МОНГОЛ УЛСЫН ЗАСГИЙН ГАЗРЫН ТОГТООЛ

2008 оны 12 дугаар сарын 3-ны өдөр

Дугаар 50

Улаанбаатар хот

ТӨРИЙН БОЛОН ОРОН НУТГИЙН ӨМЧИЙН ТАЛААР АВЧ ХЭРЭГЖҮҮЛЭХ ЗАРИМ АРГА ХЭМЖЭЭНИЙ ТУХАЙ

Төрийн болон орон нутгийн өмчийн тухай хуулийн 9 дүгээр зүйл, 70 дугаар зүйлийн 4 дэх хэсэгт заасныг үндэслэн Монгол Улсын Засгийн газраас ТОГТООХ нь:

1. Улсын төсвийн хөрөнгө оруулалт, зээл, тусламж, хандивын хөрөнгөөр 2004-2008 онд төрийн болон орон нутгийн өмчлөлд бий болсон хөрөнгийг бүртгэх, үнэлэх, санхүүгийн тайланд бүрэн тусгах ажлыг 2009 оны I улиралд багтаан хэрэгжүүлэх арга хэмжээ авахыг Сангийн сайд С.Баярцогт, Төрийн өмчийн хороо (Д.Сугар), аймаг, нийслэлийн Засаг дарга нарт, дүнг нэгтгэн Засгийн газарт танилцуулахыг Төрийн өмчийн хороо (Д.Сугар)-нд тус тус даалгасугай.

2. Улсын төсвийн болон хувийн хөрөнгө оруулалтаар хайгуул хийж нөөцийг нь тогтоосон ашигт малтмалын орд газруудын хилийн уртраг, өргөрөг болон тусгай зөвшөөрөл эзэмшигчийг нарийвчлан тогтоож орд бүрээр нь нөөцийн нэр төрөл, тоо хэмжээг төрийн өмчийн бүртгэлд тусгах асуудлыг 2009 оны I улиралд багтаан шийдвэрлэх арга хэмжээ авахыг Эрдэс баялаг, эрчим хүчний сайд Д.Зоригт, Төрийн өмчийн хороо (Д.Сугар)-нд даалгасугай.

3. Төсвийн хөрөнгөөр бий болсон оюуны өмчийг бүртгэх, үнэлэх, санхүүгийн тайланд тусгах, хадгалах журам боловсруулж, холбогдох хууль тогтоомжид нийцүүлэн баталж мөрдүүлэхийг Оюуны өмчийн газрын дарга Н.Чинбат, Төрийн өмчийн хороо (Д.Сугар)-нд даалгасугай.

4. Монгол Улсын геодезийн цэг, тэмдэгтийн нарийвчилсан тооллого хийх зардлыг улсын төсөвт тусгах арга хэмжээ авахыг Сангийн сайд С.Баярцогтод, тооллогын ажлыг 2010 оны эхний хагас жилд багтаан хийж дуусган ашиглалт, хадгалалт, хамгаалалтад нь хяналт тавьж ажиллахыг Зам, тээвэр, барилга, хот байгуулалтын сайд Х.Баттулга, Хууль зүй, дотоод хэргийн сайд Ц.Нямдорж болон бүх шатны Засаг дарга нарт тус тус даалгасугай.

5. Монгол Улсаас гадаад улсад суугаа Дипломат төлөөлөгчийн газруудын эзэмшилд байгаа газар, үл хөдлөх хөрөнгийг Монгол Улсын болон суугаа орны эрх зүйн орчинд нийцүүлэн баталгаажуулах, маргаантай эд хөрөнгийг холбогдох хууль тогтоомж, гэрээ, хэлэлцээрийн дагуу шийдвэрлүүлэх арга хэмжээ авахыг Гадаад харилцааны сайд С.Батболд, Төрийн өмчийн хороо (Д.Сугар)-нд даалгасугай.

6. Өрхийн эмнэлгийн барилга, эд хөрөнгө болон "Эмийн эргэлтийн сан"-д эзэмшүүлсэн хөрөнгийг орон нутгийн өмчлөлд бүртгэх, ашиглалтад нь хяналт тавьж ажиллах арга хэмжээ авахыг Эрүүл мэндийн сайд С.Ламбаа, аймаг, нийслэлийн Засаг дарга нарт, дүнг 2009 оны П улиралд багтаан Засгийн газарт танилцуулахыг Төрийн өмчийн хороо (Д.Сугар)-нд тус тус даалгасугай.

7. Төрийн болон орон нутгийн өмчийн худаг, услалтын систем, зам, гүүр болон радио, телевиз, үүрэн телефоны радио давтамжийн зурвасыг 2008 оны 12 дугаар сарын байдлаар нарийвчлан тоолж, өмчлөгчийг нь тогтоох, бүртгэлд бүрэн хамруулж, тайлан тэнцэлд тусгах ажлыг 2009 оны 7 дугаар сарын 1-ний дотор шийдвэрлэх арга хэмжээ авахыг Хүнс, хөдөө аж ахуй, хөнгөн үйлдвэрийн сайд Т.Бадамжунай, Зам, тээвэр, барилга, хот байгуулалтын сайд Х.Баттулга, Мэдээлэл, харилцаа холбоо, технологийн газрын дарга Ж.Сансар, Харилцаа холбооны зохицуулах хороо (Б.Болдбаатар)-нд, дүнг нэгтгэн Засгийн газарт танилцуулахыг Төрийн өмчийн хороо (Д.Сугар)-нд тус тус даалгасугай.

8. Төрийн өмчит болон төрийн өмчийн оролцоотой хуулийн этгээдийн эзэмшил газар болон баталгаажуулсан хэмжээг тогтоосон шийдвэрт өөрчлөлт оруулах тухай бүр Төрийн өмчийн хороотой урьдчилан зөвшилцөж байхыг аймаг, нийслэлийн Засаг дарга нарт үүрэг болгосугай.

9. Төрийн болон орон нутгийн өмчийн тооллогоор эд хөрөнгө дутагдуулсан хуулийн этгээдийн удирдлага, холбогдох ажилтанд хариуцлага тооцох, хууль хяналтын байгууллагад шилжүүлэх арга хэмжээ авч, дүнг Төрийн өмчийн хороонд хүргүүлэхийг Төсвийн ерөнхийлөн захирагч нарт даалгасугай.

10. Дор дурдсан арга хэмжээг авч хэрэгжүүлэхийг Төрийн өмчийн хороо (Д.Сугар)-нд даалгасугай:

а) төрийн өмчит болон төрийн өмчийн оролцоотой хуулийн этгээдийн урт хугацааны зээлийн ашиглалт, түүнийг төлсөн байдлын талаар судалгаа, дүгнэлт гаргаж, шаардлагатай бол тодорхой санал боловсруулан холбогдох эрх бүхий байгууллагаар шийдвэрлүүлэх;

б) тооллогоор дутагдсан хөрөнгийг нөхөн төлүүлэх болон цаашид ашиглах боломжгүй болсон, хэрэгцээнээс илүүдэлтэй үндсэн хөрөнгийг шилжүүлэх, худалдах, данснаас хасах болон өмчлөлийн талаар маргаантай байгаа хөрөнгийн асуудлыг хууль тогтоомжийн дагуу холбогдох яам, Засгийн газрын агентлаг, аймаг, нийслэлийн Засаг даргатай хамтран шийдвэрлэх арга хэмжээ авч, нэгдсэн дүнг 2009 оны 2 дугаар сарын 10-ны дотор Засгийн газарт тайлагнах;

в) төрийн өмчит болон төрийн өмчийн оролцоотой хуулийн этгээдтэй байгуулсан "Өмч эзэмшлийн гэрээ"-г төрийн өмчийн эд хөрөнгийн эзэмшил, ашиглалт, хадгалалт, хамгаалалтад бүртгэлээр тавих хяналтыг сайжруулахад чиглүүлж, гэрээний заалтыг биелүүлээгүй, өмч хөрөнгө дутагдуулсан, үрэгдүүлсэн, бүртгэл тайланд тусгаагүй буруутай этгээдэд гэрээ болон зохих хууль тогтоомжийн дагуу хариуцлага тооцож ажиллах;

г) төрийн өмчит хуулийн этгээдийн үндсэн хөрөнгөд хамаарах захиалгат эд хөрөнгийг төвлөрүүлэн хангах асуудлаар санал боловсруулж 2009 оны I улиралд багтаан Засгийн газарт танилцуулах.

11. Энэхүү тогтоолын биелэлтэд хяналт тавьж ажиллахыг Монгол Улсын сайд, Засгийн газрын Хэрэг эрхлэх газрын дарга Б.Долгорт даалгасугай.

Монгол Улсын Ерөнхий сайд С.БАЯР

Монгол Улсын сайд, Засгийн газрын Хэрэг эрхлэх газрын дарга Б.ДОЛГОР