ЗАСГИЙН ГАЗРЫН ТОГТООЛ (ЗАХИРАМЖ)

ТӨРИЙН ХЯНАЛТ ШАЛГАЛТЫН ТУХАЙ ХУУЛИЙГ ХЭРЭГЖҮҮЛЭХ ЗАРИМ АРГА ХЭМЖЭЭНИЙ ТУХАЙ

1995 оны 5 дугаар сарын 24-ний өдөр

Улаанбаатар хот

Дугаар 78

Монгол Улсын Засгийн газраас ТОГТООХ нь:

1.Монгол Улсын яам, Засгийн газрын үндсэн болон дэд бүтцэд ордог газар, нутгийн захиргааны байгууллага хийгээд улсын үйлдвэрийн газар, байгууллага, төрийн өмчийн оролцоотой аж ахуйн нэгжид дотоодын хяналт шалгалтыг зохион байгуулах нийтлэг журмыг холбогдох яам, газрын саналыг авч нэгтгэн боловсруулж 6 дугаар сарын 15-ны дотор Засгийн газрын хуралдаанд оруулахыг Монгол Улсын Шадар сайд Л.Энэбиш, Хууль зүйн сайд Н.Лувсанжав нарт даалгасугай.

2.Холбогдох сайд, тусгай газрын дарга нарт даалгах нь:

а)захиргааны хяналтын байгууллага, албадын дүрмийг Төрийн хяналт шалгалтын хууль, Захиргааны хариуцлагын тухай хуулийн зүйл, заалтад нийцүүлэн 1995 оны 6 дугаар сард багтаан шинэчлэн боловсруулж Засгийн газрын хуралдаанд оруулсугай;

б)захиргааны хяналтын төв байгууллагын дарга нарыг энэ оны 6 дугаар сарын 15-ны дотор Засгийн газарт оруулан томилуулах арга хэмжээ авсугай.

З.Захиргааны хяналтыг хэрэгжүүлэх орон нутгийн байгууллагын дарга (улсын ахлах байцаагч)-ыг захиргааны хяналтын улсын ерөнхий байцаагчтай зөвшилцсөний үндсэн дээр энэ оны 6 дугаар сард багтаан томилохыг аймаг, нийслэлийн Засаг дарга нарт даалгасугай.

4.Мэргэжлийн хяналтын байгууллага, албадын лабораторийн зориулалт, үндсэн үүрэг, тоног төхөөрөмж, хэмжих, хянах багаж хэрэгслийн хангалтын судалгааг нэгтгэн гаргаж, цаашид тэдгээрийг үр өгөөжтэй ашиглах талаар холбогдох яам, газартай хамтран энэ оны З дугаар улиралд багтаан тодорхой санал боловсруулж Засгийн газарт танилцуулахыг Үндэсний хөгжлийн газар (Ч.УЛААН)-т даалгасугай.

5.Төрийн хяналт шалгалтын талаар хүчин төгөлдөр үйлчилж байгаа хууль тогтоомж, Засгийн газрын шийдвэрийг Төрийн хяналт шалгалтын тухай хуульд нийцүүлэх арга хэмжээ авахыг Хууль зүйн яам (Н.ЛУВСАНЖАВ)-д даалгасугай.

6.Аймаг,нийслэлийн хянан шалгах хороодыг эмхлэн байгуулах, тэдгээрийг ажиллах байр болон үйл ажиллагаагаа хэвийн явуулах нөхцөл бололцоогоор хангах бэлтгэл ажлыг Засаг даргатай хамтран авч хэрэгжүүлэх, аймаг, нийслэлийн хянан шалгах хорооны дарга, гишүүдийг томилох ажлыг энэ оны 6 дугаар сард багтаан зохион байгуулахыг аймаг, нийслэлийн Иргэдийн Төлөөлөгчдийн Хурлын Тэргүүлэгчдэд зөвлөсүгэй.

7.Дор дурдсан асуудлыг энэ оны 6 дугаар сард багтаан боловсруулж Засгийн газрын хуралдаанд оруулах арга хэмжээ авахыг Засгийн газрын Хэрэг эрхлэх газар (С.БАНЗРАГЧ)-т даалгасугай:

а)Засгийн газраас хууль тогтоомж, Ерөнхийлөгчийн зарлиг, Засгийн газрын шийдвэрийг хэрэгжүүлэх ажлыг зохион байгуулах, үр дүн, биелэлтийг мэдээлэх талаар мөрдөж байсан журамд Монгол Улсын Төрийн хяналт шалгалтын хуульд нийцүүлэн өөрчлөлт оруулах;

б)"Монгол Улсын хууль тогтоомж, Засгийн газрын шийдвэрийн биелэлтэд тавих төрийн захиргааны хяналтын дүрэм"-ийг батлагдсан хуулиудад нийцүүлэн хянаж өөрчлөлт оруулах;

в)захиргааны хяналтыг хэрэгжүүлэх төв болон нутгийн захиргааны байгууллага, албадын бүтэц, зохион байгуулалт, харъяалал, ажлын зааг хуваарийг боловсронгуй болгох;

г)захиргааны хяналтын улсын байцаагчийн үнэмлэх, хувийн дугаар бүхий тэмдгийн загварыг гаргах.

8.Захиргааны хяналтыг хэрэгжүүлэх төв болон орон нутгийн байгууллагыг зохион байгуулж ажилд оруулсны дараа тэдгээрийн ажил төрлийн нэгдсэн семинарыг холбогдох бусад байгууллагатай хамтран 1995 онд багтаан зохион байгуулахыг Монгол Улсын Шадар сайд Л.Энэбишид даалгасугай.

Монгол Улсын Ерөнхий сайд П.ЖАСРАЙ

Монгол Улсын Шадар сайд Л.ЭНЭБИШ