ЗАСГИЙН ГАЗРЫН ТОГТООЛ (ЗАХИРАМЖ)

МОНГОЛЫН УЛААН ЗАГАЛМАЙН НИЙГЭМЛЭГИЙН САНАЛЫН ТУХАЙ

1994 оны 3 дугаар сарын 16-ны өдөр

Улаанбаатар хот

Дугаар 61

Монгол Улсын Засгийн газраас ТОГТООХ нь:

1.Байгалийн гамшигтай тэмцэх хийгээд хүмүүнлэгийн тусламжийн асуудал эрхэлсэн олон улсын холбогдох байгууллагын дэмжлэгтэйгээр материаллаг нөөцийн эх үүсвэрийг бүрдүүлэх замаар нийтийг хамарсан шинжтэй байгалийн гамшиг, үйлдвэрлэлийн томоохон осолд нэрвэгдэгчдэд туслах сан байгуулах, уг санг Улсын байнгын онцгой комисстой тохиролцон зарцуулж байх талаар Монголын улаан загалмайн нийгэмлэгээс гаргасан саналыг зүйтэй гэж үзсүгэй. Үүнтэй холбогдуулан байгалийн гамшиг, осолд нэрвэгдэгчдэд туслах бараа материалыг нь улсын нөөцийн агуулахад Монголын улаан загалмайн нийгэмлэгтэй тохиролцон хадгалах арга хэмжээ авахыг Худалдаа, үйлдвэрийн яам (Ц.ЦОГТ)-д даалгасугай.

2.Байгалийн гамшиг, үйлдвэрлэлийн томоохон осолд нэрвэгдэгсэд, амьдрал дорой, ядуу иргэдэд туслах, улаан загалмайн нийгэмлэгээр дамжуулан манай улсын оролцсон олон улсын байгууллагад татвар төлөх, Засгийн газрын нэрийн өмнөөс хандив өгөх, түүнчлэн тус нийгэмлэгийн үйл ажиллагааг санхүүжүүлэх хөрөнгийн эх үүсвэр бий болгох зорилгоор өөрийн үйл ажиллагааны хүрээнд хамаарах чиглэлээр дор дурдсан ажлыг аймаг, нийслэлийн Засаг даргын Тамгын газар, хотуудын Ардын Хурлын гүйцэтгэх захиргаатай хамтран зохион байгуулах тухай Монголын улаан загалмайн нийгэмлэгээс гаргасан санаачилгыг дэмжсүгэй:

а)гадаад орнуудын үндэсний улаан загалмайн болон улаан хавирган сар нийгэмлэг, буяны байгууллагаас тус улсад хүмүүнлэгийн тусламж болгон ирүүлсэн эм, хүнсний болон өргөн хэрэглээний барааг амьдрал ядуу иргэд,байгалийн гамшиг, үйлдвэрлэлийн томоохон осолд нэрвэгдэгсдэд тухайн орон нутгийн төрийн захиргааны байгууллага, байнгын онцгой комиссын шийдвэрийг үндэслэн үнэгүй хуваарилан түгээх, эсвэл 50-70 хувиар хямдруулсан үнээр худалдах дэлгүүр ажиллуулах асуудлыг аймаг, нийслэлийн Засаг даргын Тамгын газар, Дархан, Эрдэнэт, Чойр хотын Ардын Хурлын гүйцэтгэх захиргаатай хамтран зохион байгуулах;

б)олон улсын буяны байгууллагуудаас тусламж болгон Монголын улаан загалмайн нийгэмлэгээр дамжуулан ирүүлсэн тоног төхөөрөмжийг ашиглан амьдрал дорой, ядуу иргэдэд зориулан хувцас оёх цех байгуулан ажиллуулах, бусад жижиг үйлдвэрлэл, үйлчилгээ эрхлүүлэх ажил зохион байгуулах;

в)буяны гуанз, эмийн сан нээн ажиллуулж ядуучуудад үнэгүй буюу хямдарсан үнээр үйлчлэх;

г)энэ зүйлийн "а", "б", "в"-д заасан үйлдвэрлэл, үйлчилгээнээс орсон орлогыг арвижуулахтай холбогдсон үйл ажиллагааг хууль тогтоомжоор олгосон эрх хэмжээнийхээ хүрээнд явуулах.

3.Энэ тогтоолын 2 дугаар зүйлийн дагуу зохион байгуулж явуулсан аж ахуйн үйл ажиллагааны орлогыг Монгол Улсын Худалдааны албан татварын хуулийн 7 дугаар зүйлийн 1 дэх хэсэгт заасныг үндэслэн худалдааны албан татвараас чөлөөлсүгэй.

4.Монголын улаан загалмайн нийгэмлэгийн шугамаар ирүүлсэн тусламжийг улсын хэрэгцээнд зориулан Засгийн газрын мэдэлд албан ёсоор шилжүүлэн өгсөн тохиолдолд зах зээлийн үнийнх нь 60 хүртэл хувьтай тэнцэх хэмжээний хөрөнгийг тус нийгэмлэгийн хүмүүнлэгийн санд хандив болгон оруулж байхыг Сангийн сайд (Д.ДАВААСАМБУУ)-д зөвшөөрсүгэй.

5.Дайнд хэлмэгдэгсдийг хамгаалах тухай 1949 оны Женевийн конвенц, 1977 оны нэмэгдэл протоколууд, Улаан загалмайн ба Улаан хавирган сар нийгэмлэгүүдийн холбооны үндсэн хууль, эдгээр нийгэмлэгийн үйл ажиллагааны талаар 1965 онд батлагдсан долоон үндсэн зарчим (энэрэнгүй, бие даах, төвийг сахих, нэмэгдэл, нийтлэг, сайн дурын, ялгаварлахгүй байх)-ыг хүндэтгэн үзэж Монголын улаан загалмайн нийгэмлэгийн үйл ажиллагаанд бүх талын дэмжлэг үзүүлж, хамтран ажиллаж байхыг нийслэл, аймгийн Засаг дарга, хотын Ардын Хурлын гүйцэтгэх захиргааны дарга нарт даалгасугай.

Монгол Улсын Ерөнхий сайд П.ЖАСРАЙ

Монгол Улсын шадар сайд Ч.ПҮРЭВДОРЖ