ЗАСГИЙН ГАЗРЫН ТОГТООЛ (ЗАХИРАМЖ)

НИК ХУВЬЦААТ КОМПАНИЙН ТАЛААР АВАХ ЗАРИМ АРГА ХЭМЖЭЭНИЙ ТУХАЙ

2001 оны 7 дугаар сарын 4-ний өдөр

Улаанбаатар хот

Дугаар 154

Монгол Улсын Засгийн газраас ТОГТООХ нь:

1. "НИК" ХК-ийн хэвийн үйл ажиллагааг хангах зорилгоор удирдлага, зохион байгуулалтыг боловсронгуй болгон сайжруулах, орон тоо, зардлыг хэмнэх, өр авлагыг шуурхай барагдуулах, хариуцлага тооцох чиглэлээр тодорхой арга хэмжээг 2001 оны 7 дугаар сарын эхний хагаст багтаан авч хэрэгжүүлэхийг Үйлдвэр, худалдааны сайд Ч.Ганзориг болон Төрийн өмчийн хороо (Л.ПҮРЭВДОРЖ)-нд даалгасугай.

2. Тус компанийн нефтийн бүтээгдэхүүний татан авалт, нийлүүлэлт, борлуулалтын үйл ажиллагааг тогтворжуулан хөдөө орон нутгийг шатахуунаар тасралтгүй хангах арга хэмжээ авахыг Үйлдвэр, худалдааны сайд Ч.Ганзоригт даалгасугай.

3. "НИК" ХК-ийн улсын төсөвт төлөх нефтийн бүтээгдэхүүний нэмэгдсэн өртгийн албан татвар болон онцгой албан татвар, улсын төсөвт төлөх төлбөрийг яаралтай барагдуулах талаар тодорхой арга хэмжээ авч энэ оны 8 дугаар сард Засгийн газарт танилцуулахыг Санхүү, эдийн засгийн сайд Ч.Улаан, Улсын гаалийн ерөнхий газрын дарга Х.Баатар болон Төрийн өмчийн хороо (Л.ПҮРЭВДОРЖ)-нд даалгасугай.

Монгол Улсын Ерөнхий сайд Н.ЭНХБАЯР

Үйлдвэр, худалдааны сайд Ч.ГАНЗОРИГ