хэрэглэх болон хадгалалтын хугацаа дууссан, хуурамч, ул мөрийг мөрдөн тогтоох бүртгэлийн хуудасгүй хүнсний түүхий эд,  бүтээгдэхүүнийг нэн дариу буцаах арга хэмжээ авч, бүртгэл хөтөлнө.

6.1.6. Хүнсний түүхий эд, бүтээгдэхүүний чанар муудсан, хурц үнэртэй, хүнсний бус бүтээгдэхүүнтэй хамт хадгалахыг хориглоно.

6.1.7. Хүнсний түүхий эд, бүтээгдэхүүнийг эхэлж орсон нь эхэлж гарах зарчмын дагуу, хамгийн доод хэсэгт түүхий, дунд хэсэгт, хагас боловсруулсан, хамгийн дээд хэсэг бэлэн бүтээгдэхүүнийг байрлуулах байдлаар лангуу хөргөгч, хөлдөөгчинд хэт чигжиж ачааллыг хэтрүүлэхгүйгээр өрнө.

Долоо. Бэлэн хоол, хүнсийг борлуулах, түгээх үед тавигдах шаардлага

7.1. Бэлэн хоол, зууш, ундыг халуун, хүйтэн байлгах төхөөрөмжөөс зориулалтын халбага, хутгуур, хавчаарыг ашиглаж олгоно.

7.2. Хоолны цэсэнд, жин, илчлэгийг тооцооны аргад тулгуурласан тооцоо, махны гарал үүсэл,  хэрэглэсэн амтлагчийн нэрийг үнэн бодит мэдээлсэн байна.

7.3. Хоол үйлдвэрлэлд дараахь зарчмыг баримтална. Шөлтөй хоолыг +75˚С-аас доошгүй хэмд, хоёрдугаар хоолыг +65˚С-аас доошгүй хэмд хадгалж бүртгэнэ. Бүх төрлийн шөл, битүү жигнэж болгосон шөлийг +70˚С-аас дээш хэмд хадгална. Хэмжих хэрэгсэлгүй бол шөлийг халааж 1 минут буцалгасны дараа үйлчилгээнд гаргана. Бусад хоолыг +65˚С-аас доошгүй хэмд хадгална.

7.4. Болгосон хоолыг тасалгааны хэмд хадгалдаг бол 2 цагийн дотор хэрэглэх ёстой. Хэрэв энэ хугацаа 2 цагаас дээш өнгөрсөн бол шууд устгана. Хүйтэн хоол, зууш, салатыг +5˚С хэмд хадгалж бүртгэл хөтөлнө. /+4˚-өөс 8˚С хэмийг зөвхөн хүнсний бүтээгдэхүүн боловсруулах үйлдвэр, цехүүдэд мөрдөнө./ Харин нийтээр үйлчлэх хоол үйлдвэрлэл, үйлчилгээний хувьд +2˚-4˚С байж болно. Хөргөсөн хоолыг +4˚С хэмээс ихгүй температурт хадгалдаг, гүний температурыг хэмжиж, хугацааг тэмдэглэнэ.

7.5. 0.025 мм болон түүнээс бага зузаантай бүх төрлийн нийлэг хальсан уутыг баглаа боодлын зориулалтаар хэрэглэх, богино долгионы зууханд халааж хэрэглэхийг хориглоно.

7.6. Хоолны гүний температурыг хэмжигч багажийг хэрэглэхийн өмнөүргэлж цэвэрлэж, халдваргүйжүүлнэ.

7.7. Халуун боловсруулалт хийсэн хоолны үлдэгдлийг шууд устгаж тэмдэглэл хөтөлнө. Өдөрт хийсэн хоол, бэлтгэсэн болон өдрийн төгсгөлд хэдий хэмжээний илүүдэл хоолыг хаясан талаар бүртгэлтэй байна.

 Найм. Хоолны хордлого, халдвараас урьдчилан сэргийлэх

8.1. Хоолны газар нь хоолны хордлого, халдвар гаргахгүй байх асуудлыг бүрэн хариуцаж, үүсэх шалтгаан түүнээс урьдчилан сэргийлэх талаар байгууллагынхаа ажилчдад эрүүл ахуйн сургалт, сурталчилгааг зохион байгуулна.

8.2. Бэлтгэсэн хоолны бүх төрлийг үйлчилгээнд гаргахын өмнө ерөнхий (ахлах) тогооч тэдгээрийн амт, үнэр, өнгө, үзэмж, жор найрлага, боловсруулалт зэрэгт чанарын шалгалт хийж үйлчилгээнд гаргах зөвшөөрөл олгож энэ тухай албан ёсоор тэмдэглэл хөтөлнө.

8.3. Бүтээгдэхүүний дээжийг журмын дагуу авч зориулалтын хөргөгчид 40⁰С температурт 48 цаг хадгалах, хоолны дээж авалтын бүртгэлийг хөтөлж, дээжийн савыг ариутгаж хэвшинэ.

8.4. Хоолны үлдэгдлийг дахин ашиглах, гурил, будаа, гоймон, хуурай өндөг зэрэг зарим материалыг урьдчилан боловсруулж хонуулах, түүгээр хоол унд хийхийг  хориглоно.

8.5.Үйлчлүүлсэн хүмүүсийн дунд хоолны хордлого, халдвар гарсан тухай мэдээг хүлээн авсан хоолны газрын ямарч ажилтан нь дор дурдсан арга хэмжээг яаралтай авна. Үүнд:

а. Өөрийн байгууллагын удирдлагад мэдэгдэж үйлчилгээ, үйлдвэрлэлийг зогсооно.

б. Харъяа өрх, дүүргийн эрүүл мэндийн төв, мэргэжлийн хяналтын байгууллагад шуурхай мэдээлнэ.

в. Үйлчилсэн халуун, хүйтэн хоол, ундаа, зуушны үлдэгдэл, хоолны хэрэглэлийг цэвэрлэж угаалгүйгээр эмч, эрүүл ахуй халдвар хамгааллын хяналтын улсын  байцаагчдыг  ирэх хүртэл хадгална.

г. Хоолны газарт хоолны хордлого, халдвар гарсан тухай яаралтай мэдээг хүлээн авсан эмнэлэг, мэргэжлийн хяналтын байгууллага нь тухайн газар яаралтай очиж  хордлого үргэлжлэх, гарах нөхцөлийг таслан зогсоох арга хэмжээ авч хордлого гарсан шалтгааныг зааврын дагуу шалгана.

8.6.Эрүүл ахуйн нөхцөл, шаардлагыг сайжруулах, эрүүл ахуйн зохистой дадлыг зөв хэвшүүлэх ажлыг зохион байгуулж, байгууллагын төсөвт хөдөлмөр хамгааллын хувцас, хэрэгсэл, угаалга халдваргүйтгэлийг бодисын санхүү,  сургалтын төсвийг баталсан байна.

8.7. Хоол хүнсээр дамжих хурц болон архаг өвчин үүсгэх, хүнсний бохирдол,  эрүүл ахуйн нөхцөл, шаардлагыг сайжруулах, эрүүл ахуйн зохистой дадлыг зөв хэвшүүлэх  сургалтыг мэргэжлийн эрүүл ахуй, халдвар хамгааллын хяналтын улсын / ахлах/ байцаагч  нараар  хийлгүүлж,аливаа  өвчнөөс урьдчилан сэргийлэх ажлыг хийнэ.

Ес. Бүртгэл, баримт хөтлөх

9.1. Хоолны газрын үйл ажиллагааны төрөл, хэлбэрээс хамааран өөр өөрийн онцлогт тохирсон бүртгэлийг хөтөлнө. Үүнд:

• Эрүүл мэнд, ариун цэврийн үзлэгийн бүртгэл
• Мэргэжлийн сургалтын талаарх бүртгэл
• Хөргөх төхөөрөмж, камер, хөргөгчний хэмийн бүртгэл
• Лабораторийн сорилтын дүнгийн бүртгэл
• Их цэвэрлэгээ, ариутгал, халдваргүйжүүлэлтийн бүртгэл
• Хортон шавж устгалын бүртгэл
• Тоног төхөөрөмжийн засвар, үйлчилгээний бүртгэл
• Хүнсний түүхий эд, бүтээгдэхүүний ул мөрийг мөрдөн тогтоох бүртгэл
• Хүнсний түүхий эд, бүтээгдэхүүний ул мөрийг мөрдөн тогтоох “Урагш нэг шат” бүртгэл
•  Хүнсний түүхий эд, бүтээгдэхүүний ул мөрийг мөрдөн тогтоох “Хойш нэг шат” бүртгэл
• Шаардлага хангахгүй хүнсний түүхий эд, бүтээгдэхүүний устгалын бүртгэл
• Дээжийн бүртгэл
• Хоол, хүнсэнд хийгдсэн температурын бүртгэлүүд
• Өдөрт хийсэн, бэлтгэсэн хоол, хүнс, илүү гарсан хоол, хүнс, түүнийг устгаж хаясан бүртгэл үйлдвэрлэлийн зохистой дадлын бүх бүрэлдэхүүн хэсгүүдэд бүртгэл хөтөлнө.

 9.2. Тээвэрлэлт, түгээлтийн бүртгэл,хоол хүнсэнд хийгдсэн температурын бүртгэл зэргийг дотооддоо загвар боловсруулж хөтөлнө.

 9.3. Бүртгэх ажиллагаа нь аль болох хялбар, ойлгомжтой байна. Бүртгэлүүдийн хөтлөлтөд дотоод хяналт хариуцсан ажилтан хянаж, үнэлгээ өгнө.

 9.4. Баримт бичгийн агуулга нь хоёрдмол утгагүй байх бөгөөд гарчиг, үндсэн шинж чанар болон зорилго нь тодорхой томьёологдсон байна. Баримт, бүртгэлийг компьютер, фото зураг гэх мэт найдвартай бусад аргуудаар бүртгэж болно.

         9.5. Бүртгэлийг бүрэн гүйцэт (ойлгомжтой, гаргацтай, арилахааргүй), бодиттой хөтөлнө. Бүртгэлийг нэгдсэн товъёогтой болгож, бүтээгдэхүүний хадгалалтын хугацаа дууссанаас хойш нэг жилээс доошгүй хугацаанд архив бичиг хэргийн стандартын дагуу хадгална.

         9.6. Бүртгэлийг эрх бүхий этгээд тогтмол хянаж, он, сар, өдрийг тэмдэглэн гарын үсэг зурж баталгаажуулна. Хоол үйлдвэрлэлийн бодит нөхцөлийн талаар хөтөлсөн бүртгэл нь ямар нэг асуудал гарсан тохиолдолд шалтгааныг тодруулж, асуудлыг шийдвэрлэхэд тусална. Бүртгэл, баримтанд өөрчлөлт оруулахыг хориглоно. Хуулбарласан тохиолдолд баталгаажуулна.

                 Арав. Ажилчдын хувийн ариун цэвэр, эрүүл ахуйн шаардлага

10.1. Хүнсний түүхий эд, бүтээгдэхүүнийг гардан боловсруулдаг, үйлдвэрлэдэг, тээвэрлэдэг, худалддаг, түүгээр үйлчилгээ үзүүлдэг хүнсний бүтээгдэхүүн болон хэрэглэх эд зүйлстэй биечлэн харьцдаг ажилтан ажиллагсад эрүүл мэндийн урьдчилан сэргийлэх үзлэг, шинжилгээнд 6 сар тутамд хамрагдсан байна. Ажилтан халдварт өвчнөөр өвчилсөн, эсхүл ийм өвчтөнг асарсан тохиолдол бүрд тухайн ажилтныг эрүүл мэндийн үзлэгт хамруулсны дараа ажиллуулна. 

10.2. Ажиллагсдын халдварт өвчний нян тээгч болох нь илэрсэн, гэр бүлийн хүмүүсээс гоц халдварт өвчнөөр өвчилсөн тохиолдолд халдварын эсрэг арга хэмжээ авах хүртэл уг хүнийг ажиллуулахыг түр хориглоно.

10.3. Ажиллагсад үйлдвэрлэлийн байранд хөдөлмөр хамгааллын хувцсаар /халад, цамц, гутал, хормогч бээлий, үсийг бүрэн халхлахуйц толгойны өмсгөл зэрэг/ хангагдсан, бүрэн  өмсөж хэвшсэн байна.

10.4. Ажилчид хумсаа ургуулах, ажлын үед уруулаа будах, ажлын гар утас байлгах, гартаа цаг, бөгж  бусад зүүлт зүүхийг  хориглох ба гарын ариун цэврийг чанд сахина.

10.5. Ажилчид халуун усанд орж, хувийн болон арьс, салст, гар хурууны эрүүл ахуй, ариун цэврийг сайтар сахиж, гараа тогтмол цэвэр байлгах, ил болон халдвар авсан шархгүй байна.

10.6. Хоолны газар нь ажилчдын биед тохирсон, 2-оос доошгүй ээлжийн хөдөлмөр хамгааллын хувцас, хэрэгсэл, мөн үс далдлах зориулалтын малгай, алчуур, нэг удаагийн хэрэглээний бээлий, улавч зэрэг бусад шаардлагатай зүйлээр тасралтгүй хангах үүргийг хүлээнэ.

10.7. Хүнстэй харьцах хэсэгт ажилладаг хүн бүр гараа гоожуурын /халуун/ бүлээн усаар тохирох угаалгын бодис, саван хэрэглэн гар бохирдох бүрд угаана. Ялангуяа бие зассаны дараа, бохир болон түүхий материалтай харьцаж ажилласны дараа, ажил эхлэхийн өмнө гараа заавал угааж хэвшинэ.

10.8.Хоолны газрын үйл ажиллагаатай танилцахаар ирсэн зочдод дотоод журам, ариун цэврийн дэглэм, хүнсний аюулгүй байдлыг сахих талаар урьдчилан ойлгуулж танилцуулна.

10.9. Эрсдэлтэй цэгүүдэд нэвтрүүлэх шаардлага гарсан үед халдварт өвчнүүдийн талаар асуумж авч нэвтрүүлнэ. Үйлдвэрлэлийн үйл ажиллагааны онцлогт тохирсон “халдвар” судалгааны асуумжийн хуудсыг гаргаж, шаардлагатай тохиолдолд хөтөлнө.

10.10. Гадны хүмүүс, зочдод зориулсан хамгаалах өмсгөлийн нөөцтэй байна.

Арван нэг. Цэвэрлэгээ, угаалга, халдваргүйтгэлд тавих эрүүл ахуйн шаардлага

11.1. Хоолны газар нь их цэвэрлэгээ, ариутгал, халдваргүйтгэлийн хөтөлбөр, төлөвлөгөөг боловсруулан баталгаажуулж, түүний хэрэгжилтэнд хяналт тавина.

11.2. Угаалга цэвэрлэгээнд эрх бүхий байгууллагаас зөвшөөрсөн угаалгын нунтаг, саван, ариутгал, халдваргүйтгэлийн бодис, уусмал хэрэглэнэ.

11.3. Цэвэрлэгээг байнгын, өдөр тутмын, урсгал, их цэвэрлэгээ гэж ангилна. Их цэвэрлэгээ, ариутгал, халдваргүйтгэлийн хөтөлбөр, төлөвлөгөөнд  тусгаж,  тэмдэглэл хөтлөнө.

11.4. Их цэвэрлэгээг 7 хоногт нэгээс доошгүй удаа, төгс цэвэрлэгээг бохирдолтын байдлаас шалтгаалан 2-3 сар тутамд хийх ба таазны хэсгээс эхлэн хана, цонх, шал гэсэн дээрээс доош уруудах чиглэлээр, тоног, төхөөрөмж, лангуу тавиур, эд хогшлыг бүрэн гүйцэт хамруулан хийнэ. Төгс цэвэрлэгээг хийхдээ том овортой тоног төхөөрөмжүүдийг байрнаас нь хөдөлгөх, цахилгаанаас салгах, таазыг цэвэрлэх зэрэгт аюулгүй ажиллагааг хангасан нөхцөлд хийнэ.

11.5. Өдөр тутмын урсгал цэвэрлэгээг өдөрт 2-с доошгүй удаа буюу бохирдсон тухай бүр хийх зааврын дагуу зориулалтын цэвэрлэгээний бодис, багаж хэрэгслээр хийдэг хуваарьтай, бүртгэл хөтөлж, гүйцэтгэлд нь дотоодын хяналт тавьж хэвшинэ.

11.6. Угаалга, цэвэрлэгээ, ариутгал, халдваргүйтгэлийн заавар, аргачлалд хоолны газрын тоног төхөөрөмж, тээврийн хэрэгслэлүүдийг угаах, цэвэрлэх, ариутгаж халдваргүйжүүлэх, ямар алчуур, сойз, угаалгын бусад хэрэгслэлүүдийг хэрэглэх, тэдгээрийг хэрэглэсний дараа хэрхэн цэвэрлэж, халдваргүйжүүлэхийг тусгана.

11.7. Барилга байгууламжийн хана, шал, таазны материал, тоног төхөөрөмжийн хүнстэй хүрэлцэх гадаргуу, үйлдвэрлэж буй бүтээгдэхүүний онцлог зэргээс хамааран нян, вирусийг үхүүлэх, үржлийг нь зогсоох үйлчилгээ, тухайн бодисуудад тэсвэрлэх /чанар/ чадвар зэргийг харгалзан ариутгал, халдваргүйтгэлийн бодис, уусмал, ариутгах, халдваргүйжүүлэх аргыг сонгоно.

11.8. Ариутгал /халдваргүйтгэл /-ын үр дүн нь анхны угаалга, цэвэрлэгээг бүрэн, гүйцэд хийсэн эсэх, хэрэглэж буй бодисын уусмалын концентраци, найруулалт, чанар, түүний хадгалалтаас шалтгаална.

11.9.Хортон шавж, мэрэгчдээс урьдчилан сэргийлж, мэрэгчгүйтгэл, шавжгүйтгэлийг тусгай зөвшөөрөлтэй байгууллагаар гэрээний үндсэн дээр хийлгэж, хийлгэсэн тухай актыг хадгалж, тэмдэглэл хөтөлсөн байна.

Арван хоёр. Хариуцлага

12.1. Үлгэрчилсэн дүрмийг зөрчсөн, эрүүл ахуйн зохистой дадлыг хэрэгжүүлж ажиллаагүй, хоол хүнснээс үүдэлтэй хордлого, халдвар гарсан буюу гарч болзошгүй нөхцөл байдал үүссэн тохиолдолд холбогдох хууль тогтоомжийн дагуу хариуцлага тооцно.

---оОо---