ЗАСГИЙН ГАЗРЫН ТОГТООЛ (ЗАХИРАМЖ)

2005 оны 4 дүгээр сарын 13-ны өдөр

Улаанбаатар хот

ТОГТООЛД НЭМЭЛТ, ӨӨРЧЛӨЛТ ОРУУЛАХ ТУХАЙ /2000-178-т/

Дугаар 76

Монгол Улсын Засгийн газраас ТОГТООХ нь:

"Журам батлах тухай" Засгийн газрын 2000 оны 11 дүгээр сарын 17-ны өдрийн 178 дугаар тогтоолын 1, 2, 3 дугаар хавсралтад дор дурдсан нэмэлт, өөрчлөлт оруулсугай:

1. 1 дүгээр хавсралтаар батлагдсан "Монгол Улсын Засгийн газрын хуралдааны журам"-ын 13-т "Нийтээр дагаж мөрдөх хэм хэмжээ тогтоосон шийдвэрийн төсөл санаачилсан Засгийн газрын гишүүн буюу аймаг, нийслэлийн Засаг дарга нь уг шийдвэрээр ашиг сонирхол нь хөндөгдөж болохуйц иргэд, аж ахуйн нэгж, байгууллагын саналыг албан бичиг, хэвлэл, мэдээллийн хэрэгсэл, өөрийн байгууллагын вэб хуудсаар дамжуулан бичгээр болон цахим хэлбэрээр авсан байх шаардлагатай." гэсэн 2 дахь хэсгийг, журмын 34-т "Төлөвлөгөөнд ороогүй боловч хуралдаанаар зайлшгүй нэн яаралтай хэлэлцэн шийдвэрлэх шаардлагатай асуудал гарвал хуралдаан хийхийн урьд өдөр ажлын цаг дуусахаас өмнө Ерөнхий сайд, Шадар сайдтай тохирсны үндсэн дээр хэлэлцэх асуудлын төлөвлөгөөнд нэмэн оруулж болно." гэсэн 2 дахь хэсгийг, журмын 42-ын "л" заалтад "Хуралдаанаар хэлэлцэж байгаа асуудлын талаар Засгийн газрыг бүрдүүлж байгаа намууд зарчмын өөр байр суурьтай бол Ерөнхий сайд болон Шадар сайд нар харилцан тохиролцсоны үндсэн дээр түр завсарлага авч болно. Энэ тохиолдолд Ерөнхий сайд хуралдаан эхлэх хугацааг зарлана." гэсэн 2 дахь хэсгийг, 42-ын "м" заалтад "Засгийн газрын гишүүн хүндэтгэн үзэх шалтгаангүйгээр хуралдааныг орхиж гарахыг хориглоно." гэсэн 2 дахь хэсгийг, журмын 47-д "Хуралдаанаар хэлэлцсэн асуудлын талаар гишүүд санал зөрөлдвөл шийдвэрийг олонхийн саналаар гаргана. Олонхийн санал авч чадаагүй бол шийдвэр гараагүйд тооцно." гэсэн 2 дахь хэсгийг тус тус нэмсүгэй.

2. Мөн журмын 3-ын "товлосноор буюу" гэсний дараа "Шадар сайд, эсхүл" гэж, 61-ийн 1 дэх өгүүлбэрийн "Хэрэг эрхлэх газрын" гэсний дараа "Хуулийн хэлтсийн дарга болон" гэж тус тус нэмсүгэй.

3. Мөн журмын 30-ийг "Хуралдаанаар хэлэлцэх асуудлын төлөвлөгөө гаргахдаа Засгийн газрын нэг гишүүний эрхлэх ажлын хүрээний асуудлыг хэлэлцэж дуусгаад дараагийн гишүүний эрхлэх ажлын хүрээний асуудлыг хэлэлцэх, ингэхдээ уг асуудлыг хэлэлцэхэд олон хүн оролцож хугацаа ихээхэн шаардагдах улсын төсөв, Үндсэн чиглэл, хөтөлбөр, төлөвлөгөө, боловсон хүчний зэрэг асуудлыг төгсгөл хэсэгт оруулах зарчмыг баримтална" гэж, журмын 39-ийг "Хуралдааныг Ерөнхий сайд даргална. Ерөнхий сайдын түр эзгүйд хуралдааныг Шадар сайд даргалах бөгөөд хэрэв Ерөнхий сайд, Шадар сайд нэгэн зэрэг түр эзгүй байвал Ерөнхий сайдын үүрэг болгосноор түүний үүргийг түр гүйцэтгэж байгаа Засгийн газрын аль нэг гишүүн хуралдааныг даргална" гэж тус тус өөрчлөн найруулсугай.

4. Мөн журмын 8-ын "д" заалтад "дангаар" гэснийг "Шадар сайдтай санал нэгдэж" гэж, 14, 16, 24-ийн "в", 24-ийн "г" заалтад "Санхүү, эдийн засгийн яам" гэснийг "Сангийн яам" гэж, 15-ын "Ерөнхий сайдаас" гэснийг "Ерөнхий сайд, Шадар сайдаас" гэж, 20-д "Холбогдох сайдаас" гэснийг "Холбогдох яам, агентлаг, аж ахуйн нэгж, байгууллага, иргэдээс" гэж, 29-д "Ерөнхий сайдад" гэснийг "Ерөнхий сайд болон Шадар сайдад" гэж, журмын 64-т "Ерөнхий сайдын хэвлэл мэдээлэл хариуцсан алба" гэснийг "Засгийн газрын хэвлэл мэдээллийн алба" гэж тус тус өөрчилсүгэй.

5. Журмын 42-ын "б" заалтыг хүчингүй болсонд тооцсугай.

6. Тогтоолын 2 дугаар хавсралтыг дор дурдсан байдлаар өөрчлөн найруулсугай:

ЗАСГИЙН ГАЗРЫН ХУРАЛДААНД ОРОЛЦОХ АЛБАН ТУШААЛТНЫ ЖАГСААЛТ

Нэг. Дор дурдсан албан тушаалтан хуралдаанд заавал оролцоно:

Засгийн газрын Хэрэг эрхлэх газрын тэргүүн дэд дарга;

Засгийн газрын Хэрэг эрхлэх газрын хуулийн хэлтсийн дарга;

Засгийн газрын Хэрэг эрхлэх газрын зохион байгуулалтын хэлтсийн дарга;

Засгийн газрын хэвлэл мэдээллийн албаны дарга.

Хоёр. Дор дурдсан албан тушаалтан зөвлөх эрхтэйгээр холбогдох асуудлыг хэлэлцэх үед оролцоно:

Монгол банкны ерөнхийлөгч;

Монгол Улсын ерөнхий аудитор;

Төрийн албаны зөвлөлийн дарга;

Үндэсний статистикийн газрын дарга;

Нийслэлийн Засаг дарга бөгөөд Улаанбаатар хотын захирагч;

Монгол Улсын Ерөнхийлөгчийн зөвлөх;

Ерөнхий сайдын ахлах зөвлөх;

Шадар сайдын ахлах зөвлөх;

7. Тогтоолын 3 дугаар хавсралтыг дор дурдсан байдлаар өөрчлөн найруулсугай:

ЗАСГИЙН ГАЗРЫН ХУРАЛДААНААР ХЭЛЭЛЦЭХ АСУУДЛЫН МАТЕРИАЛ, ТӨЛӨВЛӨГӨӨ ХҮРГҮҮЛЭХ АЛБАН ТУШААЛТНЫ ЖАГСААЛТ

Нэг. Материал, төлөвлөгөөг бүрнээр хүргүүлэх:

Монгол Улсын Ерөнхийлөгч;

Монгол Улсын Их Хурлын дарга;

Монгол Улсын Ерөнхий сайд;

Монгол Улсын Засгийн газрын гишүүд-17;

Засгийн газрын Хэрэг эрхлэх газрын тэргүүн дэд дарга;

Ерөнхий сайдын ахлах зөвлөх;

Засгийн газрын Хэрэг эрхлэх газрын хуулийн хэлтсийн дарга;

Засгийн газрын хэвлэл, мэдээллийн албаны дарга.

Хоёр. Төлөвлөгөө болон холбогдох материалыг хүргүүлэх:

Төрийн албаны зөвлөлийн дарга;

Монгол банкны ерөнхийлөгч;

Монгол Улсын ерөнхий аудитор;

Үндэсний статистикийн газрын дарга;

Нийслэлийн Засаг дарга бөгөөд Улаанбаатар хотын захирагч.

Монгол Улсын Ерөнхий сайд Ц.ЭЛБЭГДОРЖ

Монгол Улсын сайд, Засгийн газрын Хэрэг эрхлэх газрын дарга С.БАЯРЦОГТ