МОНГОЛ УЛСЫН ЗАСГИЙН ГАЗРЫН ТОГТООЛ

2011 оны 7 дугаар сарын 20-ны өдөр

Дугаар 233

Улаанбаатар хот

ТӨР,ЗАСГИЙН ҮЙЛЧИЛГЭЭНИЙ АВТОБААЗЫН ТАЛААР АВАХ ЗАРИМ АРГА ХЭМЖЭЭНИЙ ТУХАЙ

Засгийн газрын тухай хуулийн 25 дугаар зүйлийн 2-ын 1 дэх заалт (хоёр дахь), Төрийн албаны тухай хуулийн 27.1.3-т заасныг үндэслэн Монгол Улсын Засгийн газраас ТОГТООХ нь:

1. Төр, засгийн байгууллагын тээврийн үйлчилгээг хэвийн явуулах, ажиллагсдын цалин хөлсийг нэмэгдүүлэх зорилгоор Төр, засгийн авто үйлчилгээний баазын ажиллагсдын цалин, түүнтэй холбогдсон зардлыг жил бүр улсын төсөвт тусган санхүүжүүлж байхыг Сангийн сайд С.Баярцогт, Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар нарт үүрэг болгосугай.

2. Төр, засгийн үйлчилгээний автобаазыг зохион байгуулалтын хувьд төр, засгийн автомашины үйлчилгээний хэсэг, хөдөө ажил болон дуудлага, үйлчилгээний машины хэсэг, засварын хэсэгтэйгээр зохион байгуулж баазын бизнес төлөвлөгөөг шинэчлэн баталж тус баазын удирдлагыг диспетчерийн арга барилаас бизнесийн арга барилд шилжүүлэх, ажиллагсдын нийгмийн асуудлыг сайжруулах, үйлчилгээний соёл, чанарыг дээшлүүлэх арга хэмжээг шат дараатай авахыг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатарт даалгасугай.

3. Төр, засгийн үйлчилгээний автобаазын автомашины парк шинэчлэлийг "нэг марк-нэг засвар үйлчилгээ" гэсэн зарчим баримтлан хийхээр тогтоосугай.

4. Засгийн газрын гишүүн болон түүнтэй адилтгах албан тушаалтны албан хэрэгцээнд үйлчилж байгаа автомашины нормыг 100 мянган километрээр тогтоож, 4 жил тутам шинэчлэх арга хэмжээ авч байсугай.

5. "Суудлын автомашины талаар авах зарим арга хэмжээний тухай" Засгийн газрын 2007 оны 12 дугаар сарын 26-ны өдрийн 349 дүгээр тогтоолоор баталсан лимитийг мөрдөж, хэтрүүлэн хэрэглэсэн тохиолдолд шатахууны зардлыг тухайн албан тушаалтнаар нөхөн төлүүлж байсугай.

6. Албан тушаалын болон албан ажлын суудлын автомашин хэрэглэх эрх бүхий албан тушаалтан улсын автомашинаар үйлчлүүлэхээс өөрийн хүсэлтээр 4 болон түүнээс дээш жилийн хугацаагаар татгалзсан нөхцөлд тээврийн үйлчилгээнд мөрдөж байгаа үнэ тарифаар тогтоосон зардлыг 20 хувийн нэмэгдлийн хамт уг албан тушаалтанд олгож байхыг төсвийн ерөнхийлөн захирагч нарт зөвшөөрч, энэ тухай Засгийн газрын Хэрэг эрхлэх газар болон Сангийн яаманд мэдэгдэн жил бүрийн төсөв, төлөвлөгөөнд тусгуулж байхаар тогтоосугай. /ЗГ-ын 2014-5-10-ны 150-р тогтоолоор хүчингүй болсонд тооцсон/

7. Дараахь арга хэмжээ авахыг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар, Сангийн сайд С.Баярцогт нарт даалгасугай:

7.1. Автобаазын парк шинэчлэлд шаардагдах хөрөнгийг хөрөнгө оруулалтын төлөвлөгөөнд тусгаж байх.

7.2. Төр, засгийн үйлчилгээний автомашины нэгдсэн гарааш барих хөрөнгийг 2012-2013 оны улсын хөрөнгө оруулалтын төлөвлөгөөнд тусгах.

7.3. Тус баазын засварын цехэд шаардлагатай тоног төхөөрөмжийн үнэ болох 188.5 (нэг зуун наян найман сая таван зуун мянган) сая төгрөгийг нэгдсэн гарааш баригдаж ашиглалтад орох үед тоног төхөөрөмж суурилагдсан байхаар тооцон хөрөнгө оруулалтын төлөвлөгөөнд тусгах.

8. Засгийн газрын 2007 оны 349 дүгээр тогтоолоор баталсан "Албан тушаалын болон албан ажлын суудлын автомашин хэрэглэх эрх бүхий албан тушаалтны жагсаалт"-д ороогүй албан тушаалтан (зарим яам болон Засгийн газрын агентлагийн газар, хэлтсийн дарга нар гэх мэт) суудлын автомашин хэрэглэж байгааг таслан зогсоохыг төсвийн ерөнхийлөн захирагч нар, Төрийн өмчийн хороо (Д.Сугар)-нд даалгасугай.

9. Төр, засгийн үйлчилгээний автобаазын үйлчилгээний соёлыг дээшлүүлэх зорилгоор мэргэжлийн жолоочийг сонгон ажиллуулахдаа дараахь шаардлагыг харгалзаж байхаар тогтоосугай:

9.1. Мэргэжлийн В, С, Д болон бусад ангилалтай, мэргэшсэн жолоочийн үнэмлэхтэй байх;

9.2. Тээврийн хэрэгслийн жолоочоор 5-аас доошгүй жил ажилласан байх;

9.3. Хэрэглэгчдэд үйлчлэх сургалтад хамрагдсан байх.

10. Төр, засгийн үйлчилгээний автобаазаас төр, засгийн байгууллагуудад үйлчлэх тээврийн үйлчилгээний нэг километрийн тарифыг дараахь нөхцөлийг харгалзан тухай бүр тогтоож байхыг Сангийн сайд С.Баярцогтод даалгасугай:

10.1. Автомашины сэлбэг хэрэгсэл, шатах тослох материалын үнэ, ханшийн өөрчлөлт.

10.2. Нормативын дагуу байгуулбал зохих автомашины элэгдлийн 40 хувийг тусгасан зардал.

10.3. Хөдөө ажлын автомашины тариф нь явах замын нөхцөл, улирлын онцлог байдлыг харгалзсан байх. /ЗГ-ын 2014-5-10-ны 150-р тогтоолоор 10-р зүйлийг хүчингүй болсонд тооцсон/

11. Энэ тогтоолоор тогтоосон жишиг, норм хэмжээг дагаж мөрдөхийг Засгийн газрын гишүүд, Төрийн өмчийн хороо (Д.Сугар), аймаг, нийслэлийн Засаг дарга нарт үүрэг болгосугай.

12. Энэ тогтоолд заасан жишгийг харгалзан ажиллахыг Ерөнхийлөгчийн Тамгын газар, Улсын Их Хурлын Тамгын газар, Үндэсний аюулгүй байдлын зөвлөл, Улсын Их Хурлаас байгуулагддаг бусад байгууллагын удирдлага болон Улсын дээд шүүхийн ерөнхий шүүгч, Улсын ерөнхий прокурор нарт зөвлөсүгэй.

13. Гадаад орон, олон улсын байгууллагын зээл, хандив тусламжийн хөрөнгөөр хэрэгжиж байгаа төсөл, хөтөлбөрийн хүрээнд хэрэглэх автомашинд энэ тогтоолоор тогтоосон жишгийг мөрдүүлэхийг Сангийн сайд С.Баярцогт, Төрийн өмчийн хороо (Д.Сугар)-нд үүрэг болгосугай.

14. Энэ тогтоол гарсантай холбогдуулан "Төр, засгийн үйлчилгээний автобаазын талаар авах зарим арга хэмжээний тухай" Засгийн газрын 2001 оны 4 дүгээр сарын 13-ны өдрийн 81 дүгээр тогтоолыг хүчингүй болсонд тооцсугай.

Монгол Улсын Ерөнхий сайд С.БАТБОЛД

Монгол Улсын сайд, Засгийн газрын Хэрэг эрхлэх газрын дарга Ч.ХҮРЭЛБААТАР