ЗАСГИЙН ГАЗРЫН ТОГТООЛ (ЗАХИРАМЖ)

УЛСЫН ТӨСВИЙН ТӨВЛӨРСӨН ХӨРӨНГӨ ОРУУЛАЛТААР 1993 ОНД ХЭРЭГЖҮҮЛЭХ ТӨСӨЛ, АРГА ХЭМЖЭЭНИЙ ТУХАЙ

1993 оны 4 дүгээр сарын 18-ны өдөр

Улаанбаатар хот

Дугаар 62

Монгол Улсын эдийн засаг, нийгмийн хөгжлийн 1993 оны үндсэн чиглэлийг хэрэгжүүлэх зорилгоор Монгол Улсын Засгийн газраас ТОГТООХ нь:

1.Энэ онд хэрэгжүүлэх төсөл, арга хэмжээний талаар холбогдох яам, тусгай газар, аймаг, нийслэлийн Засаг даргын Тамгын газар, хотуудын Ардын Хурлын гүйцэтгэх захиргаатай урьдчилан тохиролцсоныг үндэслэн улсын төсвийн төвлөрсөн хөрөнгө оруулалтын хуваарийг 1 дүгээр хавсралтын ёсоор, төсвийн хөрөнгө оруулалтаар санхүүжүүлэх барилга байгууламжийн жагсаалтыг 2 дугаар хавсралтын ёсоор тус тус баталсугай.

2.Улсын төсвийн хөрөнгөөр санхүүжүүлэн барьж байсан боловч дуусаагүй байгаа энэ тогтоолын 3 дугаар хавсралтад дурдсан барилга байгууламжийг оновчтой хувилбараар хувьчлах ажлыг зохион байгуулахыг Өмч хувьчлалын комисс (н.ЭНЭБИШ), Үндэсний хөгжлийн газар (н.УЛААН)-т даалгасугай.

3.Улсын төсвөөр санхүүжүүлэн барьж байсан барилга байгууламжийг хувьчилсны үр дүнд бий болсон хөрөнгийг хөрөнгө оруулалтын зориулалтаар ашиглах улсын төсвийн зээлийн санд оруулж Засгийн газрын хяналтын дор хэрэгжүүлэх төсөл, арга хэмжээг санхүүжүүлэхэд ашиглаж байх журам тогтоох нь зүйтэй гэж үзсүгэй.

4.Хөрөнгө оруулалтын зориулалтаар ашиглах улсын төсвийн зээийн санг бүрдүүлэх, ашиглах журам гаргаж мөрдүүлэхийг Өмч хувьчлалын комисс, Үндэсний хөгжлийн газар, Сангийн яаманд даалгасугай.

5.Яам, тусгай газар, аймаг, нийслэлийн Засаг даргын Тамгын газар, хотуудын Ардын Хурлын гүйцэтгэх захиргаанд даалгах нь:

а)энэ тогтоолын 4 дүгээр хавсралтад дурдсан нийгмийн зориулалттай барилга байгууламжийг 1993 онд улсын төсвийн хөрөнгөөр санхүүжүүлэх боломжгүй байгааг харгалзан тэдгээрийн барилгын ажлыг түр зогсоож, бүрэн бүтэн байдлаар нь хадгалах буюу эсвэл хувьчлан зориулалтынх нь дагуу ашиглах арга хэмжээ авсугай;

б)хөрөнгө оруулалтын хэмжээ багасч байгаатай холбогдуулан барилгын байгууллагуудын хүч чадлыг хадгалж оновчтой ашиглах, ажлаар хангах тодорхой арга хэмжээ авсугай;

в)хөрөнгө оруулалтын гадаад, дотоод эх үүсвэрийг болон дулаан, цахилгааны сүлжээ, цэвэр,бохир усны шугам, цэвэрлэх байгууламжийн асуудлыг иж бүрэн шийдвэрлэлгүйгээр барилга байгууламжийг барих ажлыг эхлүүлдэггүй байх журам тогтоон мөрдүүлсүгэй;

г)салбар, орон нутгийг хөгжүүлэх ойрын болон дунд хугацааны зорилтыг хэрэгжүүлэхэд санхүү, материал, ажиллах хүчний нөөцийг үр ашигтай ашиглах, гадаад орон, олон улсын байгууллагын тусламжтайгаар хэрэгжүүлэх төсөл, арга хэмжээг улсын хөрөнгө оруулалтын нэгдсэн бодлоготой уялдуулан боловсруулж ажилласугай.

Монгол Улсын Ерөнхий сайд П.ЖАСРАЙ

Үндэсний хөгжлийн газрын дарга, сайд Ч.УЛААН