ЗАСГИЙН ГАЗРЫН ТОГТООЛ

ДҮРЭМД НЭМЭЛТ, ӨӨРЧЛӨЛТ ОРУУЛАХ ТУХАЙ

2006 оны 6 дугаар сарын 28-ны өдөр

Улаанбаатар хот

Дугаар 148

Үндэсний их баяр наадмын тухай хуулийн 11.1.1-ийг үндэслэн Монгол Улсын Засгийн газраас ТОГТООХ нь:

Засгийн газрын 2005 оны 6 дугаар сарын 7-ны өдрийн 119 дүгээр тогтоолоор батлагдсан "Үндэсний их баяр наадмын хурдан морины уралдааны дүрэм"-д дор дурдсан нэмэлт, өөрчлөлт оруулсугай:

1. Дүрмийн 3.1-д "3.1.7. уяач нь унаач хүүхдийн төрсний гэрчилгээ болон эрүүл мэндийн даатгалын гэрчилгээг бүрдүүлсэн байх;", "3.1.8. уяач нь уралдааны үед мориноос унаж бэртэж гэмтсэн унаач хүүхдийн талаар эрүүл мэндийн болон хүүхдийн эрхийг хамгаалах байгууллагад заавал мэдэгдэж, дэмжлэг туслалцаа үзүүлсэн байх." гэсэн 7, 8 дахь заалтыг, мөн дүрмийн 5.4-т "унаач хүүхдийн биед" гэсний дараа "хойд, урд талаас нь" гэж, 6.5-д "даамлын дохиогоор эргээгүй" гэсний дараа "болон замаас оруулсан" гэж, 7.4-т "Уралдааны" гэсний дараа "үед унаач хүүхэд унаж бэртэх, уралдааны" гэж тус тус нэмсүгэй;

2. Дүрмийн 7.6-г "Салбар хороо нь энэхүү дүрмийн 6.3, 7.1, 7.2, 7.4, 7.7-д заасан нөхцөлөөр тээврийн хэрэгсэлд морины уралдаан дагах таних тэмдэг бүхий зөвшөөрөл олгох бөгөөд Салбар хорооны зөвшөөрөлгүй тээврийн хэрэгслээр морины уралдаан дагахыг хориглоно" гэж, мөн дүрмийн 9.1-ийн эхний өгүүлбэрийг "Баяр наадамд түрүүлсэн, айрагдсан морьдыг эзэн, уясан уяач, унаач хүүхдийн нэрээр цоллон алдаршуулж, бай шагналыг наадамчдын өмнө олгоно" гэж тус тус өөрчлөн найруулсугай;

3. Дүрмийн 2.5.3-ын "хүүхдийн хамгаалалтын малгай" гэснийг "тусгай зориулалтын хамгаалалтын малгай" гэж, дүрмийн 5.2.1-ийн "төрсний гэрчилгээ" гэснийг "төрсний гэрчилгээ болон эрүүл мэндийн даатгалын гэрчилгээ" гэж, 9.2-ын "20 хувь нь" гэснийг "20-иос доошгүй хувь нь" гэж, 10.1-ийн "оролцсон морины тоо," гэснийг "оролцсон морьд, унаач хүүхдийн тоо" гэж тус тус өөрчилсүгэй.

Монгол Улсын Ерөнхий сайд М.ЭНХБОЛД

Монгол Улсын сайд, Засгийн газрын Хэрэг эрхлэх газрын дарга С.БАТБОЛД