ЗАСГИЙН ГАЗРЫН ТОГТООЛ

2005 оны 6 дугаар сарын 7-ны өдөр

Дугаар 119

Улаанбаатар хот

ДҮРЭМ ШИНЭЧЛЭН БАТЛАХ ТУХАЙ (Үндэсний их баяр наадмын хурдан морины уралдааны дүрэм)

Үндэсний их баяр наадмын тухай хуулийн 11.1.1-ийг үндэслэн Монгол Улсын Засгийн газраас ТОГТООХ нь :

1. "Үндэсний их баяр наадмын хурдан морины уралдааны дүрэм"-ийг хавсралт ёсоор шинэчлэн баталсугай

2. Засгийн газрын шийдвэрээр хийж байгаа шигшмэл, бүсийн уралдааныг тухайн шатны Засаг дарга, Үндэсний баяр наадмыг зохион байгуулах хорооны хурдан морины салбар хороо, биеийн тамир, спортын асуудал эрхэлсэн төрийн захиргааны төв байгууллага, морин спортын холбоод хамтран зохион байгуулж байх нь зүйтэй гэж үзсүгэй

3. Намрын сүүл сараас хаврын тэргүүн сарын шинийн 3-ныг хүртэлх хугацаанд аймаг, сумын хэмжээнд хурдан морины уралдаан зохион байгуулахгүй байхыг аймаг, сумдын Засаг дарга нарт даалгасугай.

4. Хурдан морины 2005 оны бүсийн уралдааны хуваарийг дор дурдсанаар тогтоосугай:

-хангайн бүсийн хурдан морины уралдааныг Өвөрхангай аймагт;

-баруун бүсийн хурдан морины уралдааныг Увс аймагт;

-"Дүнжингаравын хурд-2005" төвийн бүсийн хурдан морины уралдааныг Төв аймагт;

-"Дорнод монголын хурд-2005" зүүн бүсийн хурдан морины уралдааныг Дорнод аймагт.

5. Хаврын уралдаанд азарга, соёолонг 16 км, их насны морьдыг 18 км зайд уралдуулж байхаар тогтоосугай.

Монгол Улсын Ерөнхий сайд Ц.ЭЛБЭГДОРЖ

Монгол Улсын Шадар сайд Ч.УЛААН