МОНГОЛ УЛСЫН ЗАСГИЙН ГАЗРЫН ТОГТООЛ

2010 оны 1 дүгээр сарын 8-ны өдөр

Дугаар 6

Улаанбаатар хот

ХИЛИЙН ЗАРИМ БООМТЫН ТАЛААР АВАХ АРГА ХЭМЖЭЭНИЙ ТУХАЙ

Засгийн газрын 2008-2012 оны үйл ажиллагааны хөтөлбөр, "Төсөв баталсантай холбогдуулан авах арга хэмжээний тухай" Улсын Их Хурлын 2009 оны 85 дугаар тогтоолыг хэрэгжүүлэх зорилгоор Монгол Улсын Засгийн газраас ТОГТООХ нь:

1. Стратегийн ач холбогдолтой томоохон орд газрыг эдийн засгийн эргэлтэд оруулан олборлож экспортолж байгаа нүүрсний хэмжээ эрс нэмэгдсэнтэй холбогдуулан "Гашуунсухайт", "Шивээхүрэн" боомтыг ачаа болон зорчигчдын хөдөлгөөний урсгалыг төрөлжүүлэн саадгүй нэвтрэх боломжтой, дэд бүтэц, суурин газар бүхий олон улсын жишигт нийцсэн хилийн боомт болгон өргөтгөх ерөнхий төлөвлөгөө, түүнийг хэрэгжүүлэх техник, эдийн засгийн үндэслэл, холбогдох төслүүдийн хамт 2010 оны I улиралд багтаан боловсруулж Засгийн газарт оруулахыг Сангийн сайд С.Баярцогт, Гадаад харилцааны сайд Г.Занданшатар, Хууль зүй, дотоод хэргийн сайд Ц.Нямдорж, Эрдэс баялаг, эрчим хүчний сайд Д.Зоригт, Зам, тээвэр, барилга, хот байгуулалтын сайд Х.Баттулга нарт тус тус даалгасугай.

2. Дараахь арга хэмжээг үе шаттайгаар хэрэгжүүлж, шаардагдах хөрөнгийг нь жил бүрийн эдийн засаг, нийгмийг хөгжүүлэх Үндсэн чиглэл, улсын төсөвт тусгаж, төр, хувийн хэвшлийн түншлэлд тулгуурлан хувийн хөрөнгө оруулалтыг татан оролцуулах замаар санхүүжүүлэх арга хэмжээ авахыг Сангийн сайд С.Баярцогт, Хууль зүй, дотоод хэргийн сайд Ц.Нямдорж, Эрдэс баялаг, эрчим хүчний сайд Д.Зоригт, Монгол Улсын Шадар сайд М.Энхболд нарт даалгасугай:

а) "Гашуунсухайт", "Шивээхүрэн" боомтыг олон улсын жишигт нийцсэн хилийн боомт болгон барьж байгуулах, тээврийн хэрэгслийн жин, рентген болон шалган нэвтрүүлэх бусад тоног төхөөрөмж (гэрэлтүүлэг, дүрс бичлэг, (камер)-ийн хяналтын систем) суурилуулах, лаборатори, ариутгал халдваргүйтгэлийн цэг байгуулах;

б) байгаль, экологийн тэнцвэртэй байдлыг хангах зорилгоор Өмнөговь аймгийн Ханбогд сумын "Цагаанхад" хэмээх газарт байгаа нүүрс ачиж буулгах цэгийн үйл ажиллагааг өөрчлөн байгаль орчинд сөрөг нөлөөгүй техник, технологи нэвтрүүлж, олон улсын стандарт, жишигт нийцсэн нүүрс шилжүүлэн ачих байгууламж барьж байгуулах.

3. Нүүрсний экспортын хэмжээг нэмэгдүүлэх зорилгоор БНХАУ-ын талтай яриа хэлэлцээ хийж "Гашуунсухайт", "Шивээхүрэн" боомтыг 2010 оны I улиралд багтаан 24 цагийн үйл ажиллагаатай олон улсын боомт болгох талаар холбогдох арга хэмжээ авахыг Гадаад харилцааны сайд Г.Занданшатар, Хууль зүй, дотоод хэргийн сайд Ц.Нямдорж нарт даалгасугай.

4. "Гашуунсухайт", "Шивээхүрэн" хилийн боомтын үйл ажиллагаа 24 цагийн горимд шилжихтэй холбогдуулан хил, гааль, мэргэжлийн хяналтын байгууллагын орон тоог нэмэгдүүлэхэд шаардагдах хөрөнгийн асуудлыг судалж, 2010 оны I улиралд багтаан Засгийн газарт оруулахыг Сангийн сайд С.Баярцогт, Хууль зүй, дотоод хэргийн сайд Ц.Нямдорж, Монгол Улсын Шадар сайд М.Энхболд нарт даалгасугай.

5. Дараахь арга хэмжээг авч ажиллахыг Зам, тээвэр, барилга, хот байгуулалтын сайд Х.Баттулга, Эрдэс баялаг, эрчим хүчний сайд Д.Зоригт, Сангийн сайд С.Баярцогт нарт даалгасугай:

а) ашигт малтмалын бүтээгдэхүүн экспортолж байгаа аж ахуйн нэгж, байгууллагын хөрөнгөөр төр, хувийн хэвшлийн түншлэлд тулгуурлан Тавантолгой орд газраас ""Ханги" боомт хүртэл автозам бариулах асуудлыг "Эрдэнэс МГЛ" компанид хариуцуулан автозам барихтай холбогдсон ажлыг зохих хууль тогтоомжийн дагуу зохион байгуулж хэрэгжүүлэх; (Энэ заалтад 2011-08-24-ний 257-р тогтоолоор өөрчлөлт орсон).

б) дээрх автозамыг барьж дуусах хүртэлх хугацаанд одоо ашиглаж байгаа замын тэмдэг, тэмдэглэгээ, замын засвар арчлалтын ажлыг ашигт малтмалын бүтээгдэхүүн экспортолж байгаа аж ахуйн нэгж, байгууллагын хүчээр хийлгэх.

6. Өмнөговь аймгийн нутаг дэвсгэр дэх ашигт малтмалын зарим орд газраас уул уурхайн бүтээгдэхүүнийг экспортолж байгаа аж ахуйн нэгж, төрийн захиргаа болон нутгийн удирдлагын байгууллагуудын ажлын уялдаа холбоог хангаж, хилийн боомтын үйл ажиллагааг зохицуулах үүрэг бүхий Засгийн газрын бүрэн эрхт төлөөлөгчийг томилон ажиллуулах арга хэмжээ авахыг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатарт даалгасугай./ЗГ-ын 2014-2-21-ний 45-р тогтоолоор хүчингүй болсонд тооцсон. Энэ тогтоолыг 2014-4-1-ний өдрөөс дагаж мөрдөнө/

Монгол Улсын Ерөнхий сайд С.БАТБОЛД

Эрдэс баялаг, эрчим хүчний сайд Д.ЗОРИГТ