ЗАСГИЙН ГАЗРЫН ТОГТООЛ (ЗАХИРАМЖ)

МОНГОЛЫН АРД ТҮМНИЙ АХМАД ҮЕИЙН ТАЛААР БАРИМТЛАХ ТӨРИЙН БОДЛОГЫГ ХЭРЭГЖҮҮЛЭХ ЗАРИМ АРГА ХЭМЖЭЭНИЙ ТУХАЙ

1992 оны 03 дугаар сарын 13-ний өдөр

Улаанбаатар хот

Дугаар 45

Монгол Улсын Засгийн газраас ТОГТООХ нь:

1.Монгол Улсын Ерөнхийлөгчийн зарлигаар батлагдсан "Монголын ард түмний ахмад үеийн талаар баримтлах төрийн бодлого"-ыг хэрэгжүүлэх арга хэмжээний хөтөлбөр боловсруулан мөрдөж ажиллахыг аймаг, хот, сум, дүүргийн Ардын Хурлын гүйцэтгэх захиргаанд даалгасугай.

2.1939 оны Халхын голын байлдаан, 1945 оны чөлөөлөх дайн, улсын баруун хил дээр 1940-1948 онд болсон зэвсэгт тулгаралтад оролцсон ахмад дайчид /цаашид "байлдаанд оролцсон ахмад дайчид" гэх/-ын талаар дараахь арга хэмжээг авч хэрэгжүүлсүгэй:

а/байлдаанд оролцсон ахмад дайчдыг эмнэлгийн урьдчилан сэргийлэх үзлэгт бүрэн хамруулж, тэдэнд эмнэлгийн үйлчилгээг хөнгөн шуурхай үзүүлж байхын зэрэгцээ аймаг, хотын Ардын Хурлын гүйцэтгэх захираанд даалгасугай; /ЗГ-ын 1997 оны 182-р тогтоолоор зарим хэсгийг хүчингүй болгосон/

б/байлдаанд оролцсон ахмад дайчдыг орон сууцаар хангах асуудлыг жилийн төлөвлөгөө, хөрөнгө оруулалтынхаа бодлогод тусган хэрэгжүүлэх арга хэмжээ авч байхыг аймаг,хотын Ардын Хурлын гүйцэтгэх захиргаанд үүрэг болгосугай;

в/байлдаанд оролцсон ахмад дайчдыг хот, суурин газрын нийтийн үйлчилгээний /таксинаас бусад/ тээврийн хэрэгслээр үнэ төлбөргүй, эмнэлэг, хүнсний дэлгүүр, эмийн сан, хот хоорондын болон ахуйн тээвэр, онгоц, шуудан, холбоо, ахуй үйлчилгээний цэг, салбарт дараалал харгалзахгүй үйлчилж байхаар тогтоосугай.

3 дахь хэсгийг Засгийн газрын 1996 оны 125 дугаар тогтоолоор хүчингүй болсонд тооцсон/)

4. Энэ тогтоол гарсантай холбогдуулан "Ахмад дайчдын нийтийн үйлчилгээний тээврээр үнэ төлбөргүй үйлчлэх тухай" БНМАУ-ын Сайд нарын Зөвлөлийн 1990 оны 8 дугаар сарын 17-ны өдрийн 413 дугаар тогтоолыг хүчингүй болсонд тооцсугай.

Монгол улсын Ерөнхий сайд Д.БЯМБАСҮРЭН

Хөдөлмөрийн сайд Ц.ЦОЛМОН