ЗАСГИЙН ГАЗРЫН ТОГТООЛ (ЗАХИРАМЖ)

МОНГОЛ УЛСЫН ТАТВАРЫН ЕРӨНХИЙ ХУУЛИЙГ ХЭРЭГЖҮҮЛЭХ ЗАРИМ АРГА ХЭМЖЭЭНИЙ ТУХАЙ

1993 оны 1 дүгээр сарын 23-ны өдөр

Улаанбаатар хот

Дугаар 11

Монгол Улсын татварын ерөнхий хуулийг хэрэгжүүлэх зорилгоор Монгол улсын Засгийн газраас ТОГТООХ нь:

1, 2 дахь хэсгийг ЗГ-ын 1997 оны 119 дүгээр тогтоолоор, 3 дахь хэсэг ЗГ-ын 1993 оны 77 дугаар тогтоолоор тус тус хүчингүй.

4. Улсын татварын ерөнхий газарт даалгах нь:

а)татварын хуулийн хэрэгжилтэд тавих хяналтыг сайжруулж, татвар төлөгчид татвар ногдох орлогоо өөрөө тооцон татвараа тогтоосон хугацаанд төлдөг журмыг хэвшүүлэхэд чиглэсэн тодорхой арга хэмжээ авч ажилласугай;

/б, в дэх заалтууд ЗГ-ын 1997 оны 119 дүгээр тогтоолоор хүчингүй./

г)холбогдох газартай хамтран татварын байцаагчдын мэргэжил олгох, дээшлүүлэх дамжаа нээж ажиллуулсугай.

5.Татварын хууль, тогтоомжийг сурталчлан таниулах,хүн амд татварын талаар мэдлэг олгох ажлыг оновчтой зохион байгуулж явуулахыг Радио, телевиз, "Засгийн газрын мэдээ" сонины редакци, Татварын ерөнхий газарт үүрэг болгосугай.

6. Нийслэл, аймаг, дүүрэг, сумын засаг дарга (хотын Ардын Хурлын гүйцэтгэх захиргааны дарга) нарт даалгах нь:

а)татварын албыг мэдлэг чадвар сайтай, үнэнч шударга ажилтнаар бэхжүүлэх, тэднийг хуулийн хүрээнд үйл ажиллагаагаа явуулахад нь дэмжлэг үзүүлж, удирдлагаар хангаж ажилласугай;

б)дэвсгэр нутгийнхаа хэмжээнд татварын хууль, тогтоомжийн заалтыг зөв хэрэгжүүлэхэд анхаарч татварын албаны үндсэн үйл ажиллагааг татвар хураалт, хяналтын ажилд чиглүүлэн төсвийн орлогын төлөвлөгөөг жигд ханган биелүүлж ажилласугай;

в)татварын хууль, тогтоомжийг сурталчлан таниулах ажлыг үр нөлөөтэй зохион байгуулахын хамт татварын байцаагч, татвар төлөгчдийн семинар, ярилцлагыг үе үе зохиож байсугай.

7.Энэ тогтоол гарсантай холбогдуулан "БНМАУ-ын албан татварын хуулийг хэрэгжүүлэх зарим арга хэмжээний тухай" Засгийн газрын 1990 оны 12 дугаар сарын 21-ний өдрийн 204 дүгээр тогтоол, "Улсын албан татварын ерөнхий газар байгуулж, даргыг томилох тухай" Засгийн газрын 1992 оны 9 дүгээр сарын 4-ний өдрийн 17 дугаар тогтоолын 1, 2 дугаар зүйлийн "...албан..." гэснийг тус тус хүчингүй болсонд

тооцож, "Аймаг, сумын Засаг даргын Тамгын газрын бүтцийг тогтоох тухай" Засгийн газрын 1992 оны 9 дүгээр сарын 11ний өдрийн 24 дүгээр тогтоолын 2 дугаар зүйлийн "г" заалтын "...(татварын тасагтай)..." гэсэн хэсгийг хасаж, мөн тогтоолын 3 дугаар зүйлд"...Цагдаагийн хэлтэс..." гэсний дараа "Татварын хэлтэс" гэж нэмсүгэй.

Монгол улсын Ерөнхий сайд П. ЖАСРАЙ

Сангийн сайд Д. ДАВААСАМБУУ