МОНГОЛ УЛСЫН ЗАСГИЙН ГАЗРЫН ТОГТООЛ

2009 оны 2 дугаар сарын 4-ний өдөр

Дугаар 30

Улаанбаатар хот

МОНГОЛ ТӨРИЙН ТҮҮХИЙН МУЗЕЙ БАЙГУУЛАХ ТУХАЙ

Төрийн болон орон нутгийн өмчийн тухай хуулийн 22 дугаар зүйл, Шинжлэх ухаан, технологийн хуулийн 11.2.4 дэх заалтыг тус тус үндэслэн Монгол Улсын Засгийн газраас ТОГТООХ нь:

1. "Чингис хааны дурсгалын хөшөө, төрийн ёслол хүндэтгэлийн өргөө цогцолбор"-ыг ашиглалтад хүлээн авсантай холбогдуулан түүний үндсэн хэсэг болох Монгол төрийн түүхийн музейг Засгийн газрын Хэрэг эрхлэх газрын харьяанд байгуулан үйлчилгээг нь "Төр, засгийн үйлчилгээг эрхлэх газар" төрийн өмчит үйлдвэрийн газраар гэрээний үндсэн дээр гүйцэтгүүлэхийг зөвшөөрсүгэй.

/Энэ заалтад ЗГ-ын 2012-08-25-ны өдрийн 3, ЗГ-ын 2014-10-11-ний өдрийн 324-р тогтоолоор өөрчлөлт орсон/

2. Монгол төрийн түүхийн музейн орон тооны дээд хязгаарыг баталж, музейн үйл ажиллагааг мэргэжил, арга зүйн удирдлагаар ханган, хяналт тавьж ажиллахыг Боловсрол, соёл, шинжлэх ухааны сайд Ё.Отгонбаярт үүрэг болгосугай. /Энэ заалтыг ЗГ-ын 2012-08-25-ны 3-р тогтоолоор хүчингүй болсонд тооцсон/

3. Монгол төрийн түүхийн музейн ашиглалтын үйл ажиллагаатай холбогдон гарах зардлыг Төр, засгийн Үйлчилгээ, аж ахуйг эрхлэх газартай 2009 онд гэрээний үндсэн дээр, 2010 оноос эхлэн Засгийн газрын Хэрэг эрхлэх газрын төсвийн багцад тусган шийдвэрлэхийг Боловсрол, соёл, шинжлэх ухааны сайд Ё.Отгонбаяр, Сангийн сайд С.Баярцогт нарт үүрэг болгосугай.

4. "Чингис хааны дурсгалын хөшөө, төрийн ёслол хүндэтгэлийн өргөө цогцолбор"-ын нэг хэсэг болох Төрийн түүхийн музейн харуул, хамгаалалтыг батлагдсан төсөвтөө багтаан зохион байгуулах арга хэмжээ авахыг Тагнуулын ерөнхий газрын дарга Р.Болдод даалгасугай.

5. Монгол төрийн түүхийн музей байгуулагдсантай холбогдуулан Төрийн ордны хамгаалалт, үйлчилгээний дүрэм, журамд зохих нэмэлт өөрчлөлт оруулах арга хэмжээ авахыг Монгол Улсын сайд, Засгийн газрын Хэрэг эрхлэх газрын дарга Б.Долгорт даалгасугай.

Монгол Улсын Ерөнхий сайд С.БАЯР Сангийн сайд С.БАЯРЦОГТ

Боловсрол,соёл,шинжлэх ухааны сайд Ё.ОТГОНБАЯР