ЗАСГИЙН ГАЗРЫН ТОГТООЛ (ЗАХИРАМЖ)

ТӨВИЙН ЭРЧИМ ХҮЧНИЙ СИСТЕМИЙН ҮЙЛДВЭРҮҮДИЙН ӨВЛИЙН БЭЛТГЭЛИЙГ ХАНГАХ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

1996 оны 5 дугаар сарын 21-ний өдөр

Улаанбаатар хот

Дугаар 123

Монгол Улсын Засгийн газраас ТОГТООХ нь:

Нэг.Эрчим хүч, геологи, уул уурхайн сайд Б.Жигжид, Сангийн сайд Э.Бямбажав нарт даалгах нь:

1.Багануур, Шарын гол, Шивээ-овоогийн уурхай, Төвийн эрчим хүчний системээс Нефть импорт концернд төлөх 1242,6 сая /Багануур 402,0 сая, Шарын гол 698,1 сая, Шивээ-овоо 52,9 сая, Төвийн эрчим хүчний систем 89,6 сая/ төгрөгийн өрийг тус концерноос төсөвт төлөх гаалийн албан татварт суутган тооцсугай.

2.Төвийн эрчим хүчний систем, Багануур, Шарын голын уурхайн 1995 оны орлогын болон худалдааны албан татвараас дутуу төлөгдсөн 1418,7 сая төгрөг /Төвийн эрчим хүчний систем 397 сая, Багануур 707,0 сая, Шарын гол 314,7 сая/-ийг Төвийн эрчим хүчний системийн үйлдвэрүүдийн өвлийн бэлтгэлийг хангахад зориулсан хөрөнгө оруулалт, их засварын ажилд зарцуулахаар суутган тооцох арга хэмжээ авсугай.

Хоёр.Оросын Холбооны Улсад суугаа Монгол Улсын Элчин сайдын яамны захиалгаар барьж байгаа орон сууцны барилгыг ойрын хугацаанд худалдан борлуулж, түүний орлогоос 5 сая ам.долларыг 1996 оны төвлөрсөн төсвийн нэмэгдэл орлого болгон Төвийн эрчим хүчний системийн үйлдвэрүүдийн 1996-1997 оны өвлийн бэлтгэл хангах хөрөнгө оруулалтын арга хэмжээнд зориулан зарцуулахыг Сангийн сайд Э.Бямбажав, Эрчим хүч, геологи, уул уурхайн сайд Б.Жигжид, Гадаад харилцааны сайд Ц.Гомбосүрэн нарт, уг барилгын борлуулалтын орлого төсөвт орох хүртэл хугацаанд жилийн 5 хувийн хүүтэй валютын зээлийг Монгол банкнаас Засгийн газар авч, Төвийн эрчим хүчний системд олгон өвлийн бэлтгэлийн ажлыг эхлүүлэх арга хэмжээ авахыг Сангийн яам /Э.БЯМБАЖАВ/, Эрчим хүч, геологи, уул уурхайн яам /Б.ЖИГЖИД/ нарт тус тус даалгасугай.

Гурав.Эрчим хүч,геологи, уул уурхайн сайд Б.Жигжидэд даалгах нь:

1.Эрчим хүчний үйлдвэрүүдэд тоног төхөөрөмжийн засвар хийх, өвлийн улиралд хэрэглэх нүүрс, мазутын шаардлагатай хэмжээний нөөц бүрдүүлэх нарийвчилсан график гаргуулан мөрдүүлж, өвлийн бэлтгэлийг хангах ажлыг байнгын хяналтдаа авч ажилласугай.

2.Эрчим хүчний тухай хуульд нийцүүлэн Төвийн эрчим хүчний системийн захиргааны бүтэц, зохион байгуулалтыг оновчтой болгох асуудлыг энэ оны 6 дугаар сард шийдвэрлэсүгэй.

3.Цахилгаан эрчим хүчний эзэнгүй алдагдлыг арилгах, нам хүчдэлийн шугам сүлжээг түрээсийн гэрээгээр ашиглуулах, хэрэглэгчдийг хэмжих хэрэгслээр хангах, аймаг, нийслэлийн хууль хяналтын байгууллагуудтай хамтран эрчим хүч ашиглалтын байдалд байнгын үзлэг шалгалт хийж, хэрэглэсэн эрчим хүчнийхээ үнийг зохих хугацаанд нь төлөөгүй хэрэглэгчидтэй зохих хууль тогтоомжийн дагуу хариуцлага тооцож байх арга хэмжээ авсугай.

4.Эрчим хүч, нүүрсний үйлдвэрүүдэд ажлын хариуцлагыг зохих түвшинд хүргэж өндөржүүлэх,эдийн засгийн удирдлага, бүртгэл, тооцооны ажлыг чанаржуулж үргүй зардлыг багасгах,удирдлагын чадавхи, хөдөлмөрийн сахилгыг дээшлүүлэхэд чиглэсэн зохион байгуулалт, техник технологи, эдийн засгийн иж бүрэн арга хэмжээ авч, төлбөрийн чадварыг сайжруулсугай.

5.Түлш, эрчим хүчний үйлдвэрлэл, борлуулалтын үйл ажиллагааны тогтвортой байдлыг хангаж, өртөг зардал хямдруулах, арвич хямгач ажиллагааг хэвшүүлэх замаар Төвийн эрчим хүчний систем, Багануур, Шарын гол, Шивээ-овоогийн уурхайгаас 1996 онд улс, аймаг, нийслэлийн төсөвт оруулах орлогын төлөвлөгөөг бүрэн ханган биелүүлэх арга хэмжээ авч ажилласугай.

Дөрөв.Засгийн газрын шийдвэрээр олгож байгаа хөрөнгийн эх үүсвэрийг оновчтой ашиглан, 1996-1997 оны өвөлжилтийн бэлтгэлийг бүрэн хангаж, иргэд, аж ахуйн нэгж, байгууллагыг цахилгаан, дулаанаар гачигдуулахгүй байх бүх арга хэмжээг авч хэрэгжүүлэхийг Эрчим хүч, геологи, уул уурхайн яам /Б.ЖИГЖИД/, Төвийн эрчим хүчний систем болон Улаанбаатарын гурав, дөрөвдүгээр цахилгаан станцын дарга нарт даалгасугай.

Тав. Төвийн эрчим хүчний системийн харьяанд ажиллаж байгаа Улаанбаатар хотын халаалтын зуухны ашиглалтын төв, Багахангайн халаалтын зуух, Эрдэнэтийн Улаантолгойн дулааны станц, Чойрын эрчим хүчний үйлдвэрийн 1996-1997 оны өвлийн бэлтгэлийг Төвийн эрчим хүчний системийн захиргаагаар хангуулж, Засаг даргын Тамгын газрын харьяалалд 1996 оны Ш улиралд багтаан шилжүүлэн авахыг Улаанбаатар хотын Засаг дарга /Ц.БААСАНЖАВ/, Орхон аймгийн Засаг дарга /Ч.ДОРЖПАЛАМ/, Говьсүмбэр аймгийн Засаг дарга /Н.НАСАН-ОЧИР/ нарт даалгасугай.

Монгол Улсын Ерөнхий сайд П.ЖАСРАЙ

Сангийн сайд Э.БЯМБАЖАВ

Эрчим хүч, геологи, Уул уурхайн сайд Б.ЖИГЖИД