МОНГОЛ УЛСЫН ЗАСГИЙН ГАЗРЫН ТОГТООЛ

2012 оны 06 дугаар сарын 13-ны өдөр 

Дугаар 210

Улаанбаатар хот

ХУУЛИЙН ХЭРЭГЖИЛТИЙГ ХАНГАХ ЗАРИМ АРГА ХЭМЖЭЭНИЙ ТУХАЙ

Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг хэрэгжүүлэх ажлыг эрчимжүүлэх зорилгоор Монгол Улсын Засгийн газраас ТОГТООХ нь:

1. Засгийн газрын 2011 оны 174 дүгээр тогтоолоор тогтоосон хилийн заагтай давхацсан алтны шороон ордын 124 тусгай зөвшөөрөл эзэмшигчийн нэхэмжилсэн нөхөх олговорт болон тусгай зөвшөөрлийн талбайд мэргэжлийн байгууллагаар хөндлөнгийн аудит хийлгэх арга хэмжээ авахыг Сангийн сайд Д.Хаянхярваа, Эрдэс баялаг, эрчим хүчний сайд Д.Зоригт нарт даалгасугай.

2. Хөндлөнгийн аудит хийлгэхэд болон тусгай зөвшөөрөл эзэмшигчдэд нөхөх олговор олгоход шаардагдах хөрөнгийг зохих журмын дагуу шийдвэрлүүлэхийг Сангийн сайд Д.Хаянхярваад даалгасугай.

3. Засгийн газрын 2011 оны 174 дүгээр тогтоолоор тогтоосон хилийн заагтай давхцаж, тусгай зөвшөөрөл нь цуцлагдсан алтны 92 шороон ордын нөхөн сэргээлт хийх ажилд хяналт тавьж, хүлээн авахыг Мэргэжлийн хяналтын ерөнхий газрын дарга Р.Содхүү болон холбогдох аймгийн Засаг дарга нарт даалгасугай.

Монгол Улсын Ерөнхий сайд С.БАТБОЛД

Эрдэс баялаг, эрчим хүчний сайд Д.ЗОРИГТ