УЛСЫН ИХ ХУРЛЫН ТОГТООЛ

БАНКНУУДЫН ТАЛААР АВАХ ЗАРИМ АРГА ХЭМЖЭЭНИЙ ТУХАЙ

1999 оны 5 дугаар сарын 13-ны өдөр

Улаанбаатар хот

Дугаар 28

Монгол Улсын Их Хурлаас ТОГТООХ нь:

1.Банкнуудын талаар дараахь арга хэмжээ авч хэрэгжүүлэхийг Засгийн газар /Ж.Наранцацралт/, Монголбанк /Ж.Үнэнбат/-нд даалгасугай:

1/банкны салбарыг бэхжүүлэх, банкнуудын төлбөрийн чадварыг сайжруулах, санхүүгийн эх үүсвэрийг үр ашигтай байршуулах чадвартай банкны систем бүрдүүлэх, олон нийтийн зүгээс банкны салбарт үзүүлэх итгэлийг дээшлүүлэх, банкнаас эдийн засагт гүйцэтгэх үүргийг нэмэгдүүлэх зорилгоор Төрөөс мөнгөний бодлогын талаар 1999 онд баримтлах чиглэлийн хүрээнд банкны салбарын бүтцийн өөрчлөлтийг эрчимжүүлэх;

2/банкны салбарт хийх бүтцийн өөрчлөлтийн асуудлаар олон улсын санхүүгийн байгууллагуудтай хамтран ажиллах, бүтцийн өөрчлөлтийн явцын талаар зохих мэдээлэл, саналыг Улсын Их Хурлын холбогдох Байнгын хороод, зохицуулах зөвлөлд ирүүлж зөвлөмж авч байх;

3/санхүү, төлбөрийн чадвар нь муудсан банкнуудын талаар дор дурдсан арга хэмжээ авах:

а/Хөрөнгө оруулалт, технологи шинэчлэлийн банк, Сэргээн босголтын банк, Хөдөө аж ахуйн банкны 1998 оны санхүүгийн тайланг олон улсын хөндлөнгийн хяналтын байгууллагаар баталгаажуулах;

б/хөндлөнгийн хяналтын дүгнэлт болон газар дээрх шалгалтын дүнг үндэслэн Хөрөнгө оруулалт, технологи шинэчлэлийн банк, Сэргээн босголтын банк, Хөдөө аж ахуйн банкны бүтцийн өөрчлөлтийн нарийвчилсан төлөвлөгөө боловсруулж хэрэгжүүлэх;

в/эдгээр банкнуудын бүтцийн өөрчлөлтөд зориулж Засгийн газраас гаргасан өрийн бичгийн төлөгдөөгүй хүүний өглөгийг барагдуулах, цаашид хүүний төлбөрийг хугацаанд нь барагдуулж байх, бүтцийн өөрчлөлтийн өрийн бичгийг түргэн борлогдох чадвар бүхий үнэт цаасаар солих;

г/ Хөрөнгө оруулалт, технологи шинэчлэлийн банк, Сэргээн босголтын банк, Хөдөө аж ахуйн банкны хувь нийлүүлэгчдийн хурлыг зарлан хуралдуулж, дутагдаж байгаа өөрийн хөрөнгийг нэмэгдүүлэх боломж олгох, Монголбанкнаас тогтоосон хугацаанд өөрийн хөрөнгийг зохих түвшинд хүртэл нэмэгдүүлээгүй банкны гишүүдэд санхүүгийн хариуцлага хуулийн дагуу хүлээлгэж дүрмийн сангаар нь алдагдлыг нөхүүлэх;

д/ Хөрөнгө оруулалт, технологи шинэчлэлийн банк, Сэргээн босголтын банк, Хөдөө аж ахуйн банк санхүү, төлбөрийн чадвар муудсан шалтгааныг судалж, дүгнэлтээ энэ оны 5 дугаар сард багтаан Улсын Их Хуралд танилцуулах.

2.Банкны салбарт хийх бүтцийн өөрчлөлтийг гүнзгийрүүлэхэд шаардлагатай дараахь чиглэлийн хууль, Улсын Их Хурлын шийдвэрийн төсөл боловсруулж 1999 оны 5 дугаар сард багтаан Улсын Их Хуралд өргөн мэдүүлэхийг Засгийн газар /Ж.Наранцацралт/-т даалгасугай:

1/банк байгуулах зөвшөөрөл олгоход тавигдах шалгуур үзүүлэлт, нөхцөл, журмыг чангатгах, банкинд авах албадлагын арга хэмжээний зорилго, үндэслэл, Монголбанкны бүрэн эрхт төлөөлөгч болон эрх хүлээн авагчийн эрх, үүргийг тодорхой болгох, хугацаа хэтэрсэн зээлийг шуурхай төлүүлэх, зээл төлөхөөс зайлсхийж байгаа зээлдэгчдэд албадлагын арга хэмжээ авахтай холбогдсон харилцааг зохицуулж байгаа хууль тогтоомжийн актыг боловсронгуй болгох;

2/банкууд дахь шууд болон шууд бус төрийн өмчийн хувь хөрөнгийг хувьчлах үзэл баримтлал, эрх зүйн байдлыг тодорхойлох.

3.Энэ тогтоолын биелэлтийн явцад хяналт тавьж ажиллахыг Улсын Их Хурлын Эдийн засгийн байнгын хороо /Д.Ганболд/-нд даалгасугай.

ДАРГА Р.ГОНЧИГДОРЖ