МОНГОЛ УЛСЫН ЗАСГИЙН ГАЗРЫН ТОГТООЛ

2012 оны 07 дугаар сарын 18-ны өдөр 

Дугаар 240

Улаанбаатар хот

Түлш, эрчим хүчний салбарын 2012-2013 оны өвөлжилтийн бэлтгэл ажлыг хангах зарим арга хэмжээний тухай

Эрчим хүчний тухай хуулийн 5.1.4, Засгийн газрын тусгай сангийн тухай хуулийн 8.3.7-д заасныг үндэслэн Монгол Улсын Засгийн газраас ТОГТООХ нь:

1. Түлш, эрчим хүчний үйлдвэр, компаниудын 2012-2013 оны өвөлжилтийн бэлтгэл хангах ажлын хүрээнд үндсэн болон туслах тоноглолын засвар, техник зохион байгуулалт, хөрөнгө оруулалтын ажлыг төлөвлөсөн хугацаанд нь зохион байгуулж, хяналт тавьж ажиллан үр дүнг Засгийн газарт сар тутам танилцуулж байхыг Эрдэс баялаг, эрчим хүчний сайд Д.Зоригт, Төрийн өмчийн хороо (Б.Заяабал)-нд даалгасугай.

2. Энэ тогтоолын 1 дүгээр хавсралтад заасан эрчим хүчний зарим үйлдвэр, компанид 2013 онд шаардлагатай байгаа татаасын тооцоог хянаж, Монгол Улсын 2013 оны төсвийн тухай хуульд тусган санхүүжүүлэх арга хэмжээ авахыг Сангийн сайд Д.Хаянхярваа, Эрдэс баялаг, эрчим хүчний сайд Д.Зоригт нарт даалгасугай.

3. Төрийн өмчит дулааны цахилгаан станцын 2012-2013 оны өвөлжилтийн бэлтгэлийг хангах ажлын хүрээнд 20-иос доошгүй хоногийн нүүрсний нөөцийг бүрдүүлэх ажлыг зохион байгуулж, нүүрс тээвэрлэх вагоноор тасралтгүй, найдвартай хангах арга хэмжээ авч, нүүрс тээвэрлэлтийн график төлөвлөгөө гарган ажиллахыг Эрдэс баялаг, эрчим хүчний сайд Д.Зоригт, Зам, тээвэр, барилга хот байгуулалтын сайд Ц.Дашдорж нарт даалгасугай.

4. Нүүрсний уурхайн үйлдвэрлэлийн найдвартай ажиллагааг хангахад хүрэлцэхүйц хэмжээний дизель түлш, шатахууны нөөц бүрдүүлэн хөрс хуулалт, их засвар, ашиглалтын үйл ажиллагааг жигд зохион байгуулах арга хэмжээ авахыг Эрдэс баялаг, эрчим хүчний сайд Д.Зоригт, Төрийн өмчийн хороо (Б.Заяабал), холбогдох аймгийн Засаг дарга нарт даалгасугай.

5. Дараахь арга хэмжээ авахыг Сангийн сайд Д.Хаянхярваад зөвшөөрсүгэй:

5.1. "Багануур" ХК-ийн найдвартай ажиллагаа, 2012-2013 оны өвөлжилтийн бэлтгэлийг хангахад зориулж техник, тоног төхөөрөмжийн засвар, үйлчилгээнд болон дизель түлшний нөөц бүрдүүлэхэд шаардагдах хөрөнгийн эх үүсвэрт зориулан 3.2 (гурван тэрбум хоёр зуун сая) тэрбум төгрөгийн төсвийн зээл олгох;

5.2. Завхан аймгийн Улиастай сумын дизелийн цахилгаан станцын дизелийн түлшний зардалд шаардлагатай байгаа 574.5 (таван зуун далан дөрвөн сая таван зуун мянган) сая төгрөгийн хөрөнгийн эх үүсвэрийг Засгийн газрын нөөц сангаас гаргах.

6. "Багануур" ХК-д төсвөөс олгосон зээлийг зориулалтын дагуу үр ашигтай зарцуулж, 2012 онд багтаан энэхүү тогтоолын 2 дугаар хавсралтад заасан хуваарийн дагуу эргэн төвлөрүүлэх арга хэмжээ авахыг Эрдэс баялаг, эрчим хүчний сайд Д.Зоригтод даалгасугай.

7. Аймгийн төвийн эрчим хүчний үйлдвэр, дулааны станц, дизель станцын 2012-2013 оны өвөлжилтийн бэлтгэл хангах ажилд онцгой анхаарч төлөвлөсөн их засвар, хөрөнгө оруулалт, техник зохион байгуулалтын арга хэмжээний ажлыг цаг хугацаанд нь зохион байгуулж, хяналт тавьж ажиллах, түүнчлэн нүүрс нөөцлөх, түлш, шатахуун татан авах ажлыг зохих төлөвлөгөө, хуваарийн дагуу зохион байгуулан ажиллахыг аймгийн Засаг дарга нарт даалгасугай.

Монгол Улсын Ерөнхий сайд С.БАТБОЛД

Эрдэс баялаг, эрчим хүчний сайд Д.ЗОРИГТ

Сангийн сайд Д.ХАЯНХЯРВАА