ЗАСГИЙН ГАЗРЫН ТОГТООЛ (ЗАХИРАМЖ)

ХӨРӨНГӨ ОРУУЛАЛТЫН ЭРХИЙН БИЧГЭЭР ХИЙХ ХУВЬЧЛАЛЫН АЖЛЫГ ДУУСГАХТАЙ ХОЛБОГДУУЛАН АВАХ АРГА ХЭМЖЭЭНИЙ ТУХАЙ

1994 оны 8 дугаар сарын 24-ний өдөр

Улаанбаатар хот

Дугаар 156

Монгол Улсын Засгийн газраас ТОГТООХ нь:

1.Хөрөнгө оруулалтын эрхийн бичгээр хийх хувьчлалын ажлыг энэ онд багтаан үндсэнд нь дуусгахаар тооцож зохион байгуулалтын дор дурдсан арга хэмжээг авч хэрэгжүүлэхийг Засгийн газрын Өмч хувьчлалын комисс /Л.ЭНЭБИШ/-т даалгасугай:

а/ өмч хувьчлах хөтөлбөрт их хувьчлалд хамруулахаар тусгагдсан боловч одоогоор хувьчлагдаагүй байгаа үйлдвэрийн газруудаас хөрөнгө оруулалтын эрхийн бичгээр хувьчлах хөрөнгийн хэмжээг үйлдвэр бүрээр гарган нийтэд мэдээлж, хувьчлах шийдвэрийг энэ оны 11 дүгээр сард багтаан гаргах;

б/ дээрх үйлдвэрийн газруудын ажиллагчдаас үйлдвэрийнхээ хувьцааг эзэмшихийг хүссэн хүмүүс болон бусад иргэдээс тухайн үйлдвэрийн газрын хувьцааг хөрөнгө оруулалтын эрхийн бичгээр худалдан авах захиалгыг энэ онд багтаан авч, 1995 оны З дугаар сард багтаан арилжаалан баталгаажуулж дуусгах;

в/ төрийн өмчийн эзэмшилд байгаа орон сууцаа өмчлөн авахыг хүссэн иргэдээс хөрөнгө оруулалтын эрхийн бичгийн "ягаан" тасалбарыг нь орон сууц хувьчлах үед нөхөн тооцохоор урьдчилан авах талаар тусгай журам гаргаж хэрэгжүүлэхийн зэрэгцээ иргэд илүүдэл "ягаан" тасалбараа өөр хоорондоо худалдаалах хялбарчилсан нөхцөл боломжоор хангах;

г) зарим үйлдвэр, аж ахуйн газар, барилга байгууламжийг бэлэн мөнгөөр худалдаж, түүнээс орсон орлогыг хөрөнгө оруулалтын хөтөлбөрийг хэрэгжүүлэх болон нийгмийн арга хэмжээг санхүүжүүлэх эх үүсвэр болгон төвлөрүүлэн зарцуулах.

2.Иргэд хөрөнгө оруулалтын эрхийн бичгийн "цэнхэр" тасалбараараа үйлдвэрийн газрын хувьцааг захиалж авах, "ягаан" тасалбараа орон сууцныхаа төлбөрт оруулан ашиглахад нь тэдэнд зохих туслалцаа үзүүлэх ажлыг холбогдох байгууллагуудтай хамтран цаг алдалгүй зохион байгуулахыг Засгийн газрын Өмч хувьчлалын комисс /Л.ЭНЭБИШ/-т, энэ ажлын явц үр дүнг болон иргэдэд шаардлагатай бусад мэдээллийг тухай бүр зарлан нийтэлж ажиллахыг Радио, телевизийн хэрэг эрхлэх газар /Б.ӨВГӨНХҮҮ/,"Засгийн газрын мэдээ" сонины редакци /Х.ЦЭВЛЭЭ/-д тус тус үүрэг болгосугай.

З.Их хувьчлалын хүрээнд хөрөнгө оруулалтын эрхийн бичгээр хувьчлагдах улсын үйлдвэрийн газруудыг хувьчлах төслийг яаралтай боловсруулж зохих шатны өмч хувьчлалын комиссоор хянуулж шуурхай шийдвэрлүүлэх арга хэмжээ авч, хяналт тавьж ажиллахыг холбогдох сайд, тусгай газрын дарга, аймаг, нийслэлийн Засаг дарга нарт даалгасугай.

4.Хөрөнгө оруулалтын эрхийн бичгээр хувьчлалыг явуулж дуусгахад яам, тусгай газар, нутгийн захиргааны байгууллагууд, аймаг, нийслэлийн өмч хувьчлалын комиссын хариуцан гүйцэтгэх ажлыг тодотгон, нарийвчилсан график-төлөвлөгөө гарган өгч, биелэлтэд нь хяналт тавьж ажиллан хөрөнгө оруулалтын эрхийн бичгээр хийх хувьчлалын ажлыг хэрхэн зохион байгуулж дуусгасан тухай дүнг 1995 оны 1 дүгээр улиралд Засгийн газрын хуралдаанд танилцуулахыг Монгол Улсын шадар сайд, Засгийн газрын Өмч хувьчлалын комиссын дарга Л.Энэбишид үүрэг болгосугай.

Монгол Улсын Ерөнхий сайд П.ЖАСРАЙ

Монгол Улсын шадар сайд Л.ЭНЭБИШ