ЗАСГИЙН ГАЗРЫН ТОГТООЛ (ЗАХИРАМЖ)

ОРОН СУУЦ ХУВЬЧЛАХ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

1997 оны 5 дугаар сарын 7-ны өдөр

Улаанбаатар хот

Дугаар 118

Орон сууц хувьчлах, Дундын өмчлөлийн орон сууцны тухай хуулиудыг хэрэгжүүлэх арга хэмжээний тухай Монгол Улсын Их Хурлын 1997 оны 13 дугаар тогтоолыг хэрэгжүүлэх зорилгоор Монгол Улсын Засгийн газраас ТОГТООХ нь:

1.Орон сууц хувьчлах товчооны даргын үүргийг аймаг, нийслэлийн Засаг дарга нарт хариуцуулахаар тогтоосугай.

2.Нийслэл, орон нутагт орон сууц хувьчлах ажлыг орон сууц, нийтийн аж ахуйн газар, өмчийн болон мэргэжлийн холбогдох байгууллагуудын хүч бололцоог дайчлан аливаа зөрчил дутагдал гаргахгүй байхаар "Орон сууц хувьчлах тухай" хуульд заасан зарчмын дагуу энэ оны 5 дугаар сарын 10-ны өдрөөс эхлэн зохион байгуулахыг аймаг, нийслэлийн Засаг дарга, Төрийн өмчийн хорооны дарга З.Энхболдод тус тус даалгасугай.

3.Хувьчлагдах орон сууц нь аж төрөх шаардлага хангаж байгааг магадлан шинжлэх үүргийг тухайн аймаг, хотын мэргэжлийн хяналтын албадын үндсэн ажил үүрэгт нь хамааруулан Орон сууц хувьчлах тухай хууль, Магадлан шинжлэх хэсгийн ажиллах журмын дагуу хэрэгжүүлэхийг аймаг, нийслэлийн Засаг дарга нарт даалгасугай.

4.Нийтийн аж ахуй, үйлчилгээний газрын дарга Б.Жигжидэд даалгах нь:

1/орон сууц хувьчлалын холбогдох журам, дүрэм, заавар, аргачлалаар орон нутгийг хангах, орон сууц өмчлөх эрхийн гэрчилгээг нэгдсэн журмаар хэвлүүлж аймаг, хотуудад хүргүүлэх арга хэмжээ авсугай.

2/орон сууц хувьчлахтай холбогдуулж орон сууцны эзэмшил хувьчлалын талаар бүртгэл, мэдээллийн санг бүрдүүлж, орон сууц хувьчлалын товчоодын ажилд холбогдох туслалцаа дэмжлэг үзүүлэн хяналт тавьж байсугай.

5.Орон сууц хувьчлах арга хэмжээтэй холбогдон 1997 онд гарах зардал 7,0 сая төгрөгийг эргэж төлөгдөх нөхцөлөөр ашиглуулахыг Сангийн сайд П.Цагаан, түүний зарцуулалтад хяналт тавьж ажиллахыг Төрийн өмчийн хорооны дарга З.Энхболдод даалгасугай.

6. Орон сууц хувьчлах тухай хууль хүчин төгөлдөр болсноос хойшхи хугацаанд ашиглалтад орж төрийн өмчийн орон сууцны фондод шилжиж ирсэн орон сууцыг хувьчилбал Засгийн газраас эзэмшигчдэд нь хувьчлахаар шийдвэрлэснээс бусад тохиолдолд аймаг, нийслэлийн Засаг даргатай зөвшилцсөний үндсэн дээр Төрийн өмчийн хорооноос шийдвэрлэж тэдгээрийг дуудлагын худалдаагаар худалдаж байсугай. /Засгийн газрын 2003 оны 246 дугаар тогтоолоор өөрчлөн найруулсан./.

7.Орон сууц хувьчлах тухай хууль гарсантай холбогдуулж энэ талаар гарсан шийдвэрүүдийг хууль тогтоомжид нийцүүлэх арга хэмжээ авахыг бүх шатны Засаг дарга нарт даалгасугай.

Монгол Улсын Ерөнхий сайд М.ЭНХСАЙХАН

Сангийн сайд П.ЦАГААН