ЗАСГИЙН ГАЗРЫН ТОГТООЛ (ЗАХИРАМЖ)

ЗУДЫН ЦАГИЙН БАЙДАЛТАЙ ХОЛБОГДУУЛАН АВАХ ЗАРИМ АРГА ХЭМЖЭЭНИЙ ТУХАЙ

2000 оны 12 дугаар сарын 6-ны өдөр

Улаанбаатар хот

Дугаар 189

Төвийн болон баруун зарим аймгийн нутагт зуд болж, мал өвөлжилтийн байдал хүндэрч байгаатай холбогдуулан Монгол Улсын Засгийн газраас ТОГТООХ НЬ:

1. Хүнс, хөдөө аж ахуйн сайд Д.Насанжаргалд ДААЛГАХ НЬ:

а/ улсын нөөцөд төвлөрүүлэх өвс, тэжээлийг мал өвөлжилтийн байдал хүндэрч байгаа аймгуудын саналыг үндэслэн зохих графикийн дагуу тээвэрлэн байршуулах, тэдгээрийг эргэж төлөгдөх нөхцөлтэйгээр хуваарилан хүргүүлэх арга хэмжээ авч байсугай;

б/ зарим аймагт мал өвөлжилтийн байдал хүндэрч байгаатай холбогдуулан малын эм бэлдмэл, био идэвхт болон сүү орлох тэжээлийг холбогдох мэргэжлийн байгууллагуудад захиалга өгч үйлдвэрлүүлэн шаардлагатай аймгуудад хүргүүлсүгэй;

в/ өвөлжилтийн байдал хүндэрсэн аймгуудад улсын нөөцөөс эхний ээлжинд өвс, тэжээлийг урьдчилан үнэгүйгээр хүргүүлж, уг нөөцийг тусламжийн хөрөнгөөр нөхөн бүрдүүлсүгэй.

2. Зудтай байгаа аймаг, сумдын хүн эмнэлгийг зайлшгүй шаардлагатай эм, эмнэлгийн материалын нөөцтэй болгох, малчдад үзүүлэх эмнэлгийн тусламжийн үйлчилгээг сайжруулах, сум, багийг богино долгионы холбооны хэрэгслээр хангах ажлыг шуурхай зохион байгуулан хэрэгжүүлэхийг Эрүүл мэндийн сайд П.Нямдаваа, Дэд бүтцийн сайд Б.Жигжид, Хүнс, хөдөө аж ахуйн сайд Д.Насанжаргал нарт даалгасугай.

3. Батлан хамгаалахын сайд, Улсын байнгын онцгой комиссын дарга Ж.Гүррагчаад ДААЛГАХ нь:

а/ туулах чадвар сайтай машин механизмын цуваа, хүн хүчийг 12 дугаар сарын 10-наас эхлэн тодорхой хугацаагаар дайчлан гаргаж, өвөлжилтийн байдал хүндэрсэн нутгаас малчдыг нүүлгэн шилжүүлэх, түлш шатахуун, өвс, тэжээл тээвэрлэх, зам гарц гаргах болон малчдад эмнэлгийн үйлчилгээ үзүүлэхэд туслуулахаар Увс, Завхан, Баянхонгор, Говь-алтай аймагт ажиллуулсугай;

б/ өвөлжилт хүндэрсэн аймаг, сум, малчдад хүмүүнлэгийн тусламж үзүүлэх ажилд Монголын улаан загалмайн нийгэмлэг, түүний орон нутгийн байгууллагыг татан оролцуулах арга хэлбэрийн талаар тохиролцон хэрэгжүүлсүгэй.

4. Авто тээврийн зарим зам, даваа хаагдсанаас мал өвөлжилтийн байдал хүндэрч байгаа аймгуудад баталгаатайгаас бусад замаар түлш, шатахуун, өвс, тэжээл тээвэрлэн хүргүүлэх, байршуулах, хүн эмнэлгийн үйлчилгээ үзүүлэх, нүүдэл хийх, түүнчлэн зам, даваанд гарц гаргахад зарцуулсан нэмэгдэл хөрөнгийг холбогдох яамд, аймгуудаас гаргасан тооцоо, ажлын гүйцэтгэл, бусад баримтыг үндэслэн зохих журмын дагуу шийдвэрлэж байхыг Санхүү, эдийн засгийн сайд Ч.Улаанд зөвшөөрсүгэй.

5. Аймгийн Засаг дарга нарт ДААЛГАХ нь:

а/ орон нутгийнхаа мал өвөлжилтийн байдалд бодитой дүгнэлт хийж, отор нүүдлийг оновчтой зохион байгуулсугай;

б/ инженерийн болон энгийн, уурхайн худгийг арчлах, хамгаалах, дулаалах, ялангуяа отрын нутгууд дахь усны хангамжийг сайжруулах арга хэмжээг дотоод нөөц бололцоогоо дайчлан шуурхай авч хэрэгжүүлсүгэй;

в/ мал тооллогын үеэр өвөлжилт хүндэрсэн сум, багт бодитой мэдээлэл хүргэх, тэднээс мэдээлэл авах, иргэдэд бүх талын дэмжлэг, тусламж үзүүлэх зохион байгуулалтын арга хэмжээ авсугай;

г/ тусламжаар үнэгүй олгож байгаа болон улсын нөөцөөс худалдах өвс, тэжээлийг цаг хугацааны ялгаатайгаар хуваарилан хүргүүлэх, энэ талаар малчдад сайтар таниулан ойлгуулах арга хэмжээ авсугай.

6. Манай оронд тохиолдож байгаа өвөлжилтийн хүндрэл, түүнээс хүлээж болзошгүй хохирлыг арилгах, урьдчилан сэргийлэхэд зориулан хандив, тусламж авах хүсэлтийн талаар Монгол Улсаас гадаад оронд суугаа, мөн гадаад орноос манай улсад суугаа Элчин сайдын яамд болон НҮБ-аас манай оронд суугаа Суурин төлөөлөгчийн газраар дамжуулан гадаад орон, олон улсын байгууллагуудад уламжлахыг Гадаад хэргийн сайд Л.Эрдэнэчулуунд даалгасугай.

7. Зудын хор уршиг, хохирлын талаар хэвлэл, мэдээллийн хэрэгслээр дотоод, гадаадад бодитой мэдээлэл өгч байхын зэрэгцээгээр цагийн байдал хүндэрсэн үед мал сүргийг арчлах, хамгаалах, тэжээж тэнхрүүлэх зэрэг арга технологи, уламжлалын талаар цуврал хичээл, сургалт явуулахыг Радио, телевизийн Хэрэг эрхлэх газрын дарга Б.Ганболдод даалгасугай.

8. Зуданд нэрвэгдэж байгаа аймаг, сумд, малчдад туслах хөдөлгөөнийг нийслэл дэх нутгийн зөвлөл, аж ахуйн нэгж, байгууллагын шугамаар хэрэгжүүлэхийг нийслэлийн Засаг дарга бөгөөд Улаанбаатар хотын захирагч М.Энхболдод үүрэг болгосугай.

Ерөнхий сайдын үүрэг гүйцэтгэгч бөгөөд Гадаад хэргийн сайд Л.ЭРДЭНЭЧУЛУУН

Батлан хамгаалахын сайд Ж.ГҮРРАГЧАА