Татварын ерөнхий газрын даргын

2020 оны 9 дүгээр сарын 3-ны өдрийн

 А/133 дугаар тушаалын 11 хавсралт

УЛС БҮРЭЭР ҮНЭ ШИЛЖИЛТИЙН ТАЙЛАНГИЙН МЭДЭГДЛИЙН

МАЯГТЫГ НӨХӨХ ЗААВАР

Энэхүү мэдэгдлийг Аж ахуйн нэгжийн албан татварын тухай хуулийн 27 дугаар зүйлийн 27.7-д заасны дагуу өмнөх санхүүгийн жилд группийн нэгтгэсэн санхүүгийн тайлангаар 1.7 их наяд төгрөгөөс дээш орлого бүхий улс бүрээр тайлан гаргах үүрэг хүлээсэн группийн оролцогч гаргана.

Мэдэгдэл нь улс бүрээр тайлан гаргах үүрэг бүхий группийн эцсийн толгой аж ахуйн нэгж /Ultimate Parent Entity/ эсхүл томилогдсон толгой аж ахуйн нэгж /Surrogate parent entity/ нь Монгол Улсад болон гадаад улсад татварын зорилгоор оршин суудаг эсэх, эсхүл мэдэгдэл гаргах үүрэгтэй эсэхийг тодорхойлох зорилготой.

Энэхүү мэдэгдлийг Монгол Улсад байрладаг бүх группийн оролцогчийн өмнөөс нэг оролцогч эсхүл Монгол Улсад байрладаг бүх оролцогч тус тусдаа тухайн жилийн аж ахуйн нэгжийн орлогын албан татварын тайланг гаргах өдөрт багтаан гаргана. Мэдэгдлийн маягтын бүх мэдээллийг монгол, англи хэл дээр бүрэн оруулна.

1. ҮДГ-ийн Монгол улсад байрладаг аж ахуйн нэгж /төлөөний газар/-ийн мэдээлэл хэсэгт:

1.Татварын албанаас олгосон дугаарыг бичнэ;

2.Улсын бүртгэлийн гэрчилгээн дээр бичигдсэн нэрийг бичнэ. Төлөөний газрын хувьд гадаад улсад байрладаг аж ахуйн нэгжийн нэрийг бичнэ.

3.Энэ тайлантай холбоотой мэдээлэл өгөх, авах дотоодын аж ахуйн нэгжээс томилогдсон холбоо барих хүний овог, нэрийг бүтнээр бичнэ.

4.Холбоо барих утасны дугаар;

5.Тайлангийн мэдэгдлийн талаар мэдээлэл авах цахим шуудангийн хаяг;

6.Аж ахуйн нэгжийн орлогын албан татварын тухай хуулийн 27.1.11-д заасны улс бүрээр тайлан гаргах тайлант жилийн санхүүгийн эхлэх, дуусах огноо;

7.Энэ маягтыг Монгол Улсад байрладаг бүх группийн оролцогчийн өмнөөс гаргаж байгаа эсэхийг заана.

Хэрэв тийм бол IV хэсэгт заасан Монгол Улсад байрладаг бүх оролцогчийн талаарх мэдээллийг оруулна уу. Хэрэв үгүй бол Монгол Улсад байрладаг группийн оролцогч бүр тус тусдаа энэ тайланг гаргана.

II.ҮДГ-ийн эцсийн толгой аж ахуйн нэгжийн дэлгэрэнгүй мэдээлэл хэсэгт:

Энэ хэсэгт Аж ахуйн нэгжийн татварын тухай хуулийн 27 дугаар зүйлийн 27.1.12-т заасны дагуух ҮДГ-ийн толгой этгээдийг тодорхойлно.

1.Группийн нэрийг англи хэл дээр бичнэ;

2.Татвар төлөгчөөр бүртгэгдсэн улсаас олгосон татвар төлөгчийн дугаарыг бичнэ;

3.Эцсийн толгой компанийн нэрийг англи хэл дээр бичнэ. Гадаад улсын толгой компани эсхүл удирдлага нь Монгол Улсад байрладаггүй тохиолдолд уг этгээдийн нэрийг англи хэл дээр бичнэ;

4.Монгол Улсад байрладаггүй гадаад улсын толгой компани эсхүл удирдлагын нэрийг бүртгэгдсэн улсын албан ёсны хэл нь англи хэл биш бол эх хэл дээр бичнэ;

5.Байнгын татвар төлөгчөөр бүртгэгдсэн улсын кодыг тогтмол мэдээллээс сонгоно;

6.Байнгын хаяг, хэрэв байнгын хаяг байхгүй тохиолдолд улс, хотын нэрийг бичнэ;

7.Эцсийн толгой компани нь улс бүрээр тайланг бүхэлд нь группийг төлөөлөн гаргаж байгаа эсэхийг заана;

8.Улс бүрээр тайланг группийн томилогдсон этгээд группийн нэрийн өмнөөс гаргаж байгаа эсэхийг заана. Хэрэв тийм гэж хариулсан бол мэдэгдлийн III хэсгийг, хэрэв үгүй бол IV хэсгийг бөглөнө.

III.ҮДГ-ийн өмнөөс тайлан гаргахаар томилогдсон аж ахуйн нэгжийн мэдээлэл хэсэгт:

Энэ хэсэгт группийн өмнөөс тайлан гаргах томилогдсон эрх бүхий аж ахуйн нэгж байгаа эсэхийг тодорхойлно. Группийн эцсийн толгой компанийн нэрийн өмнөөс болон нэмэлтээр тайлан гаргах аж ахуйн нэгжийн дараах мэдээллийг оруулна.

1.Татвар төлөгчөөр бүртгэгдсэн улсаас олгосон татвар төлөгчийн дугаарыг бичнэ;

2.Томилогдсон аж ахуйн нэгж нь Монгол улсад байрладаггүй тохиолдолд уг этгээдийн нэрийг англи хэл дээр бичнэ;

3.Томилогдсон аж ахуйн нэгжийн бүртгэгдсэн улсын албан ёсны хэл нь англи хэл биш бол эх хэл дээр бичнэ;

4.Байнгын татвар төлөгчөөр бүртгэгдсэн улсын кодыг тогтмол мэдээллээс сонгоно;

5.Байнгын хаяг, хэрэв байнгын хаяг байхгүй тохиолдолд улс, хотын нэрийг бичнэ.

IV.ҮДГ-ийн Монгол Улсад байрладаг группийн бүх оролцогч аж ахуйн нэгжийн мэдээлэл хэсэгт:

1.Монгол улсын татварын албанаас олгосон татвар төлөгчийн дугаарыг бичнэ;

2.Оноосон нэрийг улсын бүртгэлийн гэрчилгээнд бичигдсэн нэрээр бичнэ.

Аж ахуйн нэгж нэмэх бол "Шинэ аж ахуйн нэгж нэмэх" гэсэн товчлуурыг дарна уу.

Мэдэгдэл гаргагч нь I-IV хэсгийн мэдээллийг илгээхээс өмнө алдаатай эсэхийг нягтлан шалгах бөгөөд мэдэгдлийг илгээсний дараа таны цахим шуудангийн хаягт тайлангийн мэдэгдлийг хүлээн авсан тухай татварын албанаас хариу захидал илгээгдэнэ.

Хэрэв танд мэдэгдлийг хүлээн авсан тухай цахим шуудан ирээгүй болон мэдэгдэл гаргахтай холбоотой лавлах зүйл байгаа тохиолдолд Татварын ерөнхий газрын Олон улсын татварын асуудал хариуцсан нэгжид хандана уу.

ТАТВАРЫН ЕРӨНХИЙ ГАЗАР