ЗАСГИЙН ГАЗРЫН ТОГТООЛ

СУУРЬ БОЛОВСРОЛ ЭЗЭМШЭЭГҮЙ ИРГЭДИЙН СУРГАЛТЫН ТАЛААР АВАХ ЗАРИМ АРГА ХЭМЖЭЭНИЙ ТУХАЙ

1995 оны 4 дүгээр сарын 19-ний өдөр

Улаанбаатар хот

Дугаар 55

Монгол Улсын Засгийн газраас ТОГТООХ нь :

1."Суурь боловсрол эзэмшээгүй иргэдийн сургалтыг зохион байгуулах журам"-ыг хавсралтын ёсоор баталсугай.

2.Бүх шатны Засаг дарга нарт даалгах нь:

а)сургуульд элсээгүй үлдсэн болон сургуулиас завсардсан хүүхэд, түүнчлэн суурь боловсрол эзэмшээгүй насанд хүрэгчдийн бүртгэл судалгааг батлагдсан журмын дагуу хүн нэг бүрээр нарийвчлан гаргаж, мэдлэгийн түвшинг нь тодорхойлсны үндсэн дээр тэднийг зохион байгуулалттайгаар сургалтад хамруулж суурь боловсрол эзэмшүүлэх арга хэмжээг 1995/1996 оны хичээлийн жилээс эхлэн авч хэрэгжүүлсүгэй;

б)суурь боловсрол эзэмшээгүй иргэдийн сургалт зохион байгуулах бэлтгэлийг сургалтын хэлбэр, шатлалттай нь нягт уялдуулан тухай бүрт нь бүрэн хангах, сургалтыг чанартай явуулах арга хэмжээ авч байхын хамтаар сургалтын явцад байнга хяналт тавьж, үр дүнг тооцож байсугай;

в)хүндэтгэн үзэхээс бусад шалтгаанаар сургууль завсардсан хүүхдийг сургуульд нь буцаан оруулж суурь боловсрол эзэмшүүлэх арга хэмжээ авч байхын зэрэгцээ хүүхдийг сургууль завсардуулсан гэм буруутай эцэг, эх, асран халамжлагчидтай нь зохих хууль тогтоомжийн дагуу хариуцлага тооцож байсугай;

г)арга зүйч болон зөвлөх багш томилох, тэдний ажиллах журмыг батлан гаргах, хичээл, сургалтаа явуулах нөхцөл, боломжоор хангах, ерөнхий боловсролын сургуулийн багш нарыг суурь боловсрол эзэмшээгүй иргэдийн сургалтын ажилд оролцуулах арга хэмжээг шуурхай авч ажилласугай.

З.Бичиг үсэггүй болон суурь боловсрол эзэмшээгүй дайчдыг бичиг үсэгт сургах, суурь боловсрол олгох сургалтыг 1995 оноос эхлэн байнга зохион байгуулахыг Батлан хамгаалах яам (Ш.ЖАДАМБАА), Хилийн цэргийг удирдах газар (П.СҮНДЭВ), Цагдаагийн ерөнхий газар (Б.ПҮРЭВ)-т, энэ ажилд мэргэжлийн

туслалцаа үзүүлж байхыг Шинжлэх ухаан, боловсролын яам (Н.ӨЛЗИЙХУТАГ)-д тус тус даалгасугай.

4.Шинжлэх ухаан, боловсролын яам (Н.ӨЛЗИЙХУТАГ)-д даалгах нь:

а)суурь боловсрол эзэмшээгүй иргэдийн судалгаа, сургалтын тайлан гаргах маягт, тэдний боловсролын түвшинг тогтоох аргачлал, сургалтын төлөвлөгөө, заавал судлах хичээлийн үлгэрчилсэн сэдвийг 1995 оны эхний хагаст багтаан батлан гаргаж орон нутагт хүргүүлсүгэй;

б)ерөнхий боловсролын сургуулийн номын сангаар дамжуулан энэ тогтоолын дагуу сургалтад хамрагдсан иргэдийг сурах бичиг, гарын авлага, сургалтын хэрэглэгдэхүүнээр ханган үйлчлэх арга хэмжээ авч хэрэгжүүлж байсугай.

Монгол Улсын Ерөнхий сайд П.ЖАСРАЙ

Шинжлэх ухаан, боловсролын сайд Н.ӨЛЗИЙХУТАГ