ЗАСГИЙН ГАЗРЫН ТОГТООЛ (ЗАХИРАМЖ)

ҮХРИЙН ГОЦ ХАЛДВАРТ ӨВЧИН ГАРСАНТАЙ ХОЛБОГДУУЛАН АВАХ ЗАРИМ АРГА ХЭМЖЭЭНИЙ ТУХАЙ

1992 оны 03 дугаар сарын 07-ны өдөр

Улаанбаатар хот

Дугаар 40

Монгол улсын Засгийн газраас ТОГТООХ нь:

1.Үхрийн гоц халдварт өвчний тархалтаас сэргийлэх зорилгоор Увс аймгийн Давст, Сагил, Бөхмөрөн, Баян-Өлгий аймгийн Ногооннуур, Хөвсгөл аймгийн Бүрэнтогтох сумын нутаг дэвсгэрт 4 сарын хугацаагаар хорио цээрийн онцгой дэглэм тогтоосугай.

2.Хорио цээрийн онцгой дэглэм тогтоосон нутаг дэвсгэрт дор дурдсан арга хэмжээ авч хэрэгжүүлэхийг Увс, Баян-өлгий, Хөвсгөл аймгийн Ардын Хурлын гүүйцэтгэх захиргаанд даалгасугай:

а/ гоц халдварт өвчний голомт бий болсон газар, түүний орчныг мал эмнэлгийн албаны дүрэм, хорио цээрийн шаардлагын дагуу хамгаалалттай болгож, дэглэмийг чанд сахиулан мөрдүүлэх, хүн, малын хөдөлгөөнийг журамлах, ариутгал, халдваргүйжүүлэлтийг чанартай хийх, малын оношилгоо, эмчилгээ, урьдчилан сэргийлэх арга хэмжээг шуурхай хэрэгжүүлэх үндсэн дээр уг өвчний тархалтыг таслан зогсоох арга хэмжээ авах;

б/ үхсэн үхрийн сэг зэмийг зохих журмын дагуу шуурхай устгах, хөрс, ургамлыг ариутган цэвэршүүлэх ажлыг аймаг, сумын иргэний хамгаалалтын сургалтын хэлбэрээр зохион байгуулж байхаас гадна Тувагаас орж ирж үхсэн үхрийн сэгийг нь гүйцээн цэвэрлүүлж газрыг 1992 оны 4 дүгээр сард багтаан ариутгуулах;

в/ хорио цээрийн онцгой дэглэм тогтоосон бүсэд байгаа үхэр сүрэг урьдчилан сэргийлэх тарилгад бүрэн хамрагдсан эсэхийг нарийвчлан шалгаж, таригдаагүй үхрийг 1992 оны 3 дугаар сарын 25-ны дотор гүйцээж вакцинжуулах арга хэмжээ авах;

г/ хорио цээрийн онцгой дэглэм тогтоосон бүс нутагт өөр сумаас ирж өвөлжиж байгаа айл, малыг уг бүсэд нь 4 сараас доошгүй хугацаагаар байлгах арга хэмжээ авах;

д/ хорио цээрийн онцгой дэглэм тогтоосон бүсэд ажиллаж байгаа мал эмнэлгийн албадыг суудлын машинаар хангах, аймгийн байнгын онцгой комисс, мал эмнэлгийн газрын мэдэлд хорио цээрийн хугацаанд суудлын машин нэгийг байнга ажиллуулах арга хэмжээ авч шатахууныг шийдвэрлэж өгөх;

е/ малчид, хөдөлмөрчдөд гоц халдварт өвчний хор холбогдол, хорио цээрийн дэг журмыг сахих талаар сурталчлан таниулж ойлгуулах арга хэмжээ авч, энэ ажилд мэргэжлийн хүмүүсийг татан оролцуулж байх.

3.Хорио цээрийн онцгой дэглэм тогтоосон бүстэй хил залгаа сумдад үхрийн гоц халдварт өвчнөөс урьдчилан сэргийлэх, уг бүс рүү мал оруулах, тэндээс мал гаргахыг бүрэн зогсоох арга хэмжээг 3 дугаар сарын 10-наас эхлэн авахыг Увс, Баян-Өлгий, Хөвсгөл аймгийн болон холбогдох сумдын Ардын Хурлын гүйцэтгэх захиргаа, Хөдөө аж ахуйн яаманд даалгасугай.

4.Үхрийн гоц халдварт өвчин гарсантай холбогдуулан 1992 онд Холбоот Орос улстай хил залгаа нутгаас мал оруулах, манай талаас мал гаргаж бэлчээрлүүлэхийг хатуу хориглосугай.

Үүнтэй холбогдуулан хилийн хамгаалалтыг чангатгах, хяналт шалгалтын үр нөлөөг дээшлүүлэх арга хэмжээ авахыг Баян-өлгий, Увс, Завхан, Хөвсгөл, Булган, Сэлэнгэ, Хэнтий, Дорнод аймгийн Ардын Хурлын гүйцэтгэх захиргаа, Улсын аюулгүй байдлыг хангах ерөнхий газар, Улсын гаалийн ерөнхий газарт даалгасугай.

5.Дэглэм зөрчин буюу гэрээ хэлэлцээргүйгээр улсын хил давж орж ирсэн малыг цуглуулж саатуулах цэгүүдийг хилийн орчинд 4 дүгээр сард багтаан байгуулахыг холбогдох аймгийн Ардын Хурлын гүйцэтгэх захиргаад, Улсын аюулгүй байдлыг хангах ерөнхий газарт даалгасугай.

6.Хөдөө аж ахуйн яам, Улсын аюулгүй байдлыг хангах ерөнхий газарт даалгах нь:

а/ хорионы хугацаанд хил давж орж ирсэн малыг саатуулах нөхцөл, журмыг тухайн газар нутгийн онцлогтой уялдуулан холбогдох аймагтай хамтран 1992 оны 3 дугаар сарын 20-нд багтаан боловсруулж мөрдүүлсүгэй;

бхил зөрчигчдөд болон малаа хил давуулсан иргэдэд ногдуулах торгууль, саатуулагдсан малд ногдуулах төлбөрийн хэмжээг 1992 оны 4 дүгээр сард багтаан гаргаж мөрдсүгэй.

7.Тува улстай хил залгаа улсын хилийн зарим шаардлагатай цэгүүдэд хилийн, гаалийн, хүний болон мал эмнэлгийн, ургамлын хорио цээрийн хяналт тогтоох арга хэмжээг 1992 оны 4 дүгээр сард багтаан авахыг Улсын гаалийн ерөнхий газар, Улсын аюулгүй байдлыг хангах ерөнхий газар, Эрүүл мэндийн яам, Хөдөө аж ахуйн яаманд даалгасугай.

8.Энэ тогтоолын дагуу хорио цээрийн онцгой дэглэм тогтоосон бүсэд үхрийн гоц халдварт өвчинтэй тэмцэх, урьдчилан сэргийлэх арга хэмжээг шуурхай хэрэгжүүлэхэд шаардагдах эм, тарилга, ариутгалын бодис худалдан авах, үйлдвэрлэх хөрөнгийн эх үүсвэрийг 1992 оны 3 дугаар сард багтаан шийдвэрлэж өгөхийг Улсын байнгын онцгой комисс, Сангийн яаманд даалгасугай.

Монгол улсын Засгийн газрын тэргүүн шадар сайд Д.ГАНБОЛД

Хөдөө аж ахуйн сайд Д.РАДНААРАГЧАА