МОНГОЛ УЛСЫН ЗАСГИЙН ГАЗРЫН ТОГТООЛ

ОРОН НУТАГТ АЖИЛЛАСАН ДҮНГИЙН ТУХАЙ

2007 оны 2 дугаар сарын 21-ний өдөр

Улаанбаатар хот

Дугаар 44

Монгол Улсын Засгийн газраас ТОГТООХ нь:

1. Засгийн газрын гишүүд орон нутагт ажилласан мөрөөр авах арга хэмжээний төлөвлөгөөг хавсралт ёсоор баталсугай.

2. Орон нутагт ажиллах үед тавигдсан бөгөөд Засгийн газрын гишүүний эрхлэх ажлын хүрээнд хамаарах асуудлуудыг нарийвчлан судалж хэрэгжүүлэх, шаардлагатай бол холбогдох шийдвэрийн төсөл боловсруулж Засгийн газарт танилцуулах арга хэмжээ авч ажиллахыг сайд нарт даалгасугай.

3. Олон жил гантай байгаа говь, тал хээрийн бүсийн зарим аймагт үүлэнд зориудаар нөлөөлөх замаар хур тунадас оруулах арга хэмжээг 2007 оны 4, 5 дугаар сараас зохион байгуулж, хэрэгжүүлэхийг Байгаль орчны сайд И.Эрдэнэбаатар, Монгол Улсын сайд С.Отгонбаяр нарт үүрэг болгосугай.

4. Малчдын зүгээс тавьж байгаа саналыг дэмжиж "Сайн малчдын улсын зөвлөлгөөн"-ийг 2007 онд зохион байгуулж, тэмээн сүргийг цаашид өсгөн үржүүлэх үндэсний хөтөлбөр боловсруулан хэрэгжүүлэхийг Хүнс, хөдөө аж ахуйн сайд Д.Тэрбишдагвад даалгасугай.

5. Аймаг, сумын эрүүл мэндийн байгууллагуудад үүссэн эмийн өрийг судалж барагдуулах, "Эрүүл монгол хүн" хөтөлбөрийг аймаг, сум бүрт хэрэгжүүлж, эрүүл мэндийн үйлчилгээний чанарыг сайжруулах талаар цогц арга хэмжээ авч ажиллахыг Эрүүл мэндийн сайд Д.Туяад үүрэг болгосугай.

6. Орон нутгийн онцлогт тохируулан мал аж ахуйн түүхий эдийг боловсруулах, барилгын материал үйлдвэрлэх зэрэг жижиг, дунд үйлдвэрлэлийг хөгжүүлэх, ажлын байр шинээр бий болгох санаачилгыг дэмжиж ажиллахыг Сангийн сайд бөгөөд Үйлдвэр, худалдааны сайдын үүрэг гүйцэтгэгч Н.Баяртсайханд даалгасугай.

7. Мал хулгайлах гэмт хэрэгтэй тэмцэх ажлыг эрчимжүүлэх, "100000 нарны гэр" хөтөлбөрийн хэрэгжилтийг сайжруулах арга хэмжээ авахыг Хууль зүй, дотоод хэргийн сайд Д.Одбаяр, Түлш, эрчим хүчний сайд Б.Эрдэнэбат, бүх шатны Засаг дарга нарт даалгасугай.

8. Монгол Улсын сайд, Засгийн газрын Хэрэг эрхлэх газрын дарга С.Батболдод даалгах нь:

а/ аймаг, нийслэлийн Иргэдийн Төлөөлөгчдийн Хурлын дарга, Засаг дарга нарын сургалт, семинарыг 2007 оны 3 дугаар сард багтаан зохион байгуулах арга хэмжээ авсугай;

б/ сумын иргэдэд үзүүлж байгаа төрийн үйлчилгээний хүртээмж, иргэдийн амьжиргааны түвшин, ажилгүйдэл, ядуурлыг бууруулах чиглэлээр хэрэгжүүлсэн ажлын үр дүн, эдийн засаг, нийгмийн хөгжлийн үзүүлэлтүүдийг харгалзан загвар сумын болзлыг боловсруулж жил бүр улсын тэргүүний сумыг шалгаруулж байсугай.

9. Хаваржилт хүндэрч болзошгүй байгаатай холбогдуулан улсын нөөцийн бараа, материалд тооллого явуулж, тэдгээрийн хадгалалт, хамгаалалт, зарцуулалтын байдалд хамтарсан шалгалт хийж, дүнг Засгийн газарт танилцуулахыг Монгол Улсын сайд У.Хүрэлсүх, С.Отгонбаяр нарт даалгасугай.

10. "Орон нутгийг мэдээлэлжүүлэх төсөл"-ийн хүрээнд дөрвөн сувгийн телевизийг орон нутагт хүлээн авах боломжийг бүрдүүлэх чиглэлээр хийсэн ажлын хөрөнгийн зарцуулалтад шалгалт хийж дүнг танилцуулахыг Монгол Улсын сайд У.Хүрэлсүхэд даалгасугай.

11. Аймаг, нийслэлийн Засаг дарга нарт даалгах нь:

а/ 2007 онд хийгдэх хөрөнгө оруулалтыг төлөвлөгөөт хугацаанд нь хэрэгжүүлэх зохион байгуулалтын арга хэмжээг эрчимжүүлсүгэй;

б/ нутгийн захиргааны байгууллагуудын 2007 оны үйл ажиллагааны үр дүнд хяналт-шинжилгээ, үнэлгээ хийхдээ шинээр бий болгосон ажлын байр, ядуурлаас гаргасан өрх, иргэний тоог харгалзан дүгнэх арга хэмжээ авсугай;

в/ 2007 онд дэвшүүлсэн "Их бүтээн байгуулалт-шинэ ажлын байр нэмэгдүүлэх" зорилтын хүрээнд тодорхой ажил зохион байгуулж иргэдийг өргөнөөр татан оролцуулж, тэдний идэвх санаачилгыг дэмжиж ажилласугай.

12. Энэхүү тогтоол болон төлөвлөгөөний хэрэгжилтийн явц, үр дүнд хяналт тавьж ажиллан улирал бүр Засгийн газрын хуралдаанд танилцуулж байхыг Монгол Улсын сайд, Засгийн газрын Хэрэг эрхлэх газрын дарга С.Батболдод даалгасугай.