ЗАСГИЙН ГАЗРЫН ТОГТООЛ (ЗАХИРАМЖ)

2001 оны 5 дугаар сарын 27-ны өдөр

Дугаар 137

Улаанбаатар хот

ХУУЛЬ ХЭРЭГЖҮҮЛЭХ ТАЛААР АВАХ ЗАРИМ АРГА ХЭМЖЭЭНИЙ ТУХАЙ

Хөдөлмөр эрхлэлтийг дэмжих тухай, Ажиллах хүч гадаадад гаргах, гадаадаас ажиллах хүч, мэргэжилтэн авах тухай хууль болон "Хөдөлмөр эрхлэлтийг дэмжих тухай хуулийг хэрэгжүүлэх зарим арга хэмжээний тухай" Улсын Их Хурлын 2001 оны 35 дугаар тогтоолыг хэрэгжүүлэх зорилгоор Монгол Улсын Засгийн газраас ТОГТООХ нь:

1. Нийгмийн хамгаалал, хөдөлмөрийн сайд Ш.Батбаярт даалгах нь:

а/хөдөлмөр эрхлэлтийн төв байгууллага, орон нутгийн албаны бүтэц, зохион байгуулалтыг 2001 оны Ш улиралд багтаан Хөдөлмөр эрхлэлтийн газар, аймаг, дүүргийн хөдөлмөр эрхлэлтийн алба болгон зохион байгуулан ажиллуулсугай;

б/хөдөлмөр эрхлэлтийн албаны үйл ажиллагааны зардал, ажилгүйдлийн даатгалын сангийн хөрөнгөөс санхүүжүүлэх хөдөлмөр эрхлэлтийн албаны ажилтны сургалтыг аймаг, нийслэлийн Засаг даргатай хамтран 2001 оны Ш улиралд багтаан зохион байгуулсугай.

2. Хөдөлмөр эрхлэлтийг дэмжих санд улсын төсвөөс төвлөрүүлэх хөрөнгө болон түүний хэмжээг жил бүрийн улсын төсөвт тусган санхүүжүүлж байхыг Санхүү, эдийн засгийн сайд Ч.Улаан, Нийгмийн хамгаалал, хөдөлмөрийн сайд Ш.Батбаяр нарт үүрэг болгосугай.

З. Хөдөлмөр эрхлэлтийг дэмжих сан, Ажилгүйдлийн даатгалын сангаас зарцуулах сургалтын зардлын нэг хүнд ногдох дээд хэмжээг 50 мянган төгрөгөөр тогтоосугай/Энэ зүйлийг Засгийн газрын 2006 оны 166 дугаар тогтоолоор хүчингүй болсонд тооцосон/

4. Хөдөлмөр эрхлэлтийг дэмжих санд орон нутгийн төсвөөс 2001 оны сүүлийн хагас жилд олгох хөрөнгийн хэмжээ, аймаг, дүүргийн хөдөлмөр эрхлэлтийн албаны зардлыг орон нутгийн төсөвт тодотгон тусгаж цаашид жил бүрийн төсөвт тусган Иргэдийн Төлөөлөгчдийн Хурлаар батлуулж байхыг аймаг, нийслэлийн Засаг дарга нарт үүрэг болгосугай.

5. Энэ тогтоол гарсантай холбогдуулан "Комиссыг шинэчлэн байгуулах тухай" Сайд нарын Зөвлөлийн 1989 оны 12 дугаар сарын 27-ны өдрийн 312 дугаар тогтоол, "БНМАУ-д суугаа гадаадын дипломат төлөөлөгчийн газар, олон улсын байгууллага, гадаадын бусад байгууллагад иргэдийг ажиллуулах тухай" Засгийн газрын 1991 оны 8 дугаар сарын 23-ны өдрийн 249 дүгээр тогтоол, "Ажиллах хүчийг гадаад орнуудаас авах, гадаад орнуудад гаргах асуудлыг журамлах тухай" Засгийн газрын 1992 оны 1 дүгээр сарын 31-ний өдрийн 14 дүгээр тогтоол, "Хүн амын хөдөлмөр эрхлэлтийн талаар авах зарим арга хэмжээний тухай" Засгийн газрын 1992 оны 7 дугаар сарын З-ны өдрийн 106 дугаар тогтоол, "Хөдөлмөр эрхлэлтийг нэмэгдүүлэх, ажилгүйдлийг бууруулах талаар авах зарим арга хэмжээний тухай" Засгийн газрын 1993 оны 8 дугаар сарын 18-ны өдрийн 134 дүгээр тогтоол, "Журам батлах тухай" Засгийн газрын 1994 оны З дугаар сарын 2-ны өдрийн 49 дүгээр тогтоол, Засгийн газрын 1997 оны 11 дүгээр тогтоолоор баталсан "Ажилгүйдлийн даатгалын сангийн хөрөнгийг зарцуулах журам"-ын 20 дахь заалтыг тус тус хүчингүй болсонд тооцож, "Агентлаг байгуулах тухай" Засгийн газрын 2000 оны 9 дүгээр сарын 6-ны өдрийн 139 дүгээр тогтоолын 1 дүгээр зүйлийн "к" заалтын "Хөдөлмөр зохицуулалтын газар" гэснийг "Хөдөлмөр эрхлэлтийн газар", "Аймгийн Засаг даргын Тамгын газрын ерөнхий бүтэц, орон тоо, удирдлагын бүдүүвчийг шинэчлэн тогтоох тухай" Засгийн газрын 2000 оны 11 дүгээр сарын 22-ны өдрийн 181 дүгээр тогтоолын 4 дүгээр зүйлийн "Хөдөлмөр зохицуулалтын алба" гэснийг "Хөдөлмөр эрхлэлтийн алба" гэж тус тус өөрчилсүгэй.

Монгол Улсын Ерөнхий сайд Н.ЭНХБАЯР

Нийгмийн хамгаалал, хөдөлмөрийн сайд Ш.БАТБАЯР