ЗАСГИЙН ГАЗРЫН ТОГТООЛ

МЯНГАНЫ ЗАМ ТӨСЛИЙГ ХЭРЭГЖҮҮЛЭХ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

2001 оны 4 дүгээр сарын 18-ны өдөр

Улаанбаатар хот

Дугаар 85

"Мянганы зам болон дэд бүтцийн босоо тэнхлэгийн чиглэл батлах тухай" Улсын Их Хурлын 2001 оны 01 дүгээр сарын 25-ны өдрийн 9 дүгээр тогтоолыг хэрэгжүүлэх зорилгоор Монгол Улсын Засгийн газраас ТОГТООХ нь :

1. Засгийн газрын бүрэн эрхийн хугацаанд "Мянганы зам"-ын чигийн дагуухь даваа, намаг, шавартай газрыг засч 800 хүртэл км зам, 600 хүртэл метр төмөр бетон гүүр барьж байгуулах нь зүйтэй гэж үзсүгэй.

2. "Мянганы зам" төслийн хүрээнд 2001 онд хийх зам, гүүрийн хайгуул, зураг төсөв, барилга угсралтын ажлын жагсаалтыг 1 дүгээр хавсралт ёсоор баталсугай.

3. Дараахь арга хэмжээ авахыг Санхүү, эдийн засгийн сайд Ч.Улаанд даалгасугай:

а/ "Мянганы зам"-ын ажилд 2001 онд шаардагдах 2,5 тэрбум төгрөгийн эх үүсвэрийг улсын төсвийн тодотголд тусган шийдвэрлүүлж 2 дугаар хавсралтад заасан арга хэмжээг санхүүжүүлэх;

б/"Мянганы зам"-ын зүүн чиглэлээр баригдах зам, барилгын ажлын санхүүжилтэд зориулж 600 сая төгрөгийг энэ оны 4 дүгээр сараас эхлэн Авто замын сангаас санхүүжүүлэх;

в/2002 оноос эхлэн автобензин, дизелийн түлшний онцгой албан татвартай дүйцхүйц хэмжээний хөрөнгийг "Мянганы зам"-ын ажлын санхүүжилтийн эх үүсвэрийг нэмэгдүүлэхэд зориулан зарцуулах.

4. Хөрөнгө оруулалтын төлөвлөгөөнд тодотгол хийх үед батлагдсан хөрөнгө оруулалтын хэмжээг зохицуулах, оновчтой хуваарилах замаар "Мянганы зам"-д шаардагдах нэмэгдэл эх үүсвэр гаргах санал боловсруулж, Засгийн газарт оруулж шийдвэрлүүлэхийг Санхүү, эдийн засгийн сайд Ч.Улаан, Дэд бүтцийн сайд Б.Жигжид нарт даалгасугай:

5. Ядуурлыг бууруулах, хөдөлмөр эрхлэлтийг дэмжихэд чиглэсэн гадаад, дотоодын санхүүгийн эх үүсвэрийн зохих хувийг "Мянганы зам"-ын ажилд оролцох ажилгүй иргэдийг ажлын байраар хангах, тэдгээрийн нийгмийн асуудлыг шийдвэрлэхэд зарцуулж байхыг Санхүү, эдийн засгийн сайд Ч.Улаан, Нийгмийн хамгаалал, хөдөлмөрийн сайд Ш.Батбаяр нарт даалгасугай.

6. "Мянганы зам" төслийг хэрэгжүүлэхэд хандивлагч орнууд, олон улсын банк, санхүүгийн байгууллагын дэмжлэг туслалцаа авах, хөрөнгийн эх үүсвэрийг олох ажлыг тус улсаас гадаад орнуудад суугаа Элчин сайдын яамдаар дамжуулан зохион байгуулахыг Санхүү, эдийн засгийн сайд Ч.Улаан, Гадаад хэргийн сайд Л.Эрдэнэчулуун, Дэд бүтцийн сайд Б.Жигжид нарт даалгасугай.

7. Зам, барилгын ажлын тодорхой хэсгүүдэд сум, суурин болон хөдөө орон нутгийн ажилгүй иргэд, хоригдлуудыг нэгдсэн зохион байгуулалттайгаар ажиллуулах арга хэмжээ авахыг Нийгмийн хамгаалал, хөдөлмөрийн сайд Ш.Батбаяр, Хууль зүй, дотоод хэргийн сайд Ц.Нямдорж, Дэд бүтцийн сайд Б.Жигжид, холбогдох аймгийн Засаг дарга нарт даалгасугай.

8. "Мянганы зам" төслийг хэрэгжүүлэхэд бүх нийтийн идэвхтэй оролцоог нэмэгдүүлэх, дотоод нөөц бололцоогоо бүх талаар дайчлан ашиглах, ажиллах хүчийг оновчтой зохион байгуулж ажиллахыг бүх шатны Засаг дарга нарт үүрэг болгосугай.

Монгол Улсын Ерөнхий сайд Н.ЭНХБАЯР

Дэд бүтцийн сайд Б.ЖИГЖИД