ЗАСГИЙН ГАЗРЫН ТОГТООЛ (ЗАХИРАМЖ)

НУТГИЙН ЗАХИРГААНЫ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

1997 оны 6 дугаар сарын 7-ны өдөр

Улаанбаатар хот

Дугаар 137

Монгол Улсын Засгийн газраас ТОГТООХ нь:

1.Аймаг, нийслэл, сум, дүүргийн Засаг дарга нарт даалгах нь:

а/Засгийн газрын болон Засаг даргын үйл ажиллагааны хөтөлбөрийг нутаг дэвсгэрийн хэмжээнд хэрэгжүүлэх ажлыг зохион байгуулж, биелэлтийг хагас жил тутам дүгнэн тооцож ажилласугай;

б/доод шатныхаа Засаг дарга нарын ажил хариуцах чадварыг дээшлүүлэх замаар төр, засгийн жинхэнэ төлөөлөгч болгон ажиллуулж, тэдний үйл ажиллагаанд хяналт тавьж зохих туслалцаа дэмжлэг үзүүлэхэд Тамгын газрын ажлыг чиглүүлсүгэй;

в/төрийн албан хаагчдад тавих шаардлага, хүлээх хариуцлагыг өндөржүүлэх, тэдний зүгээс хариуцлага алдах, архидан согтуурах, хувийн эрх ашгийг хичээж албан тушаалаа буруугаар ашиглах зэрэг зөрчил дутагдал гаргах явдлыг таслан зогсоож, хуулийг чанд мөрдүүлэх арга хэмжээ авсугай;

г/орон нутгаа хөгжүүлэх, иргэдийн ахуй амьдралыг дээшлүүлэх, эдийн засгийн бие даасан байдлаа хангах хөтөлбөртэй ажиллаж, хэрэгжилтэд нь хяналт тавьж байсугай;

д/холбогдох хууль тогтоомж,Засгийн газрын шийдвэр, даалгаврын биелэлтийг хэрэгжүүлэхгүй байгаа нутгийн захиргааны болон аж ахуйн нэгж, байгууллагын удирдлага, ажилтанд зохих хууль тогтоомжийн дагуу хариуцлага тооцож ажилласугай;

е/өмчийн хэлбэр харгалзахгүйгээр орон нутагт ажиллаж байгаа аж ахуйн нэгж, байгууллагуудыг үйл ажиллагаагаа хууль тогтоомжийн хүрээнд зөв зохистой явуулахад чиглүүлэн, түүнд тавих хяналтыг өндөржүүлж, удирдлага зохицуулалтын шуурхай арга хэмжээг тухай бүр авч хэрэгжүүлж байх. Энэ ажилд Засаг даргын Тамгын газар, санхүүгийн болон мэргэжлийн хяналт шалгалтын албадын үйл ажиллагааг чиглүүлж ажилласугай;

ж/иргэдийн нийтлэг эрх ашгийг хамгаалах, тэдгээрийн амгалан тайван амьдрах нөхцөл бололцоог бүрдүүлэхэд анхаарч зөрчил, гэмт хэргээс урьдчилан сэргийлэх ажилд хууль, хяналтын байгууллагын үйл ажиллагааг уялдуулан чиглүүлж, дэмжлэг үзүүлэх болон олон нийтийн үүсгэл санаачилгыг өрнүүлэх, иргэдийг татан оролцуулах замаар эрчимтэй ажил зохион байгуулсугай;

з/Хурал, Тэргүүлэгчдээс гаргасан шийдвэрийг хэрэгжүүлэх, тэдгээрийг шаардлагатай мэдээлэл болон ажлаа хэвийн явуулах нөхцөл бололцоогоор хангах арга хэмжээ авсугай;

и/баг, хорооны Засаг дарга нарын ажлыг шалгаж зааварлах, тэднийг ажиллах бололцоогоор хангах тодорхой арга хэмжээ авч ажилласугай.

2.Аймаг, нийслэлийн Иргэдийн Төлөөлөгчдийн Хурлын Тэргүүлэгчдийн дарга, Засаг дарга нарын тавьсан асуудлыг шуурхай авч үзэхийн хамт төвлөрлийг сааруулж, нутгийн захиргааг бэхжүүлэхтэй холбогдуулан цаашид орон нутгийн захиргааны байгууллагуудын бүтэц, орон тоо, төсөв зардалтай холбогдсон шийдвэр чиглэл өгөх асуудлыг зогсоох, шаардлагатай бол Засгийн газрын хуралдаанд танилцуулсны үндсэн дээр хэрэгжүүлж байхыг Засгийн газрын гишүүдэд даалгасугай.

3.Өөр аймаг, нийслэлд ажиллахдаа тухай бүр мэдэгдэх, гадаад оронд явахдаа ажлын удирдамж, томилолтын үр дүнг Засгийн газрын Хэрэг эрхлэх газарт ирүүлж байхыг аймаг, нийслэлийн Засаг дарга нарт даалгасугай.

/3-р хэсгийг ЗГ-ын 2008 оны 32-р тогтоолоор хүчингүй болгосон/ 4.Иргэдийн Төлөөлөгчдийн Хурлын хуралдааны бэлтгэлийг сайтар хангаж ажил хэрэгч шийдвэр гаргах зорилгоор Тамгын газар, хэлтэс, албад, тэдгээрийн мэргэжилтнүүдийг ажлынх нь чиг үүргийн дагуу татан оролцуулж байхын дээр Иргэдийн Төлөөлөгчдийн Хурлын тайлан мэдээг Засгийн газарт ирүүлж байхыг аймаг, нийслэлийн Иргэдийн Төлөөлөгчдийн Хурлын Тэргүүлэгчдэд зөвлөсүгэй.

5.Монгол Улсын Засгийн газар, төрийн захиргааны төв байгууллагад сум, дүүрэг, аж ахуйн нэгж, байгууллагаас асуудлыг гагцхүү аймаг, нийслэлийн Засаг даргаар дамжуулан тавьж байх нь зүйтэй гэж үзсүгэй.

6.Засгийн газрын Хэрэг эрхлэх газрын дарга Т.Лхагваад даалгах нь:

а/аймаг, нийслэл, сум, дүүргийн Засаг даргын үйл ажиллагааны хөтөлбөр, гэрээний биелэлт, Тамгын газрын ажлын байдлыг жил бүр шалган зааварлаж арга зүйн туслалцаа, дэмжлэг үзүүлэх арга хэмжээ авсугай;

б/ажлын давхардлыг арилгах, төсөв зардал хэмнэх, ажлын уялдаа холбоог сайжруулах зорилгоор аймаг, нийслэ-лийн удирдлага, Тамгын газар, хэлтэс, байгууллагын ажилтнуудын семинар, сургалтыг яам,агентлагийн саналыг авсны үндсэн дээр зохицуулан зохион байгуулж байсугай;

в/аймаг, нийслэлийн Засаг даргын үйл ажиллагааны хөтөлбөрийн биелэлт, жилийн тайланг нэгтгэн Засгийн газарт танилцуулж байсугай.

7.Энэ тогтоол гарсантай холбогдуулан "Өвөрхангай аймагт хийсэн шалгалтын дүнгийн тухай" Засгийн газрын 1992 оны 12 дугаар сарын 25-ны өдрийн 75 дугаар тогтоолын 3 дугаар зүйлийн "а", "б", "в", "г" заалт, "Баянхонгор аймагт хийсэн шалгалтын дүнгийн тухай" Засгийн газрын 1993 оны 4 дүгээр сарын 9-ний өдрийн 61 дүгээр тогтоолын 3 дугаар зүйлийн "а" заалт, "Нутгийн захиргааны байгууллагуудын 1993 оны ажлын тайлангийн тухай" Засгийн газрын 1994 оны 3 дугаар сарын 9-ний өдрийн 58 дугаар тогтоолын 1 дүгээр зүйлийн "а", "б", "в" заалт, 2, 5 дугаар зүйлийг тус тус хүчингүй болсонд тооцсугай.

Монгол Улсын Ерөнхий сайд М.ЭНХСАЙХАН

Сангийн сайд П.ЦАГААН

Хууль зүйн сайд Ж.АМАРСАНАА