ЗАСГИЙН ГАЗРЫН ТОГТООЛ (ЗАХИРАМЖ)

ХИМИЙН БОДИСЫН АЮУЛГҮЙ БАЙДЛЫГ ХАНГАХ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

2000 оны 2 дугаар сарын 16-ны өдөр

Улаанбаатар хот

Дугаар 29

Химийн хорт бодисоос хамгаалах тухай хуулийг хэрэгжүүлэх зорилгоор Монгол Улсын Засгийн газраас ТОГТООХ нь:

1.Химийн бодисын ашиглалт, хадгалалт, хамгаалалт, бүртгэлийг сайжруулан журамлах, болзошгүй аюул, ослоос урьдчилан сэргийлэх арга хэмжээг төлөвлөгөөтэйгээр хэрэгжүүлэх, химийн бодисын тухай улсын хэмжээний нэгдсэн сан бүрдүүлэх шаардлагыг харгалзан химийн бодисын улсын үзлэг, тооллогыг 2000 оноос эхлэн хоёр жил тутам явуулж байхаар тогтоосугай.

2.Байгаль орчны сайд бөгөөд Химийн бодис ашиглах үйл ажиллагааг зохицуулах зөвлөлийн дарга С.Мэндсайхан, Эрүүл мэнд, нийгмийн хамгааллын сайд С.Сонин нарт даалгах нь:

а/бэлтгэлийг урьдчилан хангасны үндсэн дээр химийн бодисын улсын үзлэг, тооллогыг хугацаанд нь зохион байгуулан явуулж, түүний дүн болон үзлэгийн мөрөөр хэрэгжүүлэх арга хэмжээний төлөвлөгөөг тооллого хийсэн тухайн жилийн 12 дугаар сарын 15-ны дотор Засгийн газарт танилцуулж байсугай;

б/химийн бодис, тэдгээрийн зарцуулалтыг бүртгэх болон улсын үзлэг, тооллого явуулах маягт, хөтлөх аргачилсан зааврыг 2000 оны эхний хагас жилд багтаан баталж орон нутагт хүргүүлэх, химийн хурц болон архаг хордлогыг бүртгэх анхан шатны маягтыг боловсронгуй болгох арга хэмжээ авсугай;

в/химийн бодис үйлдвэрлэх, импортлох, хэрэглэхэд хүн амын эрүүл мэндэд сөрөг нөлөө үзүүлэхээс урьдчилан сэргийлэх, хордлогын үед шаардлагатай эрүүл мэндийн тусламж үзүүлэх үйлчилгээг эрчимжүүлэх, хордлогын шалтгааныг богино хугацаанд судлан тогтоож нийтэд мэдээлэх арга хэмжээ авч байсугай;

г/сургалт, семинар зохион байгуулах, гарын авлага, зааварчилгаар хангах замаар аймаг, нийслэлийн химийн бодисын улсын үзлэг, тооллогын комиссын ажлын бэлтгэлийг тооллого явуулах тухайн жилийн I улиралд багтаан хангуулж байсугай;

д/химийн хорт болон аюултай бодисын хаягдлыг саармагжуулах, хоргүйжүүлэх, химийн бодисын хаягдлыг устгах төрөлжсөн цэг байгуулах аргачлал, заавар боловсруулан гаргаж мөрдүүлэх асуудлыг Улсын иргэний хамгаалалтын газартай, химийн онцгой хортой болон онцгой аюултай бодис хадгалах гаалийн баталгаат агуулах бий болгох асуудлыг Улсын гаалийн ерөнхий газартай тус тус хамтран судалж, хэрэгжүүлэх арга хэмжээ авсугай;

е/химийн хорт бодисын хаягдал болон ашиглалтын шаардлага хангахгүй болсон химийн хорт бодисыг устгах цэгийг 2000 оны П улиралд багтаан аймаг, нийслэлд тогтоож өгөх арга хэмжээ авсугай.

3.Химийн бодисын улсын үзлэг, тооллого явуулахад шаардагдах зардлыг 2002 оноос эхлэн тухайн жилийн байгаль орчны төвлөрсөн арга хэмжээний төсөвт, химийн хорт болон аюултай бодисын тухай мэдээллийн сангийн нэгдсэн сүлжээ байгуулах, химийн бодисын бохирдол, хор аюулын зэргийг тодорхойлох техник-технологийг шинэчлэхэд шаардагдах хөрөнгийг 2001 оноос эхлэн улсын төвлөрсөн төсөвт тус тус тусган санхүүжүүлж байхыг Сангийн сайд Я.Очирсүхэд даалгасугай.

4.Батлан хамгаалахын сайд бөгөөд Улсын байнгын онцгой комиссын дарга Ш.Түвдэндорж, Байгаль орчны сайд бөгөөд Химийн бодис ашиглах үйл ажиллагааг зохицуулах зөвлөлийн дарга С.Мэндсайхан нарт даалгах нь:

а/химийн хорт болон аюултай бодис ашиглаж буй аж ахуйн нэгж, байгууллага, иргэнд тохиолдож болзошгүй аюулыг тодорхойлох, үнэлгээ хийх болон химийн бодисын хор аюулын тухай лавлагааны материал бэлтгэж нийтийн хүртээл болгох арга хэмжээ авч байсугай;

б/химийн бодисын улсын үзлэг, тооллогод зэвсэгт хүчний анги, салбарын химийн албаны дарга, мэргэжилтнийг татан оролцуулах арга хэмжээ авч байсугай.

5.Аймаг, нийслэлийн Засаг дарга нарт даалгах нь:

а/Байгаль орчны болон Эрүүл мэнд, нийгмийн хамгааллын яамтай бүрэлдэхүүнийг нь зөвшилцсөний үндсэн дээр химийн бодисын улсын үзлэг, тооллогын комиссыг тооллого явуулах тухайн жилийн I сард багтаан томилж байсугай;

б/химийн бодисын улсын үзлэг, тооллого явуулах ажлыг зохион байгуулж, аж ахуйн нэгж, байгууллага, иргэн бүрээр ашиглаж буй химийн бодис, тэдгээрийн зарцуулалтын бүртгэлийг хөтлүүлэх, химийн бодисын шинж чанар болон хор аюулын тухай лавлагаа бүрдүүлэх ажлыг тогтмол хийлгэж хэрэгжилтэд нь байнга хяналт тавьж байсугай;

в/Химийн хорт бодисоос хамгаалах тухай хуулийг хэрэгжүүлэх, хяналт тавих асуудлыг мэргэжлийн хяналтын албаны аль нэгэн ажилтны ажлын байрны тодорхойлолтод нэмж тусгуулах замаар зохицуулан шийдвэрлэх арга хэмжээ авсугай.

6.Улсын хилээр нэвтэрч байгаа химийн хорт болон аюултай бодисын тухай дэлгэрэнгүй мэдээллийг байгаль орчны асуудал эрхэлсэн төрийн захиргааны төв байгууллагад улирал тутам гарган өгч байхыг Улсын гаалийн ерөнхий газрын дарга Т.Лхагваад даалгасугай.

Монгол Улсын Ерөнхий сайд Р.АМАРЖАРГАЛ

Байгаль орчны сайд С.МЭНДСАЙХАН