ЗАСГИЙН ГАЗРЫН ТОГТООЛ (ЗАХИРАМЖ)

ХӨДӨӨГИЙН ХҮН АМД ҮЗҮҮЛЭХ ЭРҮҮЛ МЭНДИЙН ТУСЛАМЖИЙГ САЙЖРУУЛАХ ЗАРИМ АРГА ХЭМЖЭЭНИЙ ТУХАЙ

1995 оны 8 дугаар сарын 24-ний өдөр

Улаанбаатар хот

Дугаар 150

Монгол Улсын Засгийн газраас ТОГТООХ НЬ:

/1 дэх хэсэг Засгийн газрын 1996 оны 282 дугаар тогтоолоор хүчингүй болсонд тооцсон/

2.Эрүүл мэндийн сайд П.Нямдаваад даалгах нь:

а/хөдөөгийн хүн амд үзүүлэх эрүүл мэндийн анхан шатны тусламж, үйлчилгээг 1996 оноос эхлэн өрхийн эмчийн үйлчилгээний хэлбэрт тодорхой үе шаттайгаар шилжүүлэх зохион байгуулалтын арга хэмжээ авсугай;

б/хөдөөгийн эрүүл мэндийн байгууллагын ерөнхий эмч, эрхлэгч нарыг 1996-1998 онд багтаан эрүүл мэндийн удирдлага, эдийн засгийн сургалтанд бүрэн хамруулсугай.

3.Хөдөөгийн хүн эмнэлгийг түргэн тусламжийн машинаар хангах асуудлыг 1996 оны 1 дүгээр сарын 1-ний өдрөөс эхлэн аймгийн Засаг дарга нарт хариуцуулсугай.

Үүнтэй холбогдуулан хөдөөгийн хүн эмнэлгийг түргэн тусламжийн машинаар хангахад шаардагдах зардлыг тухайн орон нутгийн төсөвт тусган хэрэгжүүлж байхыг аймаг, сумын Засаг дарга нарт даалгасугай.

4.Сумдын хүн эмнэлгийн эмчилгээ, үйлчилгээг шуурхай болгон эдийн засгийн үр ашгийг дээшлүүлэх чиглэл боловсруулж, бололцоотой зарим сумын эмнэлгийг хувьчлах ажлыг 1996-1997 онд туршилтын журмаар хэрэгжүүлэх арга хэмжээ авахыг Монгол Улсын Засгийн газрын Өмч хувьчлалын комисс /Л.ЭНЭБИШ/, Эрүүл мэндийн яам /П.НЯМДАВАА/-д даалгасугай.

5.Дорноговь аймаг дахь Анагаах ухааны коллеж, Говь-Алтай, Дархан-Уул аймаг дахь Анагаах ухааны дунд сургуулийг тухайн аймгуудын нэгдсэн эмнэлэгтэй тус тус нэгтгэн Анагаах ухааны төвүүд болгон өөрчлөн зохион байгуулж, хүн амд эмнэлгийн төрөлжсөн, нарийн мэргэжлийн тусламж үзүүлэх, анагаах ухааны мэргэжлийн боловсон хүчин бэлтгэх, эрдэм шинжилгээний ажлыг хослон гүйцэтгэх чиглэлээр ажиллуулахыг Эрүүл мэндийн яам /П.НЯМДАВАА/, Шинжлэх ухаан боловсролын яам /С.ТӨМӨР-ОЧИР/, Дорноговь, Говь-алтай, Дархан-уул аймгуудын Засаг дарга /Л.ОДОНЧИМЭД, Р.ЦОГТБААТАР, Л.АМАРСАНАА/-д даалгасугай.

6.Хөдөөгийн хүн амд үзүүлэх эрүүл мэндийн тусламжийн хүртээмж, чанарыг бодитой сайжруулахад чиглэгдсэн дор дурдсан арга хэмжээнүүдийг Олон улсын байгууллага, гадаад орнуудын туслалцаатайгаар 1996 оноос эхлэн үе шаттайгаар ч хэрэгжүүлэхийг Үндэсний хөгжлийн газар (Ч.УЛААН), Эрүүл мэндийн яам (П.НЯМДАВАА), Дэд бүтцийн хөгжлийн яам (Р.САНДАЛХАН), Эрчим хүч, геологи, уул уурхайн яам (Б.ЖИГЖИД), Хүн амын бодлого, хөдөлмөрийн яам (Э.ГОМБОЖАВ), аймгийн Засаг дарга нарт даалгасугай:

а/багийн хүний эмчийн салбарыг эмнэлгийн зохих шаардлагыг хангасан ажлын байртай, сумын эмнэлэгтэй богино долгионы радио холбоогоор харилцах боломжтой болгох;

б/хөдөөгийн хүн эмнэлгийн үйл ажиллагааны санхүүжилтийн байдлыг сайжруулах зорилгоор сумын эмнэлгийг 200,0-300,0 мянга, багийн хүний эмчийн салбарыг 40,0-60,0 мянган төгрөгт багтаан "Эрүүл мэндийн эргэлтийн сан"-тай болгож, нэн шаардлагатай эм, эмнэлгийн бараагаар тасралтгүй хангах;

в/аймгийн төвөөс алслагдсан, эрчим хүчний төвлөрсөн системд холбогдоогүй 2-3 сумыг аймаг бүрээс сонгон авч нар, салхи, усны хүчийг ашиглан эрчим хүчээр найдвартай хангах;

г/Ховд, Дорнод аймгийн төвд аймаг дундын оношлогоо эмчилгээний төв байгуулж, иргэдэд эмнэлгийн нарийн мэргэжлийн яаралтай тусламж үзүүлэх, түргэн тусламжийн холбоо, тээврийн хэрэгслээр хөрөнгө оруулалтын дунд хугацааны хөтөлбөрт тусгах замаар хангах;

д/эхчүүдийн амрах байрыг сэргээх, үйлчилгээг сайжруулах, тогтмол ажиллагаатай болгоход туслалцаа үзүүлж байх;

е/багийн хүний эмч нарыг шаардагдах эм, эмнэлгийн багаж хэрэгслээр хангах, тэнд ажиллах эрүүл мэндийн сайн дурын туслагч нарыг бэлтгэх.

/Засгийн газрын 1996 оны 282 дугаар тогтоолоор 7 дахь хэсэг хүчингүй болсонд тооцсон/

8.Энэ тогтоол гарсантай холбогдуулан "Хөдөөгийн хүн амын эрүүл мэндийг хамгаалах ажлыг сайжруулах тухай" БНМАУ-ын Сайд нарын Зөвлөлийн 1990 оны 1 дүгээр сарын 19-ний өдрийн 10 дугаар тогтоолыгхүчингүй болсонд тооцсугай.

Монгол Улсын Ерөнхий сайд П.ЖАСРАЙ

Эрүүл мэндийн сайд П.НЯМДАВАА